Dual PanelPemindon Hosea man Israel
1Mulihlah ku TUHAN Dibatandu, o Israel. Dosandu mahanca kam tertuktuk dingen jongkang.
2Mulihlah kempak TUHAN, janah bahanlah pertoton enda jadi persembahenndu man BaNa, "Alemilah kerina dosa-dosa kami janah alokenlah pertoton kami maka ipuji kami Kam sue ras si nggo ipadanken kami.
3Asa ndigan pe labo ngasup Assur ngkelini kami, kuda perang pe la banci engkawali kami. Ndigan pe lanai kami nggit ngatakenca man gana-gana kami maka ia me Dibata kami. O TUHAN, IcidahkenNdu kap perkuah AteNdu man kalak si la lit si deban penalemenna."
Padan TUHAN kerna kegeluhen si mbaru man Israel
4Nina TUHAN, "BangsangKu nggo nilah, tapi Kubaba nge ia mulih Kukelengi ia alu ukur meriah, sabap man bana lanai ateKu nembeh.
5Desken udan man taneh kerah, bage me Aku kempak Israel. Erbunga me ia desken bunga encole; uratna mbages desken kayu Libanon.
6Dahan-dahanna ertunas mbaru, perbulungna mejile bagi batang saitun. Bauna seh kal kap rimna, bali ras cemara i Deleng Libanon.
7Mulihken ka ia cilinggem i teruh pengkawalingKu, mejile perturahna bagi batang gandum. Erbuah ia bagi batang anggur; terberita gelarna bagi anggur Libanon.
8Lanai diate bangsa Israel pe berhala-berhala; Aku nge si megiken pertotonna ras si ngarak-ngaraksa; Kulinggemi ia desken kayu si tetap meratah bulungna; Aku me jadi sumbul kerina pasu-pasuna."
Kata pendungi
9Iertiken kalak pentar min kai si tersurat i jenda, dingen itamakenna ku bas pusuhna. Dalan TUHAN pinter kap, emaka kalak bujur erdalan arah e. Tapi kalak perdosa tertuktuk dingen jongkang.