Alkitab Mobile SABDA
[VER] : [KARO]     [PL]  [PB] 
 <<  Matius 4 >> 

Percuban man Jesus (Mrk 1:12-13; Luk 4:1-13)

1Kenca bage Kesah Dibata mabai Jesus ku gurun pasir guna icubai Iblis.

2Kenca empat puluh wari empat puluh berngi Jesus la man IgejapNa melihe.

3Emaka reh Iblis ncubai Ia nina, "Erkiteken Kam Anak Dibata salihken dage batu enda jadi roti."

4Ngaloi Jesus nina, "Lit kap tersurat i bas Pustaka Si Badia: Labo alu roti saja manusia enggeluh, tapi arah tep-tep kata si ibelasken Dibata."

5Jenari ibabai Iblis me Jesus ku Jerusalem janah isuruhna Ia tedