Alkitab Mobile SABDA
[VER] : [KARO]     [PL]  [PB] 
 <<  Kejadian 4 >> 

Kain ras Abil

1Kenca bage ersada kula Adam ras ndeharana, emaka mehuli kula ndeharana ndai. Ipupusna sekalak anak dilaki, emaka nina, "Arah penampat TUHAN nggo dat aku sada anak dilaki." Emaka ibahanna gelarna Kain.

2Kenca si e tubuh ka Abil, agi Kain. Abil jadi permakan biri-biri, tapi Kain jadi perjuma.

3Kenca piga-piga dekah ipersembahken Kain man TUHAN sada bagin asil jumana.

4Abil pe bage ka. Emaka igelehna anak biri-biri si pemenana tubuh, jenari ipersembahkenna bagin-bagin si mehulina man TUHAN. Ngenan ate TUHAN man Abil ras persembahenna,

5tapi Kain ras persembahenna la ialoken TUHAN. Emaka merawa ia, jutjut ayona perbahan nembehna atena.

6Nina TUHAN man Kain, "Ngkai maka kam merawa? Ngkai kam jutjut?

7Adi mehuli perbahanenndu, tentu cirem kam. Tapi erkiteken perbahanenndu jahat, dosa ngerimrim i lebe-lebe pintun. Ikuasaina atena kam, tapi kam arus naluken ia."

8Nina Kain man seninana Abil, "Ota ku juma kita." Seh kenca i juma iayaki Kain seninana, jenari ibunuhna.

9Isungkun TUHAN Kain nina, "I ja agindu si Abil?" Nina Kain erjabap, "La kuteh. Aku kin si ngiani agingku?"

10Nina TUHAN ka, "Ngkai maka bage jahatna perbahanenndu? Dareh agindu serko man bangKu i bas taneh nari.

11Kena sumpah kam janah lanai banci iperjumaindu taneh enda. Nggo litap taneh enda erkite-kiteken dareh seninandu, tempa-tempa nganga ia ngaloken dareh seninandu sanga ia ibunuhndu.

12Adi iperjumaindu taneh e, kai pe la lit asilna; janah kam jadi kalak si mampa-mampa i babo doni enda."

13Nina Kain man TUHAN, "La aku ngasup maba ukumen si bage beratna.

14IpelawesNdu aku ibas taneh enda nari, ndauh i bas adep-AdepenNdu nari. Aku jadi kalak perlajang i babo doni enda, janah adi jumpa aku ras kalak la banci lang ibunuhna aku."

15Tapi erjabap TUHAN nina, "Labo! Adi ibunuh kalak kam, pitu kalak ibunuh jadi balasna." Emaka ibahan TUHAN tanda i bas Kain, gelah adi jumpa gia ia ras kalak si deban, la ia ibunuhna.

16Lawes Kain i bas adep-adepen TUHAN nari, jenari ringan ia i negeri Nod arah Timur Eden.

Sinursur Kain

17Ndehara Kain mupus sekalak anak dilaki, janah Enoh ibahanna gelarna. Kenca bage ipanteki Kain sada kota, ibahanna gelarna Enoh sue ras gelar anakna.

18Anak Enoh lit ka sada, Irad gelarna, eme bapa Mehuel, janah anak Mehuel eme Metusael bapa Lameh.

19Lameh ndai dua ndeharana, eme Ada ras Sila.

20Arah si Ada tubuh Jabal; ia me nini kalak si nggeluh i bas kemah si dahinna ngasuhi rubia-rubia.

21Agi Jabal eme Jubal, nini kalak perkulcapi ras penarune.

22Arah si Sila tubuh Tubal Kain nini kalak pande tembaga ras pande besi. Gelar turang Tubal Kain eme Naama.

23Nina Lameh man ndeharana si dua ndai, "O Ada ras Sila, begikenlah. Nggo kubunuh sekalak anak perana erkiteken ipek-pekna aku.

24Adi man kalak si munuh Kain pitu kalak ibunuh jadi balasna, maka man kalak si munuh aku pitu pulu pitu kalak ibunuh."

Set ras Enos

25Ndehara Adam mupus sekalak nari anak dilaki. Nina ndehara Adam, "Nggo ibereken Dibata bangku sekalak anak dilaki ganti Abel si nggo ibunuh Kain." Emaka ibahanna gelarna Set.

26Set lit ka sekalak anakna dilaki, Enos ibahanna gelarna. Ibas paksa e mulai me kalak erlebuh nandangi gelar TUHAN i bas kebaktin.


  Share Facebook  |  Share Twitter

 <<  Kejadian 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel