Alkitab Mobile SABDA
[VER] : [KARO]     [PL]  [PB] 
 <<  Filipi 4 >> 

Kata ajar

1Dage, o senina-seninangku si kukelengi, bagendalah min tetap pergeluhndu jadi kalak Kristen. Keleng kal ateku kam janah tedeh pe ateku! Malem kal ateku ibahanndu janah tuhu-tuhu megah kuakap kerna kam!

2O Eiodia ras Sintike, mindo aku gelah ersadalah min arihndu bagi si ersenina i bas Tuhan.

3Janah kam pe o temanku sada dahin si tutus, sampatilah diberu enda duana. Sabap duana ia nggo latih erdahin ras aku i bas meritaken Berita Si Mehuli e bage pe ras Klemen ras kerina temanku si deban, si gelarna kerina lit i bas Kitap Dibata ingan nuratken gelar-gelar kalak si nggeluh.

4Meriahlah min akapndu katawari pe erkiteken persadanndu ras Tuhan. Sekali nari kukataken: Meriahlah!

5Cidahkenlah perbahanenndu si mehuli man ise pe. Tuhan pedas me reh.

6Ula aru atendu kerna kai pe, tapi i bas kerina pertotonndu, pindolah man Dibata kai si iperlukenndu, janah pindolah rusur man BaNa alu pusuh si dem pengataken bujur.

7Kemalemen ate si rehna i bas Dibata nari, si la terukuri manusia, ngarak-ngarak pusuh ras ukurndu erdandanken persadanndu ras Kristus Jesus.

8Kedungenna o senina-seninangku, ukurilah kerna si mehuli, eme kerna si bujur, mulia, benar, bersih, mejile ras kerna kerina si patut ipuji.

9Dalankenlah kai si nggo ipelajarindu dingen ialokenndu i bas aku nari, subuk arah pengeranangku bage pe arah perbahanenku. Janah Dibata si mereken kemalemen ate man banta nemani kam gelah.

Pengataken bujur

10Mbelin kal keriahen si kugejapken i bas geluhku erkiteken persadanku ras Tuhan. Kenca bage dekahna, lit ka kesempatenndu sekali nari ncidahken maka iperdiatekenndu kap aku.

11Labo maksudku maka lanai aku iperdiatekenndu, saja lanai kin lit kesempatenndu ncidahkenca. Janah si enda kukataken labo erdandanken kugejap maka aku lanai iperdiatekenndu; sabap aku nggo erlajar encukupken alu kai si lit i bas aku.

12Kueteh nge kai ertina nggeluh i bas kekurangen, janah kai ertina nggeluh i bas kelebihen. Nggo kudat rahasiana, seh maka i ja gia ntah katawari gia, malem ateku subuk paksa aku besur bage pe paksa melihe, subuk paksa aku kelebihen bage pe paksa kekurangen.

13Ngasup aku ngalaken kerina keadan erdandanken kuasa si ibereken Kristus man bangku.

14Tapi mehuli kal perbahanenndu nampati aku, asum aku i bas kiniseran.

15Kam o kalak Pilipi, ietehndu kal kap maka asum kutadingken Makedoni, asum tangtangna kuberitaken Berita Si Mehuli kam ngenca perpulungen si nampati aku. Kam ngenca ikut ngenanami untung bage pe rugingku.

16Asum perlu aku penampat i Tesalonika la sekali ngenca ikiremkenndu penampat.

17Labo saja ateku ngaloken pemere-pemere e, tapi si kuarapken eme ngidah perkiran untungndu itambahi.

18Enda dage tandana i bas aku nari maka nggo kualoken kerina si nggo iberekenndu man bangku. Janah lebih pe asa si kuperluken. Genduari nggo cukup kerina keperlunku, eme kenca ibaba Epaproditus kerina pemere-pemerendu. Pemere-pemerendu e jadi sada persembahen si merim man Dibata, persembahen si IalokenNa dingen si ngena AteNa.

19Dibatangku si simpar alu kebayaken si lit i bas Kristus Jesus mereken kerina keperlunndu.

20Terpujilah Dibata Bapanta seh rasa lalap! Amin.

Salam pendungi

21Kataken mejuah-juah i bas aku nari man kerina anak-anak Dibata si lit i bas persadan ras Kristus Jesus. Senina-senina si i jenda ras aku mpeseh salam man bandu.

22Kerina anak-anak Dibata si i jenda ngataken mejuah-juah, terlebih-lebih si ringan i istana Kaisar.

23Lias ate Tuhan Jesus Kristus ras kam kerina gelah.


  Share Facebook  |  Share Twitter

 <<  Filipi 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel