Dual PanelMusa isuruh Dibata
1I bas sada wari sanga Musa ermakan biri-biri ras kambing mamana Jetero, imam Midian, tupung igerana asuh-asuhenna ngepari gurun pasir, seh ia ku Deleng Sinai deleng si badia.
2I je, teridah man bana Malekat TUHAN bagi gara api i tengah-tengah rambah duri. Idah Musa rambah ndai gara, tapi lalap la meseng,
3emaka mamang atena janah nina i bas ukurna, "Ngkai maka rambah e lalap la keri meseng? Kudeherilah, gelah kuperdiateken."
4Kenca idah TUHAN maka Musa nggo reh deherna, erlebuh Ia i tengah-tengah rambah ndai nari nina, "Musa! Musa!" Ngaloi Musa nina, "Enda aku."
5Nina Dibata, "Ula deheri ku jenda. Tangtangi selopndu, sabap kam sangana tedis i bas taneh si badia.
6Aku kap Dibata nini-ninindu, Dibata Abraham, Isak ras Jakup." Minter itamburi Musa ayona, sabap mbiar ia natap Dibata.
7Jenari nina TUHAN, "Nggo Kuidah uga serana akap bangsangKu i Mesir. Nggo Kubegi ia nderkuh man bangKu gelah ipulahi i bas mandur-mandur budak nari. Kuteh kerina kiniseranna.
8Emaka Aku nggo nusur mulahi ia i bas kuasa bangsa Mesir nari, janah Kutaruhken ku taneh si mehuli dingen mehumur, taneh si genduari iingani bangsa Kanaan, Heti, Amori, Peris, Hewi, ras Jebusi.
9Tuhu nggo Kubegi pertangis bangsangKu, janah Kuidah uga ia idehken bangsa Mesir.
10Genduari Kusuruh kam ndahi raja Mesir, gelah ibabaindu bangsangKu ndarat i bas negeri e nari."
11Tapi nina Musa man Dibata, "La kap lit ergangku. Uga banci aku ndahi raja e janah mabai bangsa Israel ndarat i Mesir nari?"
12Erjabap Dibata nina, "Aku ras kam, janah kenca itaruhkenndu bangsa e ndarat i Mesir nari, isembahndu pagi Aku i das deleng enda. Em pagi tandana maka Aku nggo nuruh kam."
13Tapi nina Musa njabapsa, "Adi kujumpai pagi bangsa Israel janah ningku man bana, 'Dibata nini-ninindu nuruh aku njumpai kam,' tentu isungkunna aku, 'Ise gelarna?' Jadi uga pagi ningku man bana kerina?"
14Nina Dibata man Musa, "Enda me si arus ikatakenndu man bana, 'Si tergelar AKU TETAP AKU nggo nuruh aku njumpai kam.'
15Kataken man bangsa Israel maka Aku, TUHAN, Dibata nini-ninina, Dibata Abraham, Isak, ras Jakup nggo nuruh kam njumpai ia kerina. Enda me gelarKu seh rasa lalap; bagenda me la banci lang Aku igelari i bas sundut ku sundut.
16Berkatlah kam, dilo peminpin-peminpin bangsa Israel pulung janah turiken man bana kerina maka Aku, TUHAN, Dibata nini-ninina, Dibata Abraham, Isak, ras Jakup, nggo ncidahken bana man bandu. Turiken man bana kerina maka Aku nggo reh ndahi ia, janah nggo ngidah kai si ibahan bangsa Mesir man bana.
17Nggo Kutetapken maka la banci lang Kutaruhken ia ndarat i i bas kimiseranna nari i Mesir, janah Kubabai ia ku taneh si mehuli ras mehumur, taneh bangsa Kanaan, Heti, Amori, Peris, Hewi, ras Jebusi.
18Tentu ibegiken bangsangKu pagi kai si ikatakenndu man bana. Kenca bage, kam ras peminpin-peminpin bangsa Israel la banci la lawes njumpai raja Mesir, janah kataken man bana, nindu, 'TUHAN, Dibata bangsa Heber, nggo ncidahken bana man kami. Emaka genduari, pelepas kami lawes ku gurun pasir telu wari dekahna erbahan persembahen man TUHAN, Dibata kami.'
19Kuteh nge maka labo ibere raja Mesir kam lawes, adi la kin ia ipaksa.
20Perban e Kucidahken pagi kuasangKu janah Kuukum Mesir alu erbage cilaka si mesangat i tengah-tengahna. Jenari pagi maka iberena kam lawes.
21Kubahan pagi maka bangsa Mesir malang man bandu. Erkiteken si e adi berkat pagi bangsangKu, labo ia lawes ngambe-ngambe.
22Tep-tep diberu bangsa Israel lawes pagi njumpai bangsa Mesir si ndeher rumahna ras, bage pe diberu kalak Mesir temanna serumahen, jenari ipindona pagi uis, perhiasen-perhiasen emas ras pirak. Ipakeken bangsa Israel pagi barang-barang enda man anakna si dilaki ras anakna si diberu. Alu bagenda me pagi iangkatna kebayaken bangsa Mesir."