Dual Panel1Itehndu katawari kambing kerangen nubisna? Nggo kin iperdiatekenndu belkih nubisken anakna?
2Itehndu kin dekahna ia ngkawali bana? Itehndu katawari paksana ia nubisken anakna?
3Itehndu kin katawari ia ngerendukken nahena guna petubuhken anakna ku doni enda?
4Reh gegehna anakna e i bas kerangen, jenari lawes ia, lanai mulihken.
5Ise mulahisa kalde si meliar i kerangen? Ise ngosari tinalina maka banci ia rate-rate erdalan-dalan?
6Kubereken gurun pasir man inganna, janah taneh masin jadi perjalangenna.
7Kota-kota si meriah ndauh itadingkenna janah ise pe la ngasup pelemuksa ras nenggalakenca.
8Deleng-deleng man ingan gagatenna, ingan bulung-bulung meratah si man panganenna.
9Nggit kin banteng man si erdahinndu? Nggit kin ia erberngi i bas karang lembundu?
10Ngasup kin kam namaken tinalina jenari nenggalakenca? Ngasup kin kam maksa ia ngerintak roka?
11Banci kin kam erpenalem man gegehna si mesangat, janah ngarapken ia ndahiken dahinndu si mberat?
12Banci kin iarapkenndu banteng si naruhi panganndu, tah pe pepulungsa ku pengerikenndu?
13Seh kal pedasna perik unta ngkepekken kabengna! Tapi la lit perik unta si banci bagi ondan perkabangna.
14Perik unta nadingken tinaruhna i babo taneh; emaka abu taneh me ngelaskenca seh naper.
15La isadarina maka tinaruhna banci terdedeh, tah pe iperjak rubia-rubia si meliar seh perper.
16La atena keleng tinaruhna, tempa-tempa la ia empuna, janah la iukurina amin sia-sia pe kelatihenna.
17Maka bodoh pe ia, Aku nge erbahanca, perban la Kubereken kepentaren man bana.
18Tapi adi kiam kenca ia, kuda ras si ngersaksa pe talu ibahanna.
19O Jop, kam kin si mereken gegeh man kuda, janah namaken jambi-jambi si miap-iap i bas kudukna?
20Kam kin mahanca maka ia banci lompat bagi labang, janah gentar kalak megi sorana ngengkus si megang?
21Ikaisina taneh i bas baluren, asa gegehna kiam ia ku pertempuren.
22La itehna mbiar, la ia gentar, la lit pedang si banci mahanca ia mundur.
23Tagan anak panah, lembing ras tombak si ngersaksa, erdetar-detar ras erndilap i babona.
24Isangkilina taneh perban rawana, janah la terbanca kem, kenca sora terompet ibegina.
25Tiap kali terompet erkata, ngengkus ia, ndauh denga pe, bau pertempuren nggo teranggehsa, janah sora puanglima mereken perentah ibegina.
26Kam kin ngajarisa kuliki kabang, tupung ikirbangkenna kabengna kempak Selatan?
27Itimai rajawali kin lebe perentahndu, maka ibahanna asarna i bas deleng si meganjang?
28Ibahanna asarna i bas batu si meganjangna, janah ancuk-ancuk deleng jadi bentengna.
29I jenari ipernehenna pangan si man bunuhenna, ndauh denga pe nggo idahna.
30Kenca bage pulung ia ngkeleweti bangkena janah anak-anakna ngincep darehna.