Dual PanelKerna kematen Johanes Peridiken (Mrk 6:14-29; Luk 9:7-9)
1Paksa si e, berita kerna Jesus seh man Herodes raja i daerah Galilea.
2Emaka nina Herodes man pegawaina, "Si tuhuna Ia me Johanes Peridiken si nggo nggeluh mulihi. Perbahan si e nge maka erdahin kuasa-kuasa e i bas Ia."
3Ope si e, nggo isuruh Herodes perajuritna nangkap Johanes Peridiken dingen namakenca ku bas penjara. Bage ibahan Herodes erkiteken Herodias ndehara sembuyakna Pilipus.
4Perbahan pernah ikataken Johanes Peridiken man Herodes, "La patut iempoindu Herodias perbahan ia ndehara sembuyakndu,"
5emaka ersura-sura Herodes munuh Johanes Peridiken. Tapi mbiar Herodes man kalak Jahudi, sabap kalak Jahudi tek maka Johanes Peridiken e me kap sekalak nabi.
6Asum iperingeti wari tubuh Herodes, landek anak Herodias si diberu i lebe-lebe Herodes ras temuena. Meriah kal ukur Herodes,
7emaka erpadan ia man anak e nina, "Kubereken man bandu aminna kai pe ipindondu!"
8Kenca iajar-ajari nandena nina, "Genduari, bereken dage man bangku takal Johanes Peridiken tare talam!"
9Megi pemindonna enda, ceda ate Raja Herodes. Tapi perbahan nggo ia erpadan i lebe-lebe temuena, emaka isehkenna pemindonna e.
10Isuruhna perajuritna ku penjara nampul kerahung Johanes Peridiken.
11Emaka ibaba perajurit takal Johanes Peridiken tare talam, iberekenna man anak e, jenari ibereken anak e man nandena.
12Kenca bage reh ajar-ajar Johanes Peridiken ku penjara, ibuatna mait Johanes, jenari ikuburkenna. Kenca ikuburkenna, iberitakenna man Jesus.
Ibere man Jesus lima ribu kalak (Mrk 6:30-44; Luk 9:10-17; Yoh 6:1-14)
13Kenca ibegi Jesus berita kerna Johanes nggo mate, lawes Ia sisada-sisada tare perahu ku sada ingan si melenget. Tapi ieteh jelma si nterem ku ja Ia lawes, emaka berkat ia i bas kutana nari ngikutken Jesus arah daraten.
14Asum nusur Jesus i perahu nari, IdahNa kalak si nterem e. Mekuah AteNa, emaka IpepalemNa asakai kalak penakiten si lit i je.
15Kenca ben wari, reh ajar-AjarNa ndahi Ia, jenari nina, "Ingan enda melungun janah wari pe nggo ben. Suruhlah kalak si nterem enda lawes gelah itukurna nakanna i kuta-kuta si ndeher i jenda nari."
16Ngaloi Jesus, "Labo perlu ia lawes. Kamlah mereken nakanna."
17Nina ajar-AjarNa, "Lima ngkibul roti ras dua ikan ngenca lit i bas kami."
18Nina Jesus, "Baba ku jenda roti ras ikan e!"
19Jenari IsuruhNa kalak si nterem e kundul i bas dukut. Kenca IalokenNa roti ras ikan e, ertoto Ia ngataken bujur man Dibata, icepik-cepikna roti e, jenari IberekenNa man ajar-AjarNa gelah ielaken man kalak si nterem e.
20Kerina ia man seh besur. Kenca elah man ipepulung ajar-ajar asakai si iba, buena sepulu dua sumpit.
21Teremna kalak si man e kira-kira lima ribu kalak dilaki, janah la ikira diberu ras anak-anak.
Jesus erdalan i babo lau (Mrk 6:45-52; Yoh 6:15-21)
22Kenca man, isuruh Jesus ajar-AjarNa nangkih perahu gelah leben berkat ngepari dano. Berkat kenca ajar-AjarNa e, IsuruhNa ka kalak si nterem mulih.
23Kenca bage lawes Jesus sada uruk guna ertoto. Seh berngi Jesus i bas ingan e sisada.
24Paksa si e perahu si idatasi ajar-ajar nggo ndauh ku tengah dano janah menam-menam gedap sabap meter kal angin rembus nungsang perahu.
25Tekuak manuk reh Jesus ndahi ajar-AjarNa; erdalan Ia i babo lau.
26Asum idah ajar-ajar e Jesus erdalan i babo lau, sengget dingen mbiar kal ia. Serko ajar-ajar e nina, "Begu!"
27Tapi minter ngerana Jesus man bana nina, "Tetapkenlah ukurndu! Aku kap enda, ola kam mbiar!"
28Jenari ngaloi Petrus, "O Tuhan, adi Kam kin e, suruhlah aku erdalan i babo lau ndahi Kam."
29Nina Jesus, "Marilah!" Emaka nusur Petrus i perahu e nari, erdalan ia i babo lau ndahi Jesus.
30Tapi asum igejapna meter angin, mbiar ia, jenari menam pe ia gedap. Perbahan si e, serko ia nina, "O Tuhan sampati aku!"
31Minter itangkap Jesus tan Petrus, jenari nina, "O kam si kurang kiniteken, ngkai maka la tetap ukurndu?"
32Kenca Jesus ras Petrus nangkih perahu, minter ngadi angin si meter e.
33Jenari isembah ajar-ajar si idas perahu e Jesus nina, "Tuhu-tuhu me Kam Anak Dibata!"
Ipepalem Jesus kalak si penakiten i Genesaret (Mrk 6:53-56)
34Seh me kalak e i tepi dano i taneh Genesaret.
35I Genesaret itandai kalak Jesus, emaka iberitakenna man kerina kalak si penakiten si lit i belang-belang daerah e, jenari ibabana kalak si penakiten e man Jesus.
36Ipindokenna man Jesus gelah banci min UisNa lah gia idadap kalak si penakiten e. Kerina kalak si ndadap uis Jesus e malem i bas penakitna nari.