Alkitab Mobile SABDA
[VER] : [KARO]     [PL]  [PB] 
 <<  Ayub 7 >> 

1Kegeluhen manusia desken tentera upahen, desken kegeluhen sekalak buruh kasar,

2desken sekalak kawan si mesikel nandangi ingan celinggem; desken kalak upahen nimai upahna.

3Bulan terus ku bulan, kegeluhenku kosong; berngi ku berngi kecedaan ate ngenca sikerajangenku.

4Adi medem aku, melawenca kuakap wari terang; gelisah aku gedang-gedang berngi, seh mbincar matawari.

5Berngan kerina dagingku; darangen kerina, nanah maleren bas ugahku nari.

6Wari-waringku mentas alu la erpengarapen, permentasna pedasen asangken tuldak tukang tenun.

7Inget min, o Dibata; kegeluhenku sekali erkumesah ngenca; keriahenku nggo keri.

8Genduari IdahNdu aku, jenari ndigan pe lanai. Adi IdaramiNdu aku, nggo aku lawes.

9Bagi embun si iembusken angin, jenari masap, manusia pe mate janah ndigan pe lanai mulihken; kerina kalak si nandai ia ngelupakenca.

10(Ayb 7:9)

11Lang! La terbahan sinik! Merawa ateku, ngilas kuakap. Terpaksa aku ngerana!

12Ngkai maka IjagaiNdu aku lalap? AkapNdu kin aku naga-lawit?

13Medem aku, gelah banci min aku pekesahken; gelah si mesuingku urak sitik.

14Tapi Kam -- ipebiar-BiarNdu aku alu nipi; IberekenNdu bangku pengenehenen ras nipi jahat,

15seh maka pangen aku mate icekak asangken bagenda nggeluh i bas kiniseran.

16Nggo me; nggo leja aku nggeluh. Tadingken aku! Kegeluhenku desken sekali erkumesah ngenca.

17Ngkai maka manusia e bage pentingna IakapNdu? Man KadeNdu mperdiateken lagu langkahna?

18Tep-tep erpagi-pagi IperiksaNdu ia, janah IujiNdu ia la erngadi-ngadi.

19Ma banci min ndekah sitik IpernehenNdu ku dauh-dauh ah, gelah sempat kubelgek cidurku?

20Bicara erdosa gia aku, ceda kin Kam ibahanna o Pengawas manusia? Ngkai maka ipergunaken Kam aku jadi sasaren anak PanahNdu? Baban si mberat kal kin IakapNdu aku?

21La kin banci IalemiNdu dosangku? La kin banci ImasapkenNdu salahku? Tik nari ampar me aku i bas kuburenku, IdaramiNdu me aku, tapi aku lanai lit."


  Share Facebook  |  Share Twitter

 <<  Ayub 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran