Alkitab Mobile SABDA
[VER] : [KARO]     [PL]  [PB] 
 <<  Kejadian 24 >> 

Diberu si man Isak

1Genduari Abraham nggo seh kal tuana, janah ipasu-pasu TUHAN ia i bas kerina si idahikenna.

2Nina man suruh-suruhenna si metuana, si ngurus kerina erta-ertana, "Amparken tanndu kelang-kelang pahangku, jenari ersumpahlah.

3Ateku maka ersumpah kam i bas gelar TUHAN, Dibata langit ras doni, maka la ibuatndu beru Kanaan enda jadi ndehara anakku Isak.

4La banci la mulih kam ku negeri asalku, gelah ibuatndu diberu man anakku Isak, i bas kade-kadengku nari."

5Tapi nungkun suruh-suruhen ndai nina, "Uga adi la pagi nggit si nguda-nguda e nadingken rumahna ngikut ras aku ku taneh enda? Banci nge kutaruhken anakndu ku negeri asalndu?"

6Ijabap Abraham, "E ula kal! Ula kal isuruhndu anakku mulih ku jah!

7TUHAN, Dibata si mada langit, nggo maba aku i rumah bapangku nari, i bas taneh keluargangku nari ku ingan enda. Dibata nggo ersumpah man bangku maka IberekenNa taneh enda man kesusurenku. Ia pagi si nuruh malekat arah lebendu, gelah idatndu sada diberu i jah man anakku.

8Adi singuda-nguda e la pagi nggit ngikut ras kam, nggo nangtang kam i bas perpadanen enda. Tapi amin kai pe jadi, ula kal babandu anakku mulih ku jah."

9Kenca bage itamaken suruh-suruhen ndai tanna i kelang-kelang paha Abraham, tuanna, jenari ersumpah ia maka idahikenna kerina bagi si ipindoken Abraham e.

10Emaka ibuat suruh-suruhen Abraham ndai sepuluh unta tuanna, jenari lawes ia ku kota ingan Nahor ringan ndube, eme arah Utara Mesopotami.

11Kenca ia seh i jah, ipengadina unta ndai deher sumur i darat kota. Wari nandangi ben, janah sangana kal diberu-diberu rehen ku sumur e ngelegi lau.

12Ertoto suruh-suruhen ndai nina, "O, TUHAN, Dibata tuanku Abraham, bahanlah maka seh sura-surangku sendah, janah ingetlah PadanNdu ras tuanku Abraham.

13Genduari aku sangana ndeher ku sumur enda, i ja singuda-nguda kota enda nandangi reh ngelegi lau.

14Kuperkuanken kari sekalak i bas singuda-nguda e ningku, 'Pesusur sitik ingan laundu, maka banci aku minem!' Adi ngaloi ia, 'Minemken, untandu pe banci kupeminem,' singuda-nguda si e min si itetapken Kam man suruh-suruhenndu Isak. Adi jadi kari bage, nggo kueteh maka ItepatiNdu kepe PadanNdu ras tuanku."

15Langa pe ia dung ertoto, nggo seh Ribka ije maba ingan lau i babo barana. Ribka anak Betuil si diberu, janah Betuil eme anak Nahor si dilaki, ras ndeharana Milka. Nahor eme senina Abraham.

16Ribka eme sekalak singuda-nguda si seh kal jilena, janah ngincuah ia kempak sumur ngisi ingan launa, jenari mulihken.

17Kiam suruh-suruhen Abraham ndahi ia, jenari nina, "Banci kang ... sitik laundu ena?"

18"Minemken Tuan," nina singuda-nguda e. Pedas-pedas ipesusurna ingan launa i bas barana nari, emaka itunggahina suruh-suruhen ndai.

19Kenca nggo dung ia minem nina singuda-nguda ndai, "Lau inemen untandu pe banci nge kulegi asa biasna."

20Pedas-pedas iusekenna launa ku bas pelangkah ingan minem rubia-rubia si lit ije, jenari kiam ia ku sumur ndai ngelegi lau tole, seh puas kerina untana ndai minem.

21Alu sinik-sinik, iperdiateken suruh-suruhen ndai singuda-nguda e, metehsa ntah payo nggo isehken TUHAN sura-surana.

22Kenca singuda-nguda ndai nggo dung mere minem unta-unta e, ibuat suruh-suruhen e sada anting-anting emas si meherga, itamakenna ku igung singuda-nguda e, janah gelang emas si galang igelangkenna i bas tanna.

23Jenari nina, "Anak ise kin kam? Lit kang ingan i bas i rumahna man inganku erberngi ras teman-temanku?"

24"Bapangku Betuil, anak Nahor ras Milka," nina singuda-nguda e njabapsa.

25"Nggala ras gagaten man nakan asuh-asuhen pe melala nge i rumah kami, janah inganndu erberngi pe lit nge."

26Emaka erjimpuh suruh-suruhen e nembah ia man TUHAN.

27Nina, "Terpujilah TUHAN, Dibata tuanku Abraham, si tetap nteguh ncikep PerpadanenNa ras tuanku Abraham. Nggo ibabai TUHAN aku pinter ku kade-kade tuanku."

28Kenca bage kiam singuda-nguda e ku rumah, iturikenna kasa kai si nggo jadi.

29Lit sekalak turang Ribka Laban gelarna janah nggo ibegina kai si nggo ituriken turangna man bana.

30Bage pe nggo ka idah Laban anting-anting i bas igung turangna, ras gelang i bas tanna. Emaka kiam ia ndahi suruh-suruhen ndai si sangana tedis ras untana deherken sumur e.

31Jenari nina Laban, "Mari ras kita ku rumah. Kam kalak si nggo ipasu-pasu TUHAN. Ngkai maka tedis kam i darat enda? Nggo sikap kamar i rumahku man inganndu, bage pe lit nge ingan man kerina untandu."

32Dage ku rumah me suruh-suruhen e. Itang-tangi Laban baban unta e, iberena nggala ras gagaten. Man suruh-suruhen Abraham ras teman-temanna, ibabana lau man pemurihi nahena.

33Kenca nggo sikap nakan man pangan nina suruh-suruhen e, "Aku langa nggit man, adi langa kubelasken kai si arus kukataken." Nina Laban, "Belasken lah!"

34"Aku kap suruh-suruhen Abraham," nina menaken ranan.

35"Tuhu-tuhu nggo ipasu-pasu TUHAN tuanku Abraham. Ibahan TUHAN ia jadi kalak bayak. Nggo ibereken TUHAN man tuanku melala biri-biri, kambing, lembu, pirak, emas, budak-budak dilaki ras diberu, bage pe unta ras kalde.

36Sara, ndehara tuanku, nggo mupus sekalak anak dilaki kenca ia nggo metua. Nggo ibereken tuanku kerina kebayakenna man anak e.

37Isuruh tuanku aku erpadan alu ersumpah, maka tetap kuikutken perentahna. Nina tuanku, 'Ula kal ibuatndu singuda-nguda kalak Kanaan man ndehara anakku.

38Tapi lawes lah ku bangsa bapangku, ku kade-kadengku, janah pilihlah i je diberu man anakku.'

39Emaka kusungkuni tuanku, 'Uga adi singuda-nguda e la nggit ngikut ras aku?'

40Ijabapna nina, 'TUHAN si kusembah i bas geluhku, Ia si nuruh malekat ras kam gelah sangap kam i bas tugasndu. Idatndu nge pagi diberu man anakku i bas bangsangku nari, eme i bas keluarga bapangku nari.

41Sada ngenca dalanndu nangtang i bas sumpahndu e nari, eme: adi lawes kam ndahi kade-kadengku, tapi itulakna kam, e nggo nangtang kam i bas sumpah e nari.'

42Ndai kenca seh aku i sumur, ertoto aku, 'TUHAN, Dibata tuanku Abraham, berelah maka seh sura-surangku i bas tugasku enda.

43Genduari i deher sumur enda aku. Adi lit kari singuda-nguda muat lau atena, kupindo kari man bana maka iberena minem aku alu ingan launa.

44Adi iberena kari, janah lau man untangku pe ibabana ka, ia me kalakna si nggo IpilihNdu jadi ndehara man anak tuanku.'

