Dual PanelAturen perjabun diberu si ngaloken taneh tading-tadingen orang tuana
1Kepala-kepala keluarga i bas terpuk Gileat anak Mahir ntah pe kempu Manase anak Jusup, lawes njumpai Musa ras peminpin-peminpin si deban.
2Nina, "TUHAN nggo nuruh kam magiken taneh man bangsa Israel alu erbahan tikam tanduk. Tole nggo IpedahkenNa pe man bandu mereken taneh kade-kade kami Selopehat man anak-anakna si diberu.
3Tapi cuba perdiateken, adi erjabu ia ras dilaki i bas suku si deban nari, tanehna e tentu nggo salih jadi sikerajangen suku si deban ndai, janah belang taneh si nggo itentuken man kami nggo erkurang.
4I bas Tahun Pemulihen, asum kerina taneh si nggo idayaken iulihken man empuna si mula-mula, taneh anak-anak si diberu Selopehat secara tetap nggo itambahken man suku inganna sereh janah suku kami nggo kebenen taneh e."
5Emaka ibereken Musa man bangsa Israel pedah si tersurat arah teruh enda si rehna i bas TUHAN nari. Nina, "Payo nge kai si ikataken suku Manase,
6janah erkite-kiteken si e TUHAN ngataken maka anak-anak si diberu Selopehat banci erjabu ras ise pe rikutken sura-surana tapi i bas sukuna e ngenca.
7Taneh tep-tep kalak Israel arus tetap i bas sukuna.
8Tep-tep diberu si ngaloken taneh tading-tadingen i bas suku kalak Israel arus erjabu ras dilaki si sada suku ras ia. Alu bage tep-tep kalak Israel ngaloken taneh tading-tadingen nini-ninina.
9Janah taneh e la banci pindah i bas sada suku ku suku si deban. Taneh tep-tep suku la banci la tetap jadi sikerajangen suku e jine."
10Emaka, Mahlah, Tirsah, Hogelah, Milkah, ras Nuah, anak-anak si diberu Selopehat, ndalanken bagi si ipedahken TUHAN man Musa, erjabu ia ras anak-anak si dilaki senina-senina bapana.
11(Bil 36:10)
12Erjabu ia i bas terpuk-terpuk suku Manase anak Jusup, emaka tanehna e tetap tading i bas kalak si sada suku ras bapana.
13Enda me peraturen-peraturen ras pedah si ibereken TUHAN man bangsa Israel arah Musa i Kendit Moap i kepar-kepar Lau Jordan petingtang ras Jeriho.