Dual Panel1Ersumpah aku i bas pusuhku jine, ndigan pe la kutatap singuda-nguda alu mengga ate.
2Kai kin ndia si ilakoken Dibata nandangi kita? Kuga ndia PembalasNa perbahanen manusia?
3Man kalak si erbahan kejahaten, idabuhken Dibata cilaka ras kecedan.
4Kai si kulakoken ieteh Dibata, tiap aku njingkang la lepas i bas PengidahNa.
5Ersumpah aku maka si jahat la nggo kulakoken, janah la pernah pe kutipu kalak si deban.
6I bas timbangen si bujur banci itimbang Dibata aku, i je tentu IdahNa maka sitik pe la lit kesalahenku.
7Adi pernah kin aku nilah i bas dalan si benar nari, ntah pe si jahat ateku ngena, adi tanku melket ibahan dosa,
8di bage, banci kalak si deban mangani si kuerdangken, banci ikernepken kai si nggo kusuan.
9Adi pernah kin pusuhku leket nandangi ndehara kalak, janah alu erbuni-buni kutimai ia i lebe-lebe pintun,
10di bage banci ndeharangku nanggerken nakan kalak, janah medem ia i bas ingan medem dilaki si deban.
11Sabap kejahaten si bage tuhu-tuhu man kemelanken, janah arus iukum alu kematen.
12Dosa si bage desken api neraka, si ngkernepken kinilitenku kerina.
13Adi jungut-jungut suruh-suruhenku, erkiteken la adil perbahanenku, kudengkehken keberatenna, janah bujur kubahan bana.
14Di la bage, kuga pagi ningku jumpa ras Dibata? Tupung reh Ia pagi ngadili aku, kai pagi jabapku BaNa?
15Ma kin Dibata si nepa aku enda, Ia pe si nepa suruh-suruhenku kerina?
16Adi kalak musil mindo penampat, la pernah ia kutulak. Janah diberu balu-balu pe la kupelepas erndele ate.
17Nakanku la kupangani sisada, tapi man anak melumang pe kubereken deba.
18Kupebelin-belin ia kitikna nari, janah kitikna nari kuajari.
19Adi lit kuidah kalak si mesera geluhna, si la ngasup nukur paken perban musilna,
20minter melas akapna kubahan alu uis mbulu biri-biringku jine, emaka ikatakenna bujur i bas pusuhna nari.
21Adi pernah kin kutipu anak melumang, erkiteken kuteh adi erpekara ugapa pe aku menang,
22di bage banci penggelken saja tanku, maka sirang ras barangku.
23Sabap mbiar kap aku man Dibata, emaka labo aku ngasup ngelakoken si bage tempasna.
24La pernah aku ernalem man ertangku,
25tah meganjang ukur kerna kebayakenku.
26Matawari si harhar la pernah kusembah, bage pe bulan si terang rikutken jilena.
27La pernah aku papak ibahan si e kerina, tah kuema tanku pemuliakenca.
28Dosa si bage arus iukum alu kematen, sabap Dibata si meganjangna nggo ipersilahangken.
29La pernah kuakap meriah adi imbangku kena mara, tah puas kuakap adi ia dat cilaka.
30La pernah kutotoken gelah imbangku mate, la aku nggit mahan dosa si bage.
31Kerina si erdahinku metehsa, maka ise pe kualo-alo man panganku asa besurna.
32Kudilo ku rumahku kalak si lit i bas perdalanen, janah la kupelepas ia medem i bas dalan.
33Kalak si deban, ibunikenna dosana, tapi adi aku, la aku nggit nutupisa.
34Kai gia ikataken kalak, la mbiar aku. Penguru-nguru jelma si nterem, la ateku aru. Emaka adi sinik tah kem i rumah, la nggit aku.
35La kin ise pe nggit megiken katangku? Ersumpah aku maka kerina kata-katangku tuhu. Ialoi Dibata si Mada Kuasa min aku. Bicara lit min surat pengadun ibahan imbangku, maka kerina pengadunna e banci kuidah,
36tentu megah kuakap nama suratna e i bas barangku, janah kutamaken i bas takalku jadi mahkotangku.
37Jenari kai si nggo kubahan kuturiken, man Dibata, janah i lebe-LebeNa ngerana aku desken sekalak raja.
38Adi kurampas kin mbarenda taneh si kuperjumai, janah kubuat i bas empuna si tuhu-tuhu nari,
39adi nggo kukeriken pangan si turah i je, jenari kupediat perjuma si nuanisa lumben seh mate;
40di bage, ula gia page tah jaung si turah i je, tapi rih ras dukut-dukut saja gia pe." Sibar e ngenca kata-kata Jop.