Alkitab Mobile SABDA
[VER] : [KARO]     [PL]  [PB] 
 <<  Kisah Para Rasul 10 >> 

Petrus ras Kornelius

1I Kesarea lit sekalak dilaki gelarna Kornelius. Ia sekalak komandan i bas pasukan tentera Romawi si igelari "Pasukan Itali".

2Ia kalak si tutus i bas agama; ia ras isi jabuna nembah man Dibata. Isampatina kalak Jahudi si musil janah la erngadi-ngadi ertoto ia ku Dibata.

3Sekali jadi kira-kira jam telu karaben ialokenna sada pengenehenen. I bas pengenehenenna idahna alu tangkas sekalak malekat Dibata bengket ku bas rumahna. Nina malekat e man bana, "O Kornelius."

4Itatap Kornelius malekat e alu dem kebiaren, janah nina, "Kai Tuan?" Erjabap malekat ndai, "Pertotonndu nggo ibegiken Dibata. Nggo IdahNa kai si nggo ibahanndu nandangi kalak si musil, janah nggo IngetNa pe kam.

5Genduari, suruhlah piga-piga kalak ku Jope guna ngelegi Simon si igelari pe Petrus.

6Ia kesilang i rumah sekalak tukang kulit, gelarna pe Simon. Rumahna e i tepi lawit."

7Kenca lawes malekat e, idilo Kornelius dua kalak juak-juakna ras sekalak perajurit si tutus ku Tuhan eme sekalak ajudanna.

8Iturikenna man kalak e kai si nggo jadi, jenari isuruhna ia lawes ku Jope.

9Pepagina kira-kira pukul dua belas ciger, asum si telu kalak e i bas perdalanen janah nggo ndeher ku Jope, lawes Petrus ku datas tarum rumah guna ertoto.

10Paksa si e igejapna melihe, emaka man atena. Asum isikapken pangan, sangana ia lolah, ialokenna sada pengenehenen.

11Idahna langit talang jenari nusur ku teruh bagi sada lambar uis si mbelang itantan alu empatna sukina ku taneh.

12I bas bungkusen e lit erbage-bage rubia-rubia si empat nahe, rubia-rubia si njoler bage pe perik-perik si meliar.

13Kenca bage lit sora erkata man bana, "O Petrus, kekekenlah, geleh jenari pan rubia-rubia enda."

14Tapi nina Petrus, "Lang Tuhan, lang! La pernah kupan pantangen bage pe si la bersih rikutken aturen agama."

15Nina ka sora ndai, "Kai si nggo ikataken Dibata bersih ula ikatakenndu la bersih."

16Bagenda me jadi telu kali, kenca bage bungkusen ndai iangkat mulihken ku langit.

17Latih akap Petrus ngukurisa kai ertina pengenehenen e. Paksa si e kalak si isuruh Kornelius ndai nggo ndat rumah Simon, janah nggo tedis pe ia kerina i lebe-lebe pintun.

18Erlebuh dingen nungkun ia nina, "Lit kang i bas rumah enda kesilang Simon Petrus?"

19Asum Petrus rukur denga kerna maksud pengenehenen ndai, nina Kesah man bana, "Begiken! Lit telu kalak si ndarami kam.

20Emaka ersikaplah kam, jenari ku teruh kam. Ula kam sangsi berkat ras ia sabap Aku kap si nuruh ia reh ku jenda."

21Ku teruh Petrus jenari nina man si telu kalak e, "Aku kap si idaramindu. Kai atendu maka kam reh?"

22Erjabap kalak e, "Kapten Kornelius nuruh kami reh ku jenda. Kerina kalak Jahudi ngatakenca maka ia mehuli. Sekalak malekat Dibata nuruh ia ngundang kam ku rumahna, gelah ibegina kata i bas kam nari."

23Iundang Petrus si telu kalak e ku rumah dingen kesilang i rumah e i bas berngi e. Pepagina ersikap Petrus jenari berkat ia ras si telu kalak e. Piga-piga kalak si tek i Jope nari ikut ras ia.

24Pepagina ka maka ia nggo seh i Kesarea. Kornelius ras kade-kadena bage pe temanna meriah si nggo itenahkenna nima-nimai kerehen Petrus.

25Asum bengket Petrus ku bas rumah e, reh Kornelius ngalo-ngalosa. Erjimpuh ia janah isembahna Petrus.

26Tapi isuruh Petrus ia keke nina, "Tediskenlah, sabap aku pe manusia biasa nge."

27Janahna ercakap-cakap erdalan ia ku bas. I je idapeti Petrus nggo nterem kalak pulung.

28Nina Petrus man kalak si nterem e, "Nggo ietehndu maka rikutken Undang-undang kalak Jahudi, la kal kami banci bengket ku bas rumah si labo kalak Jahudi, ntah pe ergaul ras ia. Tapi nggo icidahken Dibata man bangku maka la banci kukataken ise pe meluat ntah pe la bersih.

29Perbahan si emaka la mberat ukurku reh ku jenda asum aku idilondu. Dage genduari kusungkun kam: Kai sabapna maka aku idilondu?"

30Nina Kornelius, "Telu wari si nggo lewat, waktuna bagi si genduari e, kira-kira pukul telu karaben ertoto aku i rumah. Paksa si e rempet tedis sekalak dilaki i lebe-lebengku; uisna erkilat.

31Nina man bangku, 'Pertotonndu nggo ibegi Dibata. Nggo IdahNa kai si ibahanndu nandangi kalak si musil.

32Emaka suruhlah kalak ku Jope ngelegi Simon Petrus. Ia kesilang i rumah sekalak tukang kulit, gelarna Simon kang. Rumah e i tepi lawit.'

33Emaka minter kusuruh kalak enda ngelegi kam, janah alu meriah ukur nggo ka kam reh ku jenda. Genduari nggo pulung kami kerina i jenda, i lebe-lebe Dibata guna megiken kata Dibata si IsuruhNa ipesehndu."

34Emaka ibenaken Petrus ngerana nina, "Genduari nggo kueteh maka tuhu-tuhu la erndobah iakap Dibata manusia e.

35Tep-tep manusia i bas bangsa si apai nari gia, adi ia erkemalangen man Dibata dingen mehuli perbahanenna, ialoken Dibata kap.

36Nggo ietehndu kata si ipeseh Dibata man kalak Israel eme Berita Si Mehuli kerna perdamen arah Jesus Kristus. Jesus Kristus eme Tuhan si erkuasa nandangi kerina si nasa lit.

37Ietehndu kejadin si mbelin si nggo jadi i belang-belang taneh Israel, mulai i Galilea nari kenca peridin si iberitaken Johanes,

38eme kerna Jesus kalak Nasaret. Ia iminaki Dibata alu Kesah Si Badia ras kuasa. IsiariNa taneh enda, IbahanNa si mehuli dingen IpepalemNa kerina kalak si isiksa Iblis, sabap Dibata ras Ia.

39Janah kami saksina kerna kerina si IbahanNa i taneh kalak Jahudi bage pe i Jerusalem. Aminna bage gia Ia ibunuh kalak alu makuken Ia ku kayu persilang.

40Tapi i bas wari si peteluken Dibata mpegeluh Ia mulihi. Janah rikutken rencana Dibata, icidah-CidahkenNa BaNa.

41Labo man kerina manusia icidah-CidahkenNa BaNa, tapi man kami ngenca; eme saksi-saksi si nggo leben ipilih Dibata. Man dingen minem kami ras Ia kenca Ia nggeluh mulihi.

42Janah IsuruhNa kami meritaken man jelma si nterem dingen naksiken maka Ia me si nggo itetapken Dibata guna ngadili kalak si nggeluh ras si nggo mate.

43Kerina nabi ersaksi kerna Ia. Ikataken nabi-nabi emaka kalak si tek man BaNa ialemi Dibata kap dosana i bas gelar Jesus."

Kesah Si Badia nusur man si labo kalak Jahudi

44Asum Petrus ngerana denga, nusur Kesah Si Badia man kerina kalak si megiken Berita e.

45Mamang ate kalak Jahudi si nggo tek, si nggo reh ras Petrus i Jope nari, perbahan man si labo kalak Jahudi pe icurcurken Dibata Kesah Si Badia.

46Ibegina kalak e ngerana i bas erbage-bage cakap si deban, dingen ipujina Dibata. Nina Petrus,

47"Kalak enda nggo ngaloken Kesah Si Badia bali ras kita. Banci kin ia iolang-olangi iperidiken alu lau?"

48Jenari isuruh Petrus kalak e iperidiken i bas gelar Jesus. Kenca bage ipindoken kalak e man Petrus gelah ula lebe ia mulih ngayak piga-piga wari.


  Share Facebook  |  Share Twitter

 <<  Kisah Para Rasul 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran