Dual PanelMusa ras Harun ngadap raja Mesir
1Kenca bage, lawes Musa ras Harun ndahi raja Mesir, janah nina, "Ikataken TUHAN, Dibata bangsa Israel man bandu, 'Bere bangsangKu lawes, gelah banci ibahanna sada pesta i gurun pasir guna kemulianKu.'"
2Tapi nina raja, "Ise kin TUHAN emaka arus kubegiken KataNa, maka IsuruhNa aku gelah kupelepas kalak Israel lawes? La kutandai TUHAN e; emaka la kubere kalak Israel lawes."
3Nina Musa ras Harun njabapsa, "Dibata bangsa Heber nggo ncidahken BaNa man kami. Berelah kami erdalan ku gurun pasir si melungun telu wari dekahna mahan persembahen man TUHAN Dibata kami. Adi la ibahan kami bage, la banci la IbunuhNa kami alu penakit ntah pe arah peperangen."
4Nina raja man Musa ras Harun, "Kai atendu maka ibabai kam bangsa e nadingken dahinna? Suruh kerina budak-budak e erdahin mulihken!
5Ma iteh kam bangsandu nggo teremen asa bangsa Mesir i bas negeri enda? Genduari isuruhndu atendu ia ngadi erdahin?"
6Emaka i bas wari e minter iperentahken raja man si merentah budak ras mandur-mandur nina,
7"Ulanai bereken man bangsa e nggala guna erbahan batu-bata. Suruh ia jine ngusahakenca.
8Tapi batu-bata si ibahanna la banci la seri beliganna ras si gelgel, sada pe la banci urak. Perban malasna nge maka lalap ipindona ia lawes nehken persembahen man Dibatana!
9Erserana ban dahinna janah usahaken maka ia tetap sibuk kerina, gelah ulanai lit waktuna megiken cakap si la tuhu."
10Emaka ndarat me si merentah budak ras mandur-mandur nina man kalak Israel kerina, "Nggo iperentahken raja maka lanai isikapkenna man bandu nggala.
11Ikatakenna maka kam jine arus lawes ndaramisa ntah i ja gia banci ibuat kam, tapi la banci lang batu-bata si ibahanndu tetap seri buena."
12Emaka serser isiari bangsa e negeri Mesir ndarami nggala.
13Si merentah budak e tetap maksa ia kerina gelah batu-bata si ibahanna tetap seri buena ras sanga ibereken denga nggala man bana.
14Kalak Mesir si merentah budak e mbalbali mandur-mandur kalak Israel si itugasken ngawasi dahin e, janahna nungkun nina, "Ngkai maka la ibahan bangsandu batu-bata seri buena ras si gelgel?"
15Emaka lawes me mandur-mandur kalak Israel njumpai raja nehken keberatenna nina, "O Raja, ngkai maka bage perbahanenndu man kami?
16Nggala lanai ibereken man kami, tapi tetap denga kami isuruh erbahan batu-bata! Janah genduari kami ibalbali ka, padahal rayatndu e nge si salah."
17Erjabap raja nina, "Malas kam! La atendu erdahin! Janah perban e nge maka ipindondu man bangku gelah kubere kam lawes erbahan persembahen man TUHAN.
18To dahi dahinndu! Lanai ibereken nggala man bandu tapi batu-bata si ibahanndu arus tetap seri buena."
19Iangka mandur-mandur kalak Israel maka ia i bas kiniseran sanga ikataken maka tep-tep wari ia arus erbahan batu-bata seri buena ras si gelgel.
20Asum mandur-mandur e lawes nadingken raja, jumpa ia Musa ras Harun si sangana nimai ia.
21Ikatakenna man Musa ras Harun nina, "TUHAN nggo ngidahsa kai si ibahanndu janah la banci lang IukumNa kam, sabap kam nge erbahanca maka nembeh ate raja ras pegawaina nandangi kami. Erkiteken kam, nggo lit dalanna munuh kami."
Musa jungut-jungut man TUHAN
22Kenca bage ngadap ka Musa man TUHAN nina, "TUHAN, ngkai maka bage suina ate BangsaNdu IbahanNdu? Ngkai maka IsuruhNdu aku ku jenda?
23Mulai kin kenca aku ngerana man raja i bas GelarNdu, nggo mesui kal ate BangsaNdu ibahanna. Janah kai pe langa lit ibahan Kam nampati bangsa e!"