Alkitab Mobile SABDA
[VER] : [KARO]     [PL]  [PB] 
 <<  Kisah Para Rasul 16 >> 

Timotius nemani Paulus ras Silas

1Seh pe Paulus ku Derbe ras ku Listera. I Listera lit sekalak ajar-ajar gelarna Timotius. Nandena kalak Jahudi si nggo tek man Jesus tapi bapana kalak Junani.

2Kerina kalak si tek man Jesus si ringan i Listera bage pe i Ikoni ngataken maka Timotius kalak si mehuli.

3Ate Paulus maba Timotius jadi temanna, emaka isunatkenna ia. Isunatken Paulus ia perbahan kerina kalak Jahudi i daerah e meteh maka bapa Timotius kalak Junani.

4Jenari berkat kalak e niari kuta-kuta. Ipesehna kai si nggo itetapken rasul-rasul ras pertua-pertua i Jerusalem gelah ipatuhi perpulungen-perpulungen.

5Alu bage erteguhna kiniteken perpulungen. Janah tep-tep wari reh teremna anggota perpulungen e.

Paulus ngaloken pengenehenen i Troas

6Perbahan Kesah Si Badia ngambati Paulus ras teman-temanna meritaken Berita Si Mehuli i Propinsi Asia emaka lawes ia arah Perigia ras arah Galati.

7Kenca seh ia i perbalengen Misia, lawes atena ku Propinsi Bitinia. Tapi Kesah Jesus ngambati ia.

8Emaka lawes ia ku Troas arah Misia.

9I bas berngi e Paulus ngaloken sada pengenehenen. I bas pengenehenen e idahna sekalak kalak Makedoni tedis janah erdilo man bana nina, "Marilah ku Makedoni, sampati kami!"

10Kenca Paulus ngaloken pengenehenen e, minter kami ersikap guna berkat ku Makedoni. Sabap tek kami maka Dibata nuruh kami meritaken Berita Si Mehuli man kalak si ringan i Makedoni.

Lidia si ringan i Pilipi tek man Jesus

11Jenari erlayar kami i Troas nari ku Pulau Samotrake. Pepagina terus kami ku Neapolis.

12I Neapolis nari erdalan kami ku Pilipi eme kuta i daerah si pemena i Makedoni. Penduduk kuta e, eme warga negara Roma. I bas kuta eme kami ringan piga-piga wari dekahna.

13Asum wari Sabat kalak Jahudi, lawes kami ku darat kuta, ku tepi lau, sabap iakap kami maka lit i je ingan ertoto kalak Jahudi. Kenca kami kundul, ngerana kami man diberu-diberu si pulung i je.

14Sekalak i bas diberu e gelarna Lidia. Ia i Tiatira nari janah dahinna erbinaga uis si meherga, ungu rupana. Ia kalak Junani si ersembah man Dibata. Italangi Tuhan ukurna, emaka tutus kal atena megiken kai si ikataken Paulus.

15Ia iperidiken ras kerina isi jabuna. Jenari iundangna kami ku rumahna nina, "Adi iakapndu maka aku tuhu-tuhu nggo tek man Tuhan, marilah kesilang ku rumahku." Ipindokenna kal gelah kami kesilang ku rumahna.

Paulus ras Silas ipenjaraken i Pilipi

16I bas sada wari, asum kami lawes ku ingan ertoto, jumpa kami ras sekalak budak diberu. Ia erjinujung, emaka ngasup ia nuriken kejadin si langa reh. Melala untung tuanna arah ia.

17Ikut-ikutna Paulus ras kami, janah alu sora si megang nina, "Kalak enda kerina eme persuruhen Dibata si Meganjang. Iturikenna man bandu dalan keselamaten."

18Piga-piga wari ibahanna bage seh dungna lanai sabar Paulus. Emaka erkusur Paulus, isergangina setan e nina, "I bas gelar Jesus Kristus kusuruh kam ndarat i bas diberu enda nari." I bas paksa e pe minter ndarat setan e.

19Kenca idah tuanna maka lanai ia banci dat duit arah diberu e nari, itangkapna Paulus ras Silas, jenari isarenna ku bale i tiga.

20Ibabana ia ku lebe-lebe Pemerentah Roma janah nina, "Kalak enda kalak Jahudi; janah iguntarina kutanta enda.

21Iajarkenna adat si la banci sibahan rikutken undang-undangta kalak Roma."

22Kalak si nterem pe ikut ngelawan Paulus ras Silas. Icaingken pengulu-pengulu bale e uis Paulus ras uis Silas jenari isuruhna perajurit ngeligasisa.

23Kenca mesangat Paulus ras Silas iligasina, itamakenna ia ku bas penjara. Iperentahken pengulu-pengulu e man kepala penjara gelah ijagai kal rasul-rasul e.

24Sue ras perentah e, itamaken kepala penjara e ia duana ku bas kamar si arah tengahna kal. Nahena i pasungna i bas beloti si galang.

25Tapi kira-kira tengah berngi Paulus ras Silas ertoto dingen rende muji Dibata, janah kalak tahanen si deban megiken ia.

26Rempet jadi linur mehantu, si erbahanca mugur-ugur palas penjara e. Talang kerina pintun rumah penjara; bage pe rante-rante si ngiket tan kalak tahanen e nangtangen.

27Medak kepala penjara, janah kenca idahna nggo talang pintun penjara, iakapna kerina kalak tahanen e nggo kiam. Emaka idekdekna pedangna, ibunuhna atena bana.

28Tapi alu sora si megang nina Paulus, "Ula sakiti bandu, sabap i jenda denga nge kami kerina!"

29Isuruh kepala penjara sekalak juak-juak maba lampu jenari kiam ia ku bas. Nggirgir kal ia, isembahna Paulus ras Silas.

30Jenari ibabana Paulus ras Silas ndarat, janah nina, "O tuan, kai arus kubahan gelah aku terkelin?"

31Ngaloi rasul-rasul nina, "Teklah man Tuhan Jesus gelah kam terkelin, eme kam ras isi jabundu."

32Jenari iberitaken rasul-rasul e Kata Tuhan man bana ras man kerina isi jabuna.

33I bas jam berngi si ndai pe ibaba kepala penjara e rasul-rasul ndai ku bas sada ruangen jenari itambarina luka-lukana. Kenca bage iperidiken rasul-rasul kepala penjara ras isi jabuna.

34Ibaba kepala penjara e rasul-rasul ndai ku rumahna jenari isuruhna man. Meriah kal ukur kepala penjara ras isi jabuna perbahan nggo tek ia man Dibata.

35Kenca terang wari isuruh pengulu-pengulu piga-piga kalak perajurit ndahi kepala penjara guna ngataken, "Pulahi si dua kalak e!"

36Kata enda ikataken kepala penjara ka man Paulus nina, "Pengulu-pengulu kuta enda nuruh aku mulahi kam ras Silas. Emaka nggo banci kam ndarat; lawes lah alu mejuah-juah."

37Tapi nina Paulus man perajurit e, "Kami warga negara Roma kap. Langa pe idatna kesalahen kami, nggo iligasina kami i lebe-lebe jelma si nterem. Jenari itamakenna kami ku bas penjara. Janah genduari atena mulahi kami bage-bage saja? Lang, la kami nggit! Suruh pengulu-pengulu kuta enda ku jenda mulahi kami."

38Ipeseh perajurit e kata enda man pemerentah. Mbiar ia kenca ibegina maka Paulus ras Silas warga negara Roma.

39Emaka berkat ia mindo maap man Paulus ras Silas. Kenca bage ibabana rasul-rasul e ndarat i bas penjara e nari janah ipindokenna gelah lawes rasul-rasul nadingken kuta e.

40Itadingken Paulus ras Silas penjara e jenari lawes ia ku rumah Lidia. Kenca jumpa ia ras senina-senina si sada kiniteken janah kenca ipetetapna ukur senina-senina e, berkat ia nadingken kuta e.


  Share Facebook  |  Share Twitter

 <<  Kisah Para Rasul 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran