Dual PanelKalak Kanaan talu erperang
1Asum ibegi raja negeri Arat, eme kalak Kanaan si ringan arah Selatan taneh Kanaan, maka bangsa Israel reh arah Atarim, iserangna bangsa Israel janah deba itabanna.
2Emaka ibahan bangsa Israel sada padan man TUHAN nina, "Adi IbereNdu kami naluken bangsa enda, alu bulat iendesken kami ia ras kota-kotana man BaNdu janah ikernepken kami ia."
3Ibegiken TUHAN ia janah IsampatiNa ia naluken bangsa Kanaan. Emaka ikernepken bangsa Israel ia ras kota-kotana seh keri kal, jenari ibahanna gelar ingan e Horma.
Nipe si ibahan i bas tembaga nari
4Berkat bangsa Israel i Deleng Hor nari arah dalan si ku Teluk Akaba, gelah banci isilahina daerah Edom. Tapi i tengah perdalanen bangsa e nggo lanai sabar.
5Janah pengeranana pe nggo nimbak Dibata ras nimbak Musa. Jungut-jungut ia nina, "Ngkai maka ibaba kam kami ndarat i Mesir nari gelah mate i bas gurun pasir enda? I jenda la lit si man pangan, la lit lau. Nggo leja kami man pangan si la rorat enda!"
6Emaka isuruh TUHAN nipe si erbisa ku tengah-tengah bangsa e, itagutina bangsa Israel, emaka enterem mate ibahanna.
7Reh bangsa e ndahi Musa nina, "Erdosa kami asum kami nimbak TUHAN ras nimbak kam. Genduari ertoto lah man TUHAN gelah IpedauhNa nipe enda i bas kami nari." Emaka ertoto Musa guna bangsa e.
8Kenca bage isuruh TUHAN gelah ibahan Musa sada nipe i bas tembaga nari guna itamaken i das sada galah, gelah ise si nggo itagut nipe e banci ipernehenna ku je maka malem ia.
9Emaka ibahan Musa sada nipe i bas tembaga nari, jenari itamakenna i das galah. Ise si nggo itagut nipe e ipernehenna nipe tembaga e, jenari malem ia minter.
I Deleng Hor nari ku Moap
10Bangsa Israel erdalan terus jenari erkemah ia i Obot.
11Kenca ia berkat i Obot nari, erkemah ia i bas bekas kota Abarim si nggo meruntuh, i bas taneh si mesawang arah Timur daerah Moap.
12Kenca bage erkemah ia i bas Baluren Seret.
13I bas ingan e nari pindah ka ia, jenari erkemah ia arah Utara Lau Arnon, i bas taneh si mesawang si seh ku daerah Amori. (Lau Arnon eme baleng Moap ras taneh Amori.)
14Eme sabapna maka nina i bas Kitap Peperangen TUHAN "...kuta Wahep i daerah Supa, ras baluren Lau Arnon,
15ras reben-reben baluren si seh ku kuta Ar ras ku baleng Moap."
16I jenari bengket ia ku sada ingan si igelari Sumur. I je nina TUHAN man Musa, "Pepulunglah bangsa e kerina, maka Kubereken man bana lau."
17Asum e iendesken bangsa Israel ende-enden enda, "Oh Sumur, erburaklah min laundu emaka iendeken kami me ende-enden.
18Sumur si ikali anak-anak raja, ras peminpin-peminpin bangsa alu ciken kinirajan, alu ciken raja-raja." I bas taneh mesawang nari miser ia ku Matana,
19janah i jenari terus ia ku Nahaliel, janah i Nahaliel nari ku Bamot,
20janah i Bamot nari ku berneh si lit i daerah Moap, i teruh ancuk-ancuk Deleng Pisga, petala-tala ras gurun pasir.
Raja Sihon ras Raja Og italuken (Ul 2:26-3:11)
21Kenca bage isuruh bangsa Israel persuruhen ndahi Sihon, raja kalak Amori. Si man katankenna eme,
22"Berelah kami mentas arah tanehndu. Kami ras asuh-asuhen kami labo pagi luar i bas dalan e nari janah labo kami lawes ku jumandu ntah pe ku kebun anggurndu. Bage pe labo inem kami lau i bas sumurndu nari; kami tetap arah dalin si mbelin seh kami nggo ndarat i bas daerahndu nari."
23Tapi la ibere Sihon bangsa Israel mentas arah daerahna. Ipepulungna tenterana jenari luar ia ku Jahas i taneh si mesawang, iserangna bangsa Israel.
24Tapi enterem musuh e ibunuh bangsa Israel i bas peperangen, jenari iinga nina tanehna mulai i bas Lau Arnon nari ku Utara seh ku Lau Jabok, eme seh ku daerah kalak Amon, sabap baleng kalak Amon kuat pertahanenna.
25Emaka italuken bangsa Israel kerina kota-kota kalak Amori, subuk Hesbon ras kerina kuta-kuta i sekelewetna, jenari minter iinga nina.
26Hesbon eme ibukota ingan Sihon, raja kalak Amori, si nai erperang ngelawan bekas raja Moap janah nggo ibuatna kerina tanehna seh ku Lau Arnon.
27Eme sabapna maka nina perende-rende, "Marilah ku Hesbon, ku kota Raja Sihon! Ate kami ngidah kota e ibangun ras ipekena mulihken.
28Sabap pernah i bas kota Hesbon enda nari, tentera Sihon maju desken api; ikernepkenna kota Ar i Moap iradaskenna deleng-deleng i ulu Lau Arnon.
29Andiko, cilaka me kam o kalak Moap! Kam si ersembah kempak Kemos, bene me kam! Ipelepas dibatandu kerina dilaki jadi pengungsi, janah diberu jadi tabanen raja Amori.
30Tapi genduari kesusurenna nggo ikernepken. Mulai Hesbon nari seh ku Dibon, i Nasim nari seh ku Nopa, deherken Medeba."
31Bagenda me bangsa Israel ngiani daerah kalak Amori.
32Jenari isuruh Musa piga-piga kalak dilaki ndarami dalan si mehulina nerang kota Jaser. Italuken bangsa Israel kota e ras kuta-kuta i sekelewetna jenari ipelawesna kalak Amori si ringan i je.
33Kenca bage nilah bangsa Israel, janah iikutkenna dalan si ku Basan. Raja Og i Basan nari luar ras tenterana, iserangna bangsa Israel i Edrei.
34Nina TUHAN man Musa, "Ula kam mbiar man bana. Aku erbahanca maka italuken kam ia, kerina rayatna, ras tanehna. Bahanlah man bana bagi ibahanndu man Sihon, raja Amori si merentah nai i Hesbon."
35Emaka ibunuh bangsa Israel Og, anak-anakna si dilaki, ras kerina rayatna; la lit sada pe nggeluh itadingkenna, janah kenca e inga nina negerina.