Dual PanelWari raya agama
1Ibereken TUHAN man Musa
2aturen-aturen wari raya agama, si arus irayaken bangsa Israel tupung bangsa e pulung ersembah man TUHAN. Nina Musa,
3"Enem wari arus kam erdahin, tapi arus iingetndu maka wari si pepituken, eme wari pekesahken, wari Sabat. I bas wari e ula kam erdahin, tapi pulunglah kam lako ersembah man TUHAN. Wari Sabat e TUHAN empuna, aminna i japa pe kam tading.
4Momokenlah wari raya si tersena enda i bas paksa-paksa si nggo itentuken."
Wari Paskah ras Wari Raya Roti si la itama ragi (Bil 28:16-25)
5"Wari Paskah irayaken guna pehaga TUHAN. Wari raya e ibenaken tupung wari nggo mulai gelap tep-tep wari sepulu empat i bas bulan si pemena.
6I bas wari sepulu lima ibenaken ka Wari Raya Roti si la itama ragi. Pitu wari dekahna la banci ipanndu roti si itama ragi.
7I bas wari si pemena arus kam pulung lako ersembah man TUHAN, janah la banci idahindu dahinndu.
8Bahan persembahen pangan man TUHAN pitu wari dekahna. I bas wari si pepituken arus ka kam pulung guna ersembah man TUHAN, janah la banci idahindu dahinndu.
9Kenca kam seh i bas negeri si ibereken TUHAN man bandu, janah kenca iperanindu gandumndu, berekenlah pungo si pemena man imam.
10(Im 23:9)
11Imam mpersembahken pungo e jadi sada persembahen man TUHAN, maka ngena ate TUHAN man bandu. Imam nehken persembahen e sada wari kenca lepas wari Sabat.
12Tupung ipersembahkenndu gandum e, persembahken ka pe i bas wari e sada anak biri-biri umur sada tahun jadi persembahen tutungen. Anak biri-biri e la banci lit sitik pe man pandangen.
13Radu ras si e arus ka pe ipersembahkenndu dua kilo tepung si icampur ras minak saitun, jadi persembahen pangan. Persembahen enda merim iakap TUHAN. Tambah si e arus ka pe ipersembahkenndu sada liter lau anggur.
14Ula pan gandum si mbaru e, subuk matah, isauk, ntah ijadiken cimpa, adi langa iberekenndu persembahen-persembahen enda ndai man Dibata. Peraturen enda arus ipatuhi sinursurndu seh rasa lalap."
Wari raya paksa rani (Bil 28:26-31)
15"Beligai pitu minggu kenca ipersembahkenndu pungo gandum si pemena ndai.
16Dage i bas wari si pelima puluhken, eme sada wari kenca lepas wari Sabat si pepituken, bahan ka persembahen gandum si mbaru man TUHAN.
17Tep-tep keluarga arus maba dua ngkibul roti jadi persembahen si iendesken man TUHAN. Tep-tep ngkibul roti tepungna dua kilo, tama ragina, jenari itasakken, janah persembahken man TUHAN selaku persembahen ulih peranin si pemena.
18Tambah-tambah roti ndai, kerina anak kuta arus mpersembahken pitu anak biri-biri umur sada tahun, sada jenggi lembu, dua kambing. Kerina si enda la banci lit sitik pe si man pandangen, janah ipersembahken man TUHAN jadi persembahen tutungen, rikut ras persembahen buah gandum ras lau anggur. Kerina persembahen enda merim iakap TUHAN.
19Tambah si e persembahken ka pe sada bajar kambing jadi persembahen pengalemi dosa, janah dua anak biri-biri umur sada tahun jadi persembahen persadan.
20Sekalak imam mpersembahken roti ras anak biri-biri si dua e jadi persembahen man TUHAN guna imam-imam. Persembahen enda tuhu-tuhu badia.
21I bas wari e la banci idahindu dahinndu, tapi kam arus pulung guna ersembah man TUHAN. Kerina kesusurenndu arus ngikutken peraturen enda seh rasa lalap, subuk i ja pe ia tading.
22Adi iperanindu jumandu, ula perani si arah duru, janah gandum si tading denga ulanai ulihi ranisa. Tadingken si e kerina man kalak si musil-musil bage pe man kalak pertandang. TUHAN kap Dibata si arus isembahndu."
Wari raya tahun si mbaru (Bil 29:1-6)
23"Wari si pemena i bas bulan si pepituken, arus irayakenndu selaku wari pekesahken. I bas wari e kam arus pulung guna ersembah man TUHAN kenca erkata sora terompet.
24(Im 23:23)
25Persembahkenlah pangan man TUHAN, janah ula dahi dahinndu i bas wari e."
Wari pengalemi dosa (Bil 29:7-11)
26"Tep-tep tahun i bas wari sepuluh bulan sepulu sada, eme wari pengalemi dosa man jelma si nterem. I bas wari e kai pe la banci ipan. Pulung dingen ersembahlah man TUHAN, janah persembahkenlah pangan man BaNa.
27(Im 23:26)
28Ula erdahin i bas wari e, sabap i bas wari e kap ilakoken lakon pengalemi dosa man jelma si nterem.
29Ise man i bas wari e, ia lanai ikira i bas bangsa Dibata.
30Ise si erdahin i bas wari e, TUHAN jine kap si munuh ia.
31Kerina kesusurenndu arus patuh man peraturen enda aminna ijapa pe ia tading.
32Kenca matawari sundut i bas wari siwah seh ngayak matawari sundut ka i bas wari sepuluh, kerina kalak arus ngadi erdahin, janah kidekah si e, kai pe la banci ipan."
Wari raya sapo-sapo (Bil 29:12-40)
33"Wari raya sapo-sapo mulai i bas wari sepulu lima bulan pitu; dekahna pitu wari.
34(Im 23:33)
35I bas wari si pemena i bas wari raya e, kerina arus pulung lako ersembah man TUHAN, janah la banci erdahin.
36Pitu wari dekahna arus tep-tep ipersembahkenndu pangan man TUHAN. I bas wari si pewaluhken arus ka kam pulung guna ersembah man TUHAN janah mpersembahken persembahen pangan. Wari e, eme wari perpulungen guna ersembah, janah la banci kam erdahin.
37(Enda me wari-wari raya agama. Tupung wari-wari raya e ipehagandu TUHAN alu pulung ras-ras dingen mpersembahken persembahen pangan, persembahen tutungen, buah gandum, persembahen gelehen, bage pe lau anggur, sue ras si iperluken tep-tep wari.
38Wari-wari raya enda irayaken tambah-tambah wari Sabat. Persembahen-persembahenndu tupung wari raya e pe labo ikira selaku persembahen si biasa iberekenndu, umpamana persembahen erkiteken padan si nggo ipadankenndu, bage pe persembahen erkiteken ersuruh ukurndu nehkenca man TUHAN.)
39Kenca nggo iperanindu jumandu, rayakenlah wari raya sapo-sapo e, mulai i bas wari sepulu lima bulan pitu. Wari si pemena eme wari si ipergunaken lako pekesahken saja.
40I bas wari e buatlah buah pangan i bas batang kayundu nari, keretlah lambe bage pe dahan-dahan kayu si melala bulungna, jenari rayakenlah wari raya e guna pehaga TUHAN Dibatandu.
41Wari raya e pitu wari dekahna. Kerina kesusurenndu arus patuh man peraturen enda seh rasa lalap.
42Kerina kalak Israel arus tading i bas sapo-sapo pitu wari dekahna.
43Alu bage ieteh kesusurenndu me denggo maka tupung nini-ninina itaruhken TUHAN ndarat i Mesir nari, nini-ninina e ibahan TUHAN tading i bas sapo-sapo si labo mejile. Ia me kap TUHAN Dibatandu."
44Bagenda me Musa mereken peraturen-peraturen wari-wari raya agama man bangsa Israel gelah arah e TUHAN ipehaga.