Dual PanelRaja ras Haman iundang Ester man-man
1I bas wari peteluken sanga puasa ndai, ipake Ester paken kemberahen, jenari lawes ia ku kesain istana si arah bas. Tedis ia i je ngalaken kamar kursi kinirajan. Raja sangana kundul i bas kursi kinirajan, ngala kempak dalan bengket ku kamar e.
2Tupung raja ngidah kemberahen Ester tedis idarat, jadi kal atena ngenenca, emaka idudurkenna kempak Ester ciken emas kinirajan. Minter ideheri Ester, ikuitna ujung ciken e.
3Isungkun raja ia nina, "Kai atendu, Kemberahen? Turiken sura-surandu; aminna setengah pe kerajan enda, tentu kubereken man bandu."
4Nina Ester ngaloi, "Adi meriah ukurndu raja, reh min kam ras Haman berngi enda ku pesta man-man si nggo kusikapken bandu."
5Emaka minter iperentahken raja ngelegi Haman, gelah banci ia ras-ras nehken sura-sura Ester. Dage berkat me raja ras Haman ndahi pesta si nisikapken Ester.
6Sangana minem-minem anggur, nungkun raja man Ester nina, "Turiken dage kai sura-surandu maka kubereken. Aminna setengah pe kerajanku ipindondu la aku ertahan."
7Ngaloi Ester nina,
8"Adi keleng atendu aku, janah adi meriah ukurndu, kupindo man bandu alu meteruk ukur maka reh ka min kam pagi ras Haman ku pesta man-man si nggo kusikapken man bandu. I je pagi kuturiken kai kin si tuhuna sura-surangku."
Haman ersura-sura munuh Mordekai
9Asum Haman lawes i bas pesta man-man e nari, meriah kal ukurna, janah senang kal akapna. Tapi tupung iidahna Mordekai i bas pintu gerbang istana, janah la ia tedis lako encidahken kehamatenna tupung ia mentas, seh kal rawana ate Haman man Mordekai.
10Tapi isabarina ukurna janah terus ia mulih ku rumah. Kenca bage idilona teman-temanna ku rumahna, janah isuruhna pe ndeharana Seres ikut ras.
11Ipujikenna bana man teman-temanna, dingen imegahkenna kebayakenna, anakna si nterem, kerna pangkat si meganjang si nggo ibereken raja man bana. Janah iturikenna pe maka ndauh kal ia pentingen asangken pembesar-pembesar si deban i bas kerajan e.
12Tole nina, "I babo si e kerina, la lit man ise pe ibahan Kemberahen Ester man-man seakatan man raja ras aku, janah pagi pe iundangna denga ka kami.
13Tapi la lit kuakap ertina si enda kerina adi kuidah denga Mordekai kalak Jahudi ah ndai kundul i bas pintu gerbang istana."
14Emaka ikataken ndeharana ras teman-temanna man bana nina, "Suruh saja maka ibahan tiang gantungen dua pulu dua meter ganjangna. Pagi erpagi-pagi, banci ipindondu maka Mordekai igantung i je, janah kenca si e banci kam berkat ku pesta man-man e alu meriah ukur." Mehuli kal akap Haman usul enda, emaka isuruhna gelah ipajekken sada tiang gantungen.