45Ope denga aku dung ertoto, reh Ribka maba ingan lau i babo barana ku sumur e muat lau. Ningku man bana, 'Enta sitik laundu ena, minem kal ateku.'

46Pedas-pedas ipesusurna ingan launa, jenari nina, 'Minemken, untandu pe banci kubere minem!' Emaka minem aku, janah unta e pe iberena minem.

47Kusungkun ia, 'Ise bapandu?' Ijabapna nina, 'Bapangku si Betuil, anak Nahor ras Milka.' Kenca bage kutamaken anting-anting i bas igungna ras gelang i bas tanna.

48Erjimpuh aku nembah muji TUHAN, Dibata tuanku Abraham, si nggo naruhken aku pinter ku kade-kade tuanku, i ja nggo jumpa aku ras anakna si diberu man ndehara anak tuanku.

49Genduari adi atendu nehken tanggung jawabndu ras keleng atendu man tuanku, katakenlah man bangku; adi lang pe katakenlah lang, maka kueteh kai arus kubahan."

50Erjabap Laban ras Betuil nina, "Kai si jadi e, i bas TUHAN nari kap, emaka labo kami si erbahan keputusen e.

51Enda kap si Ribka; babalah ia jadi ndehara anak tuanndu, bagi si nggo ikataken TUHAN."

52Kenca ibegi suruh-suruhen Abraham kata enda, erjimpuh ia nembah TUHAN.

53Kenca bage, ipedaratna uis, bage pe perhiasen emas ras pirak, jenari iberekenna man Ribka. Bage pe iberekenna barang-barang si meherga man turang ras nande Ribka.

54Kenca bage maka man ras minem suruh-suruhen Abraham ras teman-temanna si ngikut ras ia, janah i je ia erberngi. Kenca ia nggo keke erpagi-pagi nina suruh-suruhen e, "Ateku mulih min ku tuanku."

55Tapi nina nande Ribka ras turangna, "Seminggu ntah sepuluh wari narilah gia min diberu enda ras kami i jenda, jenari kari lawes gia ia labo dalih."

56Tapi nina suruh-suruhen e, "E ula kal ambati aku. Nggo ibere TUHAN maka sangap perdalanenku, emaka berelah aku mulih ku tuanku."

57Nina kalak ndai ngaloi, "Adi bage kin, sidilo lah Ribka e, ntah uga nina."

58Emaka idilona Ribka, isungkunna nina, "Nggit kam berkat ras kalak enda?" "Nggit," nina ngaloi.

59Erkiteken si e ipelepas kalak enda me Ribka ras si rembahisa nai berkat ras suruh-suruhen Abraham, ras teman-teman suruh-suruhen e.

60Ipasu-pasu kalak enda Ribka nina, "Jadilah kam Ribka, nande erjuta-juta kalak. Italuken kesusurenndu gelah pagi kota-kota musuh-musuhna."

61Kenca bage ersikap-sikap me Ribka ras piga-piga kalak suruh-suruhenna si deban, jenari iersakna unta, berkat ia ras suruh-suruhen Abraham.

62I bas paksa e nggo reh Isak ku gurun pasir si tergelar "Sumur Dibata si nggeluh si mperdiateken aku". Ia sanga ringan i bagin Selatan Kanaan.

63Karaben-karaben ndarat ia erdalan-dalan i bas mbalmbal, jenari iidahna unta reh.

64Kenca idah si Ribka Isak, minter nusur ia i datas untana nari.

65Isungkunna suruh-suruhen Abraham nina, "Ise dilaki si erdalan kempak kita i bas mbalmbal ah?" "Ia kap tuanku," nina suruh-suruhen ndai njabapsa. Erkiteken si e, minter ibuat Ribka selendangna, itutupina ayona.

66Ituriken suruh-suruhen e man Isak kasa kai si nggo ilakokenna.

67Kenca bage ibaba Isak me Ribka ku kemah si nai iingani nandena, Sara. Ribka jadi ndehara Isak. Ngena kal ate Isak man Ribka, janah erkiteken si e terapul ia aminna gia nandena nggo mate.


  Share Facebook  |  Share Twitter

 <<  Kejadian 24 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel