Dual Panel1Nina TUHAN, "Kubahan kam bagi Dibata man raja e, janah seninandu Harun, jadi nabindu, si ngerana man raja.
2Turiken man Harun kerina si nggo Kuperentahken man bandu, gelah ia ngatakenca man raja, maka iberena bangsa Israel nadingken negeri Mesir.
3Tapi Kubahan ateKu maka ukur raja mekeng, janah la ia nggit megiken kam, amina gia melala Kubahan tanda-tanda kuasa i negeri Mesir si erbahanca ia mbiar.
4Jenari Kusehken me ukumen si mberat man negeri Mesir, tapi Kutaruhken kerina suku-suku bangsangKu ndarat i negeri e nari.
5I je me pagi maka ieteh bangsa Mesir maka Aku nge TUHAN, kenca Kuawatken tanKu ngelawan ia janah Kutaruhken bangsa Israel ndarat i negeri e nari."
6Musa ras Harun ngelakoken kai si iperentahken TUHAN.
7Tupung ia duana ngerana man raja e, umur Musa nggo 80 tahun, janah umur Harun 83 tahun.
Ciken Harun
8Nina TUHAN man Musa ras Harun,
9"Adi ate raja nguji kam gelah ibahanndu tanda kuasa, suruh Harun muat cikenna maka ibenterkenna ku taneh i lebe-lebe raja, gelah ciken e salih jadi nipe."
10Kenca e lawes Musa ras Harun ndahi raja, emaka ibahanna bagi si nggo iperentahken TUHAN. Ibenterken Harun cikenna i lebe-lebe raja ras pegawai-pegawaina emaka salih ciken e jadi nipe.
11Emaka idilo raja ka kalak si erpemeteh ras tukang-tukang sihirna, janah arah kebeluhenna ersihir ibahanna ka bagi si ibahan Harun.
12Ibenterken kalak enda cikenna, emaka salih kerina ciken e jadi nipe. Tapi itelen ciken Harun kerina ciken kalak ndai.
13Aminna bage gia ukur raja tetap ka nge mekeng, sue ras si ikataken TUHAN, maka raja la nggit megiken Musa ras Harun.
Erbage-bage mara si ngkenai Mesir Lau jadi dareh>
14Kenca bage nina TUHAN man Musa, "Perban seh kal kengna Raja, la iberena bangsa e lawes.
15Emaka jumpailah ia erpagi-pagi e tupung ia lawes ku Lau Nil. Babalah ciken si salih jadi nipe mbarenda, janah timailah ia i tepi lau e.
16Kenca bage kataken man raja, nindu, 'TUHAN Dibata bangsa Heber nuruh aku ngataken man bandu gelah iberendu BangsaNa lawes, maka banci isembahna Ia i gurun pasir. Tapi seh asa genduari la ibegikenndu.
17Genduari, o Raja, nggo ikataken TUHAN maka itandaindu nge ise Ia arah kai si IbahanNa kari. Nehenlah, kupalu ateku lau belin e alu ciken enda, maka lau e salih jadi dareh.
18Nurung si i bas lau mate, janah Lau Nil la banci lang jadi mbau, seh maka lau e lanai terinem bangsa Mesir.'"
19Nina TUHAN man Musa, "Suruh Harun muat cikenna gelah itatangna ciken e i babo lau, saluren-saluren lau ras kolam-kolam i belang-belang negeri Mesir. Lau e salih jadi dareh, seh maka i belang-belang taneh Mesir dareh nari nge kerina, terus pe ku bas ingan lau si ibahan i bas kayu, ras batu nari."
20Jenari ilakoken Musa ras Harun bagi si iperentahken TUHAN. I lebe-lebe raja ras pegawai-pegawaina, itatang Harun cikenna, jenari ipaluna lau belin e, emaka kerina launa salih jadi dareh.
21Nurung i bas lau e mate, janah lanai kal lang-lang bauna, emaka lanai terimem kalak Mesir. Si belang-belang taneh Mesir dareh kerina.
22Tapi tukang-tukang sihir raja pe erbahan si bage ka alu sihirna, emaka ukur raja tetap mekeng. Bagi si nggo ikataken TUHAN, la ia nggit megiken Musa ras Harun.
23Dage erkusur raja, mulih ia ku istana alu la sitik pe mperdiateken si enda.
24Kerina kalak Mesir ngkali sumur i tepi Lau Nil guna ndarami lau inemen, perban lau i bas lau belin e lanai terinemsa.
25Si enda dekahna lit pitu wari kenca ipalu TUHAN Lau Nil.