Dual PanelIperentahken Dibata Abraham mpersembahken Isak
1I bas sada paksa kenca nggo lepas kejadin enda ndai kerina, iuji Dibata me Abraham. Erlebuh Dibata man Abraham nina, "O Abraham!" Ngaloi Abraham, "Enda aku TUHAN."
2"Buat anakndu," nina Dibata, "Anakndu si tonggal Isak si seh kal atendu kelengna, jenari laweslah ku taneh Moria. I jah i das sada deleng si Kutuduhken bandu kari, persembahken ia jadi sada persembahen gelehen man bangku."
3Pepagina lampas erpagi-pagi itakai Abraham kayu man ranting persembahen e, itamakenna ku gurung kaldena, jenari ibabana Isak ras dua kalak suruh-suruhenna. Berkat me kalak enda ku ingan si nggo ikataken Dibata man bana.
4I bas wari peteluken nggo iidah Abraham ingan e, aminna gia ndauh denga.
5Jenari nina man suruh-suruhenna, "Timai kena i jenda ras kalde e. Aku ras anakku lawes ku jah ersembah, kenca bage mulih ka kami kari."
6Isuruh Abraham si Isak maba ranting e, janah ia jine maba piso ras rara. Asum ia erdalan duana,
7nina Isak, "Bapa!" Ngaloi Abraham, "Kai anakku?" Nungkun Isak, "Rara ras ranting lit, tapi i ja kin biri-biri si man persembahenken e?"
8Ijabap Abraham nina, "Dibata kari nikapkenca." Jenari iteruskenna ka perdalanenna duana.
9Kenca nggo seh i bas ingan si ikataken Dibata bana, ipajekken Abraham sada batar-batar man ingan persembahen tutungen, kenca bage isusunna ranting i babona. Iiketna anakna, jenari iamparkenna i datas batar-batar ingan persembahen e, i babo ranting ndai.
10Kenca bage, ibuatna pisona munuh anakna atena.
11Tapi ilebuh malekat TUHAN ia i langit nari, "O Abraham, Abraham!" Ngaloi ia, "Kai, enda aku."
12"Ula bunuh anak e, ula ugapa pe ban ia," nina malekat ndai. "Nggo kueteh mbiar kam man Dibata, emaka anakndu si tonggal e pe la kam ertahan merekenca bangKu."
13Ipernehen Abraham kelewet, jenari arah pudina iidahna sada bajar biri-biri sangkut tandukna i bas waren. Ibuatna biri-biri e, emaka ipersembahkenna jadi persembahen tutungen man TUHAN ganti anakna.
14Igelari Abraham ingan ndai: "TUHAN nikapkenca". Seh asa genduari pe ningkalak: "TUHAN nikapkenca idas DelengNa".
15Malekat TUHAN erlebuh pedua kaliken i langit nari man Abraham. Nina,
16"Ersumpah Aku i bas diringKu jine, maka Kubereken man bandu mbue pasu-pasu. Sabap nggo bage perbahanenndu, janah la ertahan kam mereken anakndu si tonggal man bangKu.
17Erpadan Aku maka Kubereken bandu kesusuren si seh kal teremna, bali ras bintang-bintang i langit, ntah pe bali ras kersik i tepi lawit. Kesusurenndu ngkuasai musuh-musuhna denggo.
18Kerina bangsa-bangsa mindo denggo bangKu gelah Kupasu-pasu ia bagi nggo Kupasu-pasu kesusurenndu eme perban kam patuh man perentahKu."
19Kenca bage mulih Abraham ku ingan suruh-suruhenna, jenari ras ia lawes ku Berseba, ingan Abraham.
Kesusuren Nahor
20Kenca bage, ibegi Abraham me berita, maka lit waluh kalak anak seninana Nahor arah perjabunna ras Milka.
21Us eme anak sintua, Bus agina, Kemuil bapa Aram.
22Keset, Haso, Pildas, Jidlap, Betuil,
23eme bapa Rebeka. Anak dilaki si waluh kalak e tubuh arah perjabun Milka ras Nahor senina Abraham.
24Reumah, eme sekalak gundik Nahor, ipupusna Tebah, Gaham, Tahas, ras Maaka.