Dual Panel1Nina TUHAN si Mada Kuasa man imam-imam, "Enda perentah man bandu:
2Pehagalah Aku arah perbahanenndu. Adi la ibegikenndu kai si Kukataken, Kukenai kam alu sumpah. Kudabuhken pe sumpahKu kempak barang-barang si ialokenndu erkiteken pendahin keimamenndu. Tuhu-tuhu nggo Kutamaken pe sumpahKu e i bas si e kerina erkiteken la atendu tutus megiken perentahKu.
3Kuukum anak-anakndu janah Kudampelken terites rubia-rubia si ipersembahkenndu e ku ayondu, jenari kam pe isarenken ku gun-gunen terites si i darat kota.
4Kenca bage ietehndu maka nggo Kubereken perentah enda man bandu, gelah perpadanenKu ras imam-imam kesusuren Lewi, la icedaken.
5I bas perpadanenKu e erpadan Aku mereken kegeluhen ras kejuah-juahen man bana, janah e nggo Kubereken man bana, gelah banci ia mehamat man bangKu. I bas paksa e nai, tuhu-tuhu kal ihamatina Aku dingen mbiar ia.
6Iajarkenna kai si benar, labo si salah. Nggeluh ia alu dame ras Aku; la saja idalankenna si mehuli, tapi pe isampatina kalak si deban gelah lanai erbahan jahat.
7Tugas imam-imam kap ngajarken pemeteh si tuhu-tuhu kerna Aku. Kalak arus lawes ndahi imam-imam mpelajari sura-surangKu, sabap ia kap suruh-suruhenKu, TUHAN si Mada Kuasa.
8Tapi genduari, kam o imam-imam, nggo nilah i bas dalan si benar nari. Pengajarenndu mabai nterem kalak papak. Nggo ilanggarndu perpadanen si Kubahan ras kam.
9Erdandanken si e genduari Kubahan ka ciga ate bangsa Israel man bandu sabap la iikutkenndu sura-surangKu, dingen erpendobahen idahndu kalak i lebe-lebe Undang-undangKu."
Kelapatuhen bangsa e man Dibata
10Ma sada bapa kin kita kerina? Ma Dibata si sada e nge si nepa kita kerina? Adi bage ngkai maka sihianati seninanta, janah ngkai maka la si ergai perpadanen si ibahan Dibata ras nini-nininta nai?
11Kalak Juda nggo ngelanggar padanna ras Dibata janah nggo ilakokenna perbahanen si ilat i Jerusalem ras i belang-belang negeri e. Nggo iliamina Rumah Pertoton si ikelengi TUHAN. Dilaki ngempoi diberu-diberu si nembah man dibata-dibata si deban.
12Ipelawes TUHAN lah i bas perpulungen bangsa Israel nari kerina kalak si ngelakoken si enda, janah ndigan pe lanai banci ikut maba persembahen man TUHAN si Mada Kuasa radu ras bangsanta.
13Enda me sada nari si ilakokenndu. Nggo gedap ibahandu batar-batar TUHAN alu iluh; tangis ras ngandung kam sabap lanai IalokenNa persembahen si ibahanndu.
14Isungkunndu ngkai maka lanai Ia nggit ngalokenca. La IalokenNa erkiteken nggo ilanggarndu padanndu man ndeharandu si iempoindu tupung kam nguda denga i ja TUHAN jadi saksi. Ia kap temanndu janah nggo ilanggarndu padanndu man bana, aminna pe nggo kam erpadan i adep-adepen Dibata maka kam tetap setia man bana.
15Ma nggo ibahan Dibata kam sada kula ras sada ukur ras ia? Kai kin sura-sura Dibata i bas si enda? Sura-SuraNa gelah ipupusndu anak-anak si tuhu-tuhu kal bangsa Dibata. Emaka inget ula sada pe kam ngelanggar padanna man ndeharana.
16"Nembeh ateKu kalak si mulihen," nina TUHAN Dibata man Israel. "Nembeh kal ateKu adi lit kam ngelakoken perbahanen si kejam e nandangi ndeharana. Inget maka tetap igelemndu padanndu maka kam tetap setia man ndeharandu."
Wari ukumen nggo ndeher
17Nggo latih iakap TUHAN ibahanndu alu cakapndu. Tapi isungkunndu, "I bas kai kin kami ngelatihi Ia?" Ilatihindu kap Ia alu ngataken, "TUHAN si Mada Kuasa erpengakap maka kerina kalak jahat mehuli nge; janah tuhu-tuhu ngena nge AteNa man kalak jahat e." Ilatihindu pe Dibata alu penungkunen, "I ja kin Dibata si bujur ningen e?"