Dual PanelAbam lembu megara
1Iperentahken TUHAN man Musa ras Harun
2gelah iberekenna man bangsa Israel peraturen-peraturen bagi si tersurat arah teruh enda. Babalah sada lembu si megara si la lit cacatna janah si la nggo pernah itenggalaken ntah igeretaken,
3jenari berekenlah man Imam Eleasar. Lembu e arus ibaba ku darat ingan erkemah jenari igeleh i lebe-lebena.
4Kenca bage arus ibuat Eleasar darehna e sitik, jenari alu jari-jarina ipirpirkenna pitu kali kempak Kemah.
5Lembu e itutung kerinana i lebe-lebe imam subuk kulitna, dagingna, darehna ras isi beltekna.
6Kenca bage arus ibuatna kayu tusam, sada tangke hisop ras benang megara, jenari benterken ku bas api e.
7Kenca nggo dung si enda kerina, arus icucina pakenna ras iperidina bana alu lau, janah kenca si e nggo banci ia bengket ku bas ingan erkemah; tapi ia tetap denga nge langa bersih rikutken peraturen agama seh karaben.
8Kalak si nutung lembu ndai pe arus ka nge ncuci uisna ras iperidina bana alu lau, tapi ia pe tetap nge langa bersih seh karaben.
9Kenca bage sekalak si bersih rikutken peraturen agama arus ipepulungna abam lembu ndai jenari itamakenna i bas ingan si bersih i darat ingan erkemah. Abam lembu e isimpan i je guna ipake perpulungen kalak Israel i bas nikapken lau pemurihi kalak si la bersih rikutken peraturen agama. Acara enda ibahan guna nangtangi dosa.
10Kalak si pepulung abam lembu e arus ncuci pakenna, tapi ia tetap langa bersih seh karaben. Enda me peraturen si tetap rasa lalap man Israel ras kalak asing si ringan i tengah-tengahna.
Kerna kalak si ndadap mait
11Ise pe si ndadap mait, la ia bersih rikutken peraturen agama pitu wari dekahna.
12La banci la ibersihkenna dirina alu lau pemurihi i bas wari si peteluken ras pepituken, janah kenca e ia nggo bersih. Tapi adi la ibersihkenna bana i bas wari si peteluken ras si pepituken e, ia tetap langa bersih.
13Ise si ndadap mait janah la ibersihkenna man bana, ia tetap la bersih, sabap lau pemurihi e langa icurcurken man bana. Ibahanna maka Kemah TUHAN lanai badia, janah ia lanai nari ianggap bangsa Dibata.
14Adi lit sekalak jelma si mate i bas sada kemah, emaka kerina kalak si lit i bas kemah e tupung kematen ndai ntah pe kalak si bengket ku je jadi la bersih rikutken peraturen agama pitu wari dekahna.
15Tep-tep guci ntah pe kudin i bas kemah e la itutupi, e pe jadi lanai bersih.
16Ise si ndadap kalak mate erkite-kiteken ibunuh ntah pe mate secara biasa i darat kemah, ntah pe adi lit kalak si ndadap tulan-tulan manusia ntah kuburen, ia lanai bersih pitu wari dekahna.
17Guna mbersihkenca mulihken, abam lembu megara si nggo itutung guna ngalemi dosa arus ibuat jenari itamaken i bas sada kudin janah itambahken lau meciho ku je.
18I bas kejadin si pemena, sekalak si bersih rikutken peraturen agama muat sada dahan hisop. Dahan hisop e igedapkenna ku bas lau ndai, jenari ipirpirina kemah e ras kerina isina, bage pe kerina kalak si lit i je. I bas kejadin si peduaken, sekalak si bersih rikutken peraturen agama arus mirpirken lau e ku kalak si njemak tulan-tulan manusia ntah mait ntah pe kuburen.
19I bas wari si peteluken ras si pepituken kalak si bersih ndai arus mirpirken lau e kempak kalak si la bersih ndai. I bas wari si pepituken arus ipebadiaken ia; kalak si la bersih ndai, kenca icucina pakenna ras icurcurina bana alu lau pemurihi e, nggo bersih tupung matawari nggo sundut.
20Kalak si lanai bersih rikutken peraturen agama, adi la ibersihkenna dirina, ia tetap la bersih, sabap lau pemurihi e langa icurcurken kempak ia. Ia erbahanca maka Kemah TUHAN keliamen janah ia lanai nari ikira bangsa Dibata.
21Peraturen enda arus iperdiatekenndu i bas kerina paksa-paksa si reh enda. Kalak si mirpirken lau pemurihi e pe arus ncuci pakenna; ise si njemak lau e ia nggo lanai bersih seh karaben.
22Kai pe si ijemak kalak si la bersih nggo jadi la bersih, janah adi ijemak kalak si deban ka e, ia pe lanai bersih seh karaben.