Dual PanelSekalak Lewi ras gundikna
1I bas paksa e, ope denga lit raja i Israel, lit sekalak suku Lewi ringan i deleng-deleng Eperaim. Iempoina sekalak singuda-nguda i Betlehem i Juda nari,
2tapi nembeh ate diberu e man bana. Emaka lawes ia mulih ku rumah bapana i Betlehem janah i jah ia tading empat bulan dekahna.
3Kenca bage itetapkenna ndahi diberu e janah iendik-endikna gelah mulihken man bana. Ibabana suruh-suruhenna ras dua kalde. Ibaba diberu e kalak Lewi ndai ku rumah, janah meriah ukur bapana ngidahsa.
4La ibere bapa diberu e ia ermulih, emaka erberngi ia i je telu wari dekahna. Man ras minem ia, i jah ia erberngi.
5Erpagi-pagi i bas wari peempatken medak kalak ndai lampas, jenari ersikap ia gelah mulih. Tapi nina bapa diberu ndai man kalak Lewi e, "Man lebe, maka kam megegeh. Kentisik nari kam lawes."
6Emaka kundul ia duana janah man ras minem. Kenca bage nina bapa diberu e, "Pesenangken man bandu, i jenda kam sada berngi enda nari."
7Keke kalak Lewi e lawes atena, tapi isekseki bapa diberu e gelah ula ia lawes, emaka tading ia i je sada berngi nari.
8Lampas erpagi-pagi i bas wari pelimaken ersikap ia lawes, tapi nina bapa diberu e, "Manken lebe, tik nari kam lawes." Emaka man kalak ndai duana.
9Kenca bage ersikap ka ia lawes ras ndeharana e bage pe ras suruh-suruhenna. Tapi nina bapa diberu e, "Nggo kap ben kal e. Kentisik nari gelap me. Madin kam erberngi i jenda, pesenang bandu. Pagi banci kam medak lampas guna erdalan ras mulih."
10Tapi kalak Lewi e lanai nggit erberngi, emaka ersikap ia lawes ras ndeharana, ras suruh-suruhenna, ras duana kaldena si nggo itama pelana. Nggo ben kal wari sanga kalak enda seh i deher Jebusi (eme Jerusalem), emaka nina suruh-suruhen e man tuanna, "Ngkai maka la kita ngadi erberngi i bas kota kalak Jebusi enda?"
11(Hak 19:10)
12Tapi nina tuanna, "La kita ngadi i bas sada kota adi la kalak Israel empuna. Terus kita erdalan kentisik nari, gelah i Gibea ntah i Rama kita erberngi."
13(Hak 19:12)
14Emaka ibentasina Jebusi janah iteruskenna erdalan. Nggo sundut matawari sanga kalak enda seh i Gibea daerah suku Benyamin.
15Singgah ia i Gibea emaka i je ia erberngi. Lawes ia ku kota kenca bage kundul ia i tengah kesain, tapi ise pe la ndilosa gelah erberngi i rumahna.
16Sanga e, mentas sekalak dilaki tua-tua mulihna erdahin i juma nari. Situhuna asalna i deleng-deleng Eperaim nari, tapi sanga e i Gibea ia ringan. (Kalak si deban si tading i kota e kerina i bas suku Benyamin nari.)
17Iperdiateken orang tua e kalak pertandang i kesain kota e, emaka isungkunna nina, "I ja nari kam? Ku ja atendu?"
18Nina kalak Lewi e erjabap, "Kami i Betlehem i Juda nari, janah genduari kami sanga i bas perdalanen ku kuta kami i deleng-deleng Eperaim. Tapi ise pe la ndilo kami erberngi ku rumahna,
19aminna pe lit nggala ras gagaten man kalde kami, janah bias nge roti ras anggur man pangan ras inemenku ras ndeharangku ras suruh-suruhenku. Kerina cukup si iperluken kami."
20Nina orang tua e, "Ota ku rumahku kita! Aku muatca kerina si iperlukenndu, ula kam i bas kesain enda erberngi."
21Kenca bage ibabana kalak enda ku rumah ras kaldena pe iberena gagaten. Iburihi temuena nahena, man ia ras.
22Sanga meriah iakap kalak e, rumah orang tua e rempet i kepung kalak gutul si lit i bas kota e. Janah mulai me ipaluina pintun. Nina man orang tua e, "Baba ndarat dilaki si reh ku rumahndu enda! Ipake kami ate kami ia!"
23Tapi ndarat orang tua e, janah nina, "Ula bage teman! Ula bahan si jahat, si la mehuli. Temuengku kal kalak enda.
24Enda ndeharana ras anakku singuda-nguda denga. Kubaba ia genduari ndarat janah banci bandu ia duana. Bahan uga atendu ibahanndu. Tapi man kalak enda ula kal ibahanndu si mejin e!"
25Tapi la ibegiken kalak gutul-gutul e orang tua ndai. Emaka ibuat kalak Lewi e ndeharana kenca bage ibabana ndarat man kalak ndai. Emaka iperkosa kalak ndai ndeharana e la erngadi-ngadi seh erpagi-pagi.
26Nandangi terang wari reh diberu e, janah guling ia i lebe-lebe pintun rumah orang tua e, ingan perbulangenna tading. Seh ngayak pultak matawari i je denga diberu e.
27Medak perbulangenna erpagi-pagi tapi sanga italangina pintun lawes atena, idahna ndeharana ampar i lebe-lebe rumah e tanna ndada ku pintun.
28Nina kalak Lewi e, "Kekeken. Lawes kita." Tapi la ia ngaloi. Kenca bage iampekenna ndeharana e ku das kalde, lawes ia ku kutana.
29Kenca nggo seh i rumah, ibuatna piso. Ibuatna mait ndeharana e, emaka ikeret-keretna jadi sepulu dua ngkeret, emaka iberekenna sada ngkeret man tiap suku Israel si sepulu dua.
30Kerina kalak si ngidahsa nina, "Langa pernah si idah jadi si bagenda rupana! Langa pernah jadi mulai kin bangsa Israel ndarat i Mesir nari. Kai arus sibahan kerna si e? Arih-arihlah kita."