Matius 3 (KARO)

Khotbah Johanes Peridiken (Mrk 1:1-8; Luk 3:1-18; Yoh 1:19-28)

1Paksa e multak Johanes Peridiken i padang pasir Judea, mulai me ia erkhotbah i taneh mesawang e.

2Nina Johanes Peridiken, "Jeralah i bas dosa-dosandu nari, sabap Kinirajan Surga nggo ndeher!"

3Johanes Peridiken enda me maksud Nabi Jesaya sanga ikatakenna, "Lit sekalak erlebuh i taneh mesawang 'Sikapkenlah dalan Tuhan. Pepinter dalan man BaNa!'"

4Paken Johanes Peridiken e me: jubahna i bas mbulu unta nari, genditna i bas kuling-kuling nari. Nakanna: labang ras tengguli kerangen.

5Rehen ndahi ia kalak si ringan i Jerusalem, ras kerina kalak si ringan i daerah Judea bage pe kerina kalak si ringan i daerah sekitar Lau Jordan.

6Kenca kalak si nterem ngakuken dosana, emaka iperidiken Johanes i Lau Jordan.

7Tapi asum idah Johanes Peridiken nterem kalak Parisi ras kalak Saduki reh ndahi ia guna iperidiken nina Johanes Peridiken man bana, "O kam kesusuren nipe -- ise ngatakenca man bandu maka banci kam pulah i bas ukumen Dibata si reh pagi?

8Tuduhken arah perbahanenndu tandana kam nggo jera.

9Ola iakapndu banci kam ialemi alu ngataken, 'Kesusuren Abraham kap kami.' Kukataken man bandu Dibata ngasup njadiken batu-batu enda jadi kesusuren Abraham!

10Kapak nggo sikap nektek batang kayu. Kerina batang kayu si la mehuli buahna itektek jenari iambekken ku api.

11Tandana kam nggo jera, kuperidiken kam alu lau. Tapi reh me arah pudingku si lebih erkuasa asangken aku. Ngosari nali sepatuna pe la aku metunggung. Ia pagi mperidiken kam alu Kesah Si Badia ras api.

12NdiruNa nggo sikap i bas TanNa guna miari. IpepulungNa page ku bas lumbung, tapi lapungna ItamakenNa ku bas api si la ernimpet-nimpet."

Jesus iperidiken (Mrk 1:9-11; Luk 3:21-22)

13Paksa e reh Jesus i Galilea nari ku Lau Jordan. Idahina Johanes Peridiken, jenari ipindona gelah Johanes mperidiken Ia.

14Tapi Johanes Peridiken la nggit mperidikenca nina, "Aku nge aturenna IperidikenNdu; enda Kam ka ngadap man bangku!"

15Ngaloi Jesus nina, "Labo dalih. Sabap alu bage sidalanken kai si ngena ate Dibata!"

16Emaka Johanes pe setuju meridiken Jesus. Kenca Jesus iperidikenna, ndarat Ia i bas lau nari. Rempet talang langit janah idahna Kesah Dibata nusur bagi nderapati ku BaboNa.

17Jenari terbegi sora i surga nari ngatakenca nina, "Enda me Anakku si Kukelengi. Ia me si ngena ateKu."

<< Matius 3 >>