Alkitab Mobile SABDA
[VER] : [KARO]     [PL]  [PB] 
 <<  Ayub 38 >> 

Ialoi TUHAN si Jop

1Kenca bage ngaloi TUHAN man Jop i bas angin meter nari.

2[Nina TUHAN,] "La kin kam tek kerna kepentarenKu? Ise kin kam maka pang kam melasken cakap bodoh bangKu?

3Adi dilaki kin kam tuhu, jabap dage genduari penungkunenKu.

4I je kin kam nai tupung Kutepa doni enda? Adi beluh kin, turiken bangKu jabapna.

5Ise nai nentukenca belang doni enda? Adi tehndu kin, ise nai pegesteng tinali sibar-sibarna?

6Kai palas binangunna? Ise si namaken palasna,

7sanga bintang erpagi-pagi rende kerina, dingen malekat-malekat ersurak dem riahna.

8Ise nutup pintu gerbang lawit gelah ula mambur, asum lau mulai erburak i bas beltek doni nari?

9Aku me si nutupi lawit salu embun, janah Kutimpus salu kegelapen.

10Kutetapken belangna, janah Kutambak alu pintu gerbang si lit eruk-erukna.

11Kukataken man lawit, 'Terjeng jenda ngenca! Galumbangndu si mehantu arus ngadi i jenda.'

12O Jop, kidekah geluhndu, pernah kin iperentahkenndu matawari pultak erpagi-pagi, jenari siang wari?

13Pernah kin iperentahkenndu matawari pultak lako nangkap doni, jenari ngkisamken kalak jahat bas inganna cebuni nari?

14Wari siang mahanca deleng ras berneh tangkas teridah, desken lipaten uis ras bekas setempel bas taneh dah.

15Terangsa akap kalak jahat ngidah sinalsal matawari, si ngambati ia ngelakoken si la mehuli.

16Pernah kin kam ku ulu lau i kelbung lawit? Pernah kin kam erdalan arah dasar lawit?

17Pernah kin ituduhken kalak man bandu pintu gerbang, dalan ku doni kematen si gelap la teralang?

18Asa kai kin akapndu belangna doni enda? Adi itehndu kin, turikenlah jabapna.

19Itehndu kin i ja nari rehna terang? Janah kai sumbul kegelapen?

20Ngasup kam nuduhkenca apai balengna gelap ras terang ntah nuruhsa ka ku inganna mulihken?

21Ugapa pe itehndu, perban nggo metua kal kam! Janah tupung doni enda ijadiken, nggo i je kam!

22Pernah kin idahindu ingan pemunin ingan muniken baho ras salju,

23si Kusimpan guna paksa kesusahen bage pe guna paksa perang ras si musuhen?

24Pernah kin kam ku ingan i ja pultak matawari, tah pe ku ulu angin si rembus i Timur nari?

25Ise kin baluren man udan meder, janah si pekena dalan man kilap si erbinar?

26Ise mahanca udan ndabuh ku ingan si la iingani jelma, ras ku gurun pasir si la lit i je manusia?

27Ise kin namaken lau ku taneh kerah-kerah, seh maka dukut turah jadi meratah?

28Lau udan, lit kin bapana? Lau namur, ise petubuhsa?

29Ise kin nandena es batu, janah ise si mupusken salju,

30si nalihken lau jadi batu, dingen lau lawit jadi beku?

31Ngasup kin kam meriksa Bintang Kartika, tah pe ngosari iketen Bintang Timur si Mbisa?

32Ngasup kin kam petetap perdalanen bintang-bintang rikutken musimna, janah negu-negu bintang-bintang si galang ras kitik arah dalanna?

33Itehndu kin aturen-aturen langit? Banci kin ipakendu e guna ngaturken doni enda?

34Banci kin isergangndu embun, gelah udan meder ndabuh ku kam?

35Janah adi iperentahkenndu perkas ersora, nggit kin ia reh ndahi kam, nina, "Enda kami, suruhlah"?

36Ise ngatakenca man iblis ndigan Lau Nil banjir, janah ise nurikenca man manuk sabungen katawari reh udan meder?

37Ise kin kalakna si bage pentarna maka ngasup ia engkira embun, jenari engkisamkenca seh maka ndabuh udan,

38udan si mahanca abu salih jadi gulbak si piher?

39Ngasup kin kam erburu guna ndatken nakan man singa, jenari mesuri beltek anak-anakna,

40tupung ia cebuni i bas lubang gua, tah pe gempang i bas asarna?

41Ise kin nikapken nakan man perik kak asum ia kabang-kabang ku jah ku jenda perban lihena, tupung anak-anakna mindo nakan bangKu?


  Share Facebook  |  Share Twitter

 <<  Ayub 38 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran