Dual PanelIse si mbelinna? (Mrk 9:33-37; Luk 9:46-48)
1Paksa si e reh ajar-ajar Jesus ndeheri Ia, jenari nina, "Ise si mbelinna i bas Kinirajan Surga?"
2Idilo Jesus sekalak danak-danak, IsuruhNa tedis i lebe-lebe ajar-ajar,
3jenari nina, "Ingetlah! Adi la kin kam tuhu-tuhu robah dingen bali ras danak-danak, asa ndigan pe kam labo banci bengket ku bas Kinirajan Surga.
4Si mbelinna i bas Kinirajan Surga eme kalak si mpeteruk bana bali ras anak-anak enda.
5Bage pe ise ngaloken danak-danak si bagenda i bas gelarKu, ialokenna kap Aku pe."
Si erbahanca dosa (Mrk 9:42-48; Luk 17:1-2)
6"Ise erbahanca maka sekalak i bas si kitik enda tondel ukurna erkiniteken man bangKu, ulin irakutken batu penggilingen ku kerahungna, jenari igedapken ia ku bas lawit.
7Cilaka kal doni enda sabap erbage-bage i je si erbahanca kalak erdosa! Tuhu la tersilahken si enda kerina tapi cilaka kal kalak si erbahanca dosa e jadi!
8Adi tanndu ntah nahendu erbahanca kam erdosa, tekteklah e jenari ambekken! Ulin kam nggeluh sada tan ntah sada nahe asangken dua tanndu ras dua nahendu tapi iambekkenndu ku bas api si la ernimpet-nimpet.
9Bage pe adi matandu erbahanca kam erdosa, pulditken ras ambekkenlah matandu e. Ulin kam nggeluh sada mata asangken dua matandu tapi iambekkenndu ku bas api neraka."
Perumpaman kerna biri-biri si bene (Luk 15:3-7)
10"Ingetlah, ola la meherga iakapndu kalak si kitik enda. Sabap lit kap malekatna si katawari pe natap ku ayo BapangKu si i Surga.
11(Sabap Anak Manusia si isuruh Dibata reh nelamatken si nggo papak!)
12Kuga kin pengakapndu? Adi lit sekalak lit seratus biri-birina, jenari bene sada, kuga nge ibahanna? Tentu itadingkenna biri-birina si siwah pulu siwah e i mbalmbal, jenari lawes ia ndarami biri-biri si bene e.
13Kenca idatna, tentu riahen ukurna kerna biri-biri si sada e asangken biri-biri si siwah pulu siwah si la papak.
14Bage pe Dibata, Bapandu, labo AteNa sekalak pe danak-danak enda papak."
Kerna ngajarken senina
15"Adi ersalah seninandu man bandu, katakenlah man bana salahna e, asum kam dua-dua. Adi erkadiola ia, nggo kap idatndu ia mulihi.
16Tapi adi la kam ibegikenna, babalah temanndu sekalak ntah dua kalak gelah bagi tersurat i bas Pustaka Si Badia: 'Tep-tep pengadun nggo sah adi lit dua ntah telu kalak saksi.'
17Tapi adi teman-temanndu e pe la ibegikenna, sehkenlah persoalen e man perpulungen. Adi perpulungen e pe la ibegikenna anggap sajalah ia bali ras kalak perbegu ntah pe kalak si muat cuke.
18Emaka Kukataken man bandu kerina: Kai si irakutindu i doni enda, nggo kap irakuti i surga; kai si iosarindu i doni enda nggo kap mosar i surga.
19Tole Kukataken man bandu: Adi lit i bas kam dua kalak i doni enda ersada ukur kerna kai si ipindondu i bas pertotonndu man Dibata, tentu ibereken BapangKu si i Surga nge pemindonndu e.
20Sabap i ja lit dua ntah telu kalak pulung i bas gelarKu, Aku lit i tengah-tengahna."
Perumpaman kerna ngalemi kalak si ersalah
21Jenari reh Petrus ndeheri Jesus nina, "O Tuhan, piga kali banci kualemi seninangku si ersalah man bangku? Seh pitu kali?"
22Erjabap Jesus, "Lang, labo seh pitu kali, tapi pitu puluh kali pitu kali.
23Sabap Kinirajan Surga bali kap ras sekalak raja si erkira atena ras juak-juakna.
24Kenca ibenakenna perkiran e, isuruhna ngadap sekalak juak-juak si rutang erjuta-juta.
25Tapi perbahan la ia ngasup nggalari utangna e, emaka isuruh raja gelah ia ndayaken dirina ras ndeharana bage pe anak-anakna bage ka pe kerina erta-ertana guna nggalari utangna e.
26Tapi erjimpuh juak-juak e i lebe-lebe raja, jenari nina, 'Sabar kam nimaisa tuan, kugalari nge pagi utangku e kerina.'
27Mekuah ate raja e, emaka isasapkenna utang juak-juak e jenari isuruhna mulih.
28Asum juak-juak e erdalan mulih, jumpa ia ras sekalak juak-juak si deban si rutang man bana piga-piga ribu. Itangkapna dingen icekakna temanna e, jenari nina, 'Galari utangndu.'
29Erjimpuh temanna e i lebe-lebena, jenari nina, 'Sabar kam nimaisa teman, kugalari nge pagi utangku e kerina.'
30Tapi la ia sabar; itamakenna temanna e ku bas penjara seh bali utangna.
31Ngidah si enda ceda ate teman-temanna si deban, emaka ipesehna man tuanna.
32Emaka isuruh raja me juak-juak ndai ngadap, jenari nina, 'Kam kalak jahat! Erdandanken pemindonndu, utangndu si bage buena nggo kusasapken.
33Kam pe aturna mekuah atendu temanndu sapih juak-juak bagi mekuah ateku kam.'
34Merawa-rawa kal raja e, jenari itamakenna juak-juak e ku bas penjara seh igalarina kerina utangna."
35Tole nina, "Bage ka nge ibahan BapangKu si i Surga man bandu kerina adi la kin ialemindu seninandu terus ku bas pusuhndu."