Dual PanelCiken Harun
1Nina TUHAN man Musa,
2"Suruh bangsa Israel mereken sepulu dua ciken man bandu, sada i bas tep-tep peminpin suku nari. Suratken gelarna sekalak-sekalak i bas cikenna,
3jenari suratken gelar Harun i bas ciken suku Lewi. Tep-tep peminpin suku, sada cikenna.
4Babalah ciken e kerina ku bas Kemah Perjumpan, jenari tamaken i lebe-lebe Peti Perpadanen, i ja Aku jumpa ras kam.
5I je kari, ciken kalak si Kupilih tentu ertunas. Alu dalan si enda ateKu Kubahan gelah bangsa Israel ulanai jungut-jungut nandangi kam."
6Ngerana Musa man bangsa e, emaka sekalak-sekalak peminpinna mereken sada ciken man bana, sada guna tep-tep suku. Kerinana sepulu dua, jenari ciken Harun ipersada ras ciken ndai kerina.
7Kenca bage itamaken Musa kerina ciken e i bas Kemah i lebe-lebe Peti Perpadanen TUHAN.
8Pepagina, tupung Musa lawes ku bas Kemah e, idahna maka ciken Harun, si jadi wakil suku Lewi, nggo ertunas. Ciken e nggo erbunga ras buahna nggo tasak, e me buah kahoa!
9Ibuat Musa kerina ciken e jenari icidahkenna man kalak Israel. Idahna kai si nggo jadi, jenari tep-tep peminpin muat cikenna ndai mulihken.
10Nina TUHAN man Musa, "Tamaken ciken Harun mulihken ku lebe-lebe Peti Perpadanen e; ciken e arus isimpan guna jadi sada pertenget man bangsa Israel si berontak maka ia la banci la mate adi la kin ia ngadi jungut-jungut."
11Ibahan Musa bagi si ipedahken TUHAN.
12Nina bangsa Israel man Musa, "Adi bage kin nggo kita dung!
13Adi mate kin tep-tep kalak si ndeheri Kemah e, e bali nge kita ras kalak si nggo mate e!"