Dual PanelKalak Jahudi ngkernepken musuh-musuhna
1Dungna seh me wari sepulu telu bulan Adar, wari si nggo itetapken lako ndalanken perentah raja. I bas wari e musuh-musuh kalak Jahudi ngarap maka banci engkuasai bangsa e. Tapi sebalikna, kalak Jahudi nge naluken musuh-musuhna.
2I bas tep-tep kota inganna tading i bas kerajan e, pulung kalak Jahudi, janah ilawanna kerina kalak si nerang ia atena. I japa pe mbiar kalak man bangsa Jahudi, janah la lit ise pe si ngasup ngelawanca.
3Terlebih ka pe erkiteken penguasa-penguasa propinsi, eme gubernur, bupati ras wakil raja i bas daerah e, kerina nampati kalak Jahudi sabap mbiar ia man Mordekai.
4Sabap i belang-belang kerajan nggo terberita maka mbelin kal pengaruh Mordekai i bas istana, janah kuasana pe reh belinna denga.
5Dage kalak Jahudi nggo rate-ate nandangi musuhna; ibunuhina alu pedang, ikernepkenna.
6I bas kota Susan, ibukota kerajan, lit lima ratus kalak ibunuh bangsa Jahudi.
7I bas kalak si ibunuhna e atau sepuluh kalak anak Haman kempu Hamedata, musuh bangsa Jahudi eme: Parsadata, Dalon, Aspata, Porata, Adalia, Aridata, Permasta, Arisai, Arida, ras Waisata. Tapi erta kalak la irampasi bangsa Jahudi.
8(Est 9:7)
9(Est 9:7)
10(Est 9:7)
11Teremna si ibunuh kalak Jahudi minter iberitaken man raja i bas wari e.
12Jenari nina raja man Kemberahen Ester, "I bas kota Susan saja lit lima ratus kalak ibunuh, atau sepuluh kalak anak Haman si dilaki, terlebih i bas propinsi-propinsi si deban, tah uga deba nggo ibahan kalak Jahudi. Genduari kai denga pemindonndu? Turikenlah kai tole sura-surandu, gelah kubereken."
13Ngaloi Ester nina, "Adi mehuli akapndu, berelah maka pagi pe banci ka ilakoken kalak Jahudi bagi si sendah enda. Janah perentahken min maka sepuluhna mait anak-anak Haman igantung i bas tiang gantungen."
14Emaka iperentahken raja maka si enda ilakoken. Perentah enda ipedarat raja i kota Susan janah mait anak-anak Haman pe igantung.
15Dage i bas wari e sepulu empat bulan Adar, pulung ka kalak Jahudi si ringan i kota Susan, jenari ibunuhna telu ratus kalak i bas kota e. Tapi i bas si enda pe, la irampasna erta kalak.
16Kalak Jahudi si ringan i propinsi-propinsi pe pulung guna ngkawali kesahna. Ipulahina bana i bas musuhna nari alu munuh 75.000 kalak si ernembeh ate man kalak Jahudi. Tapi la irampasina ertana.
17Si enda jadi i bas wari sepulu telu bulan Adar. Pepagina, eme i bas wari sepulu empat, lanai lit si ibunuh, janah i bas wari e ibahan kalak Jahudi kerja man-man si meriah,
18Tapi kalak Jahudi si ringan i kota Susan ngerayakenca wari sepulu lima, erdandanken i bas wari sepulu telu ras sepulu empat ibunuhna denga musuh-musuhna, jenari i bas wari sepulu lima ngadi ia.
19Eme sabapna maka kalak Jahudi si ringan i bas kuta si kitik ngerayaken wari sepulu empat bulan Adar jadi sada wari raya si meriah. I bas wari e ibahanna kerja man-man janah sipiring-piringen pangan ia sapih-sapih ia.
Wari Raya Purim
20Kerina kejadin enda isuratken Mordekai, jenari ikiremkenna man kerina kalak Jahudi i bas Kerajan Persia, subuk si ndauh bage pe si ndeher.
21I bas surat e iperentahkenna maka wari sepulu empat ras sepulu lima bulan Adar arus irayaken tiap tahun.
22Sabap i bas wari eme bangsa Jahudi pulah i bas musuh-musuhna nari. I bas bulan eme paksa ceda ate ras aru ate nggo salih jadi keriahen ras kesenangen. Erkiteken si e wari-wari e arus irayaken alu kerja man-man ras pesta-pesta, dingen mereken pangan sada nandangi si debanna ras man kalak musil.
23Dage perentah Mordekai iikutken bangsa Jahudi, emaka perayan e nggo jadi kebiasan tiap tahun.
24Haman anak Hamedata, kesusuren Agag, musuh bangsa Jahudi e, nggo erbahan tikam tanduk si igelari "purim" guna netapken wari lako ngkernepken bangsa Jahudi; isasapken Haman atena bangsa e.
25Tapi ijumpai Ester raja, emaka ipedarat raja perentah si tersurat; erkiteken si e sura-sura Haman si jahat nandangi bangsa Jahudi ersimulih engkenai ia; ia ras anak-anakna si dilaki igantung i bas tiang gantungen.
26Eme sabapna maka wari raya e igelari Purim. Erdandanken surat Mordekai bage pe erkiteken kerina si nggo jadi man bangsa Jahudi,
27bangsa e erbahan peraturen guna ia ras kesusurenna, bage pe man kerina kalak si i-Jahudiken. Rikutken peraturen e, maka tiap tahun bangsa e arus ngerayaken si dua wari e, sue ras si nggo iperentahken Mordekai.
28Itetapken ka pe maka tiap keluarga kalak Jahudi ras kesusurenna, arus nginget ras ngerayaken wari-wari Purim e i bas tiap propinsi ras kota, seh asa lalap.
29Kenca bage Kemberahen Ester, anak Abihail, radu ras Mordekai, erbahan surat si peduaken. Arah surat e, alu kuasa si lit i bas ia, Kemberahen Ester ngesahken surat si nggo leben isuratken Mordekai kerna wari Raya Purim.
30Surat e itujuken man kerina kalak Jahudi, janah salinenna ikiremken ku 127 propinsi si lit i bas Kerajan Persia. Surat e ikiremken rikut ras pengarepen maka kalak Jahudi nggeluh alu dame ras mejuah-juah.
31I je ipedahken man kalak Jahudi ras kesusurenna gelah irayakenna wari Purim i bas paksa-paksa si payo, bali ras ia mpersingeti paksa-paksa puasa ras paksa-paksa erceda ate. Si enda iperentahken Mordekai ras Kemberahen Ester.
32Perentah Ester si netapken peraturen-peraturen Purim isuratken i bas sada kitap.