Dual PanelPERCAKAPEN SI PEMENA 4:1-14:22
1[Nina Elipas,] "O Jop, kitik kin ukurndu adi ersumekah aku? Sabap sinik lanai terban aku.
2(Ayb 4:1)
3Nggo iajarindu nterem jelma dingen ipegegehindu kalak si kote.
4Adi lit kalak jongkang, kote dingen latih, rananndu pegegehisa gelah tedis ia.
5Genduari kam ka i bas kesusahen, tapi nggo bene ukurndu ngadapisa.
6Isembahndu Dibata, janah geluhndu sitik pe la lit man pandangen; dage arus min lit kinitekenndu ras pengarapenndu!
7Genduari cuba peinget-inget lebe; lit kin sekalaklah gia kalak bujur jumpa cilaka?
8Si asa kuidah, kalak si nenggalai juma kejahaten, si ngerdangken benih lagu la uli, e ka nge iperanina.
9Perban RawaNa, ikernepken Dibata ia, desken abu IsempulkenNa ia.
10Kalak jahat erdengum desken singa si merawa, tapi ipesinik Dibata ia janah ipenggelkenna ipenna.
11Desken singa si la lit man jerngemenna ras panganna, mate ia, janah kerina anak-anakna ikerapken.
12Sekali pernah seh berita desken sora kusik-kusik man bangku; perban manjarna menam la kubegi pe.
13Desken sada nipi jahat, igangguna pertunduhku.
14Nggirgir dingen gentar aku; kerina dagingku kumetter perban biarku.
15Angin si lumang rembus ku ayongku, jergal mbulu kudukku, mbiar kal aku.
16Lit kuidah sada tedis i lebe-lebengku; kupernehen, tapi la kueteh kai e. Sora kai pe la lit, jenari kubegi si ngerana nina,
17'Banci kin lit kalak bujur i bas pengidah Dibata, ntah pe bersih i lebe-lebe si Nepasa?
18Suruh-SuruhenNa si i Surga pe la terteki Dibata; i bas malekat-MalekatNa pe idatca kesalahen.
19Akapndu kin Ia tek man si asalna i bas taneh nari, barang abu si banci ipilnatken bagi kutu?
20Banci jadi manusia nggeluh erpagi-pagi, tapi ope denga gelap ia nggo mate, la diate kalak pe.
21Asa kai si lit i bas ia ibuat; mate ia, kepentarenna lalap la serta.'