Alkitab Mobile SABDA
[VER] : [KARO]     [PL]  [PB] 
 <<  Matius 16 >> 

Kalak Parisi mindo tanda (Mrk 8:11-13; Luk 12:54-56)

1Piga-piga kalak Parisi ras kalak Saduki reh ncubai Jesus, emaka ipindona gelah icidahken Jesus tanda sengget mbuktikenca maka Dibata si nuruh Ia.

2Tapi ngaloi Jesus, "Kenca ben wari, adi megara langit, ikatakenndu, 'Berngi enda ugapa pe salang kal.'

3Tapi adi erpagi-pagi megara langit janah embun mekapal, ikatakenndu, 'Sendah ugapa pe udan me.' Ietehndu kerna musim arah rupa langit, tapi la iangkandu kerna tanda-tanda jaman.

4Andiko, jahatna kalak si genduari enda! Ipindondu tanda man bangKu. Labo Kubahan! Seakatan tanda Nabi Juna ngenca." Jenari lawes Jesus, ItadingkenNa kalak Parisi ras kalak Saduki e.

Kerna ragi kalak Parisi ras kalak Saduki (Mrk 8:14-21)

5Asum Jesus ras ajar-AjarNa ngepari dano, lupa ajar-AjarNa maba roti.

6Nina Jesus man ajar-AjarNa, "Metenget dingen erjaga-jagalah kam nandangi ragi kalak Parisi ras kalak Saduki."

7Rukur ajar-AjarNa e, jenari nina sapih-sapih ia, "Perbahan lupa kita maba roti maka bage nina."

8Tapi ieteh Jesus kai si icakapken ajar-ajar e, emaka nina, "Ngkai maka kerna la lit roti icakapkenndu? Kurang kal tuhu kinitekenndu!

9Langa kin lalap iangkandu? La kin ingetndu asum Kucepik-cepik roti si lima ngkibul guna lima ribu kalak? Piga sumpit asum si e ipepulung ibana?

10Bage pe kerna roti si pitu ngkibul guna empat ribu kalak, piga sumpit asum si e ipepulung ibana?

11Kuga maka la iangkandu, maka si Kukataken man bandu e labo kerna roti? Metengetlah kam nandangi ragi kalak Parisi ras kalak Saduki!"

12Kenca bage maka nggo iangka ajar-ajar maka maksud Jesus labo metenget nandangi ragi si lit i bas roti, tapi metenget nandangi ajaren kalak Parisi ras kalak Saduki.

Pengakun Petrus kerna Jesus (Mrk 8:27-30; Luk 9:18-21)

13Kenca seh Jesus i daerah Kesarea Pilipi, nungkun Ia man ajar-AjarNa nina, "Nina kalak, ise nge Anak Manusia si isuruh Dibata e?"

14Erjabap ajar-AjarNa, "Lit ngatakenca maka Kam kap Johanes Peridiken. Lit ka ngatakenca Elia, bage pe lit ngatakenca maka Kam Jeremia ntah pe sekalak i bas nabi-nabi si deban."

15Isungkun Jesus ka ajar-AjarNa, "Tapi iakapndu ise Aku enda?"

16Erjabap Simon Petrus, "Kam kap Si Engkelini, Raja si ipadanken Dibata; Kam kap Anak Dibata si Nggeluh."

17Ngaloi Jesus, "O Simon, anak Jona, malem tuhu-tuhu atendu, sabap labo manusia ngataken si enda man bandu, tapi BapangKu si i Surga kap.

18Janah Kukataken pe man bandu: Kam kap batu, Petrus, janah i babo batu palas enda me Kupajekken perpulungenKu, si la tertaluken aminna pe alu kinirajan kematen.

19Kubereken me man bandu kunci Kinirajan Surga. Kai si irakutindu i doni enda, i Surga pe nggo kap irakuti; kai si iosarindu i bas doni enda, i Surga pe nggo kap iosari."

20Jenari ikataken Jesus man ajar-AjarNa gelah ola iturikenna man ise pe maka Ia kap Singkelini si ipadanken Dibata.

Ituriken Jesus kerna kiniseran ras KematenNa (Mrk 8:31-9:1; Luk 9:22-27)

21I bas paksa si e nari mulai me ituriken Jesus alu jelas man ajar-AjarNa nina, "Aku la banci lang lawes ku Jerusalem, la banci lang Kunanami erbage-bage kiniseran i bas peminpin-peminpin Jahudi, imam-imam si mbelin ras i bas guru-guru agama Jahudi nari. Aku ibunuh tapi i bas wari si peteluken ipekeke ka i bas si mate nari."

22Tapi iawin Petrus me Jesus, emaka ipandangna Ia nina, "Mbera-mbera ipedauh Dibata si e i bas Kam nari o Tuhan! Labo banci jadi e man BaNdu!"

23Itulihken Jesus, jenari nina man Petrus, "Laweslah i bas Aku nari, o, Iblis! Isidingindu kap Aku. Perukurenndu perukuren manusia, labo perukuren Dibata."

24Jenari nina Jesus man ajar-AjarNa, "Ise atena ikut ras Aku arus ipersilahangna bana, ipersanna kayu persilangna jenari iikutkenna Aku.

25Sabap ise mpertahanken kegeluhenna, bene kap kegeluhenna e, tapi ise kebenen kegeluhenna erdandanken Aku, ialokenna me kegeluhenna e.

26Lit kin gunana man sekalak jelma, adi man bana gia kerina erta-erta doni enda tapi bene kegeluhenna si tuhu-tuhu? Tentu lang! Kai pe labo banci ibahan manusia gancih kesahna.

27Sabap reh me Anak Manusia si isuruh Dibata alu kemulian si mbelin dingen iarakken malekat-malekat Dibata. I bas paksa e pagi IbalasNa man sekalak-sekalak sue ras kai si nggo ibahanna.

28Ingetlah! I bas si pulung enda lit piga-piga kalak si langa mate ope denga idahna Anak Manusia si isuruh Dibata i bas KinirajanNa."


  Share Facebook  |  Share Twitter

 <<  Matius 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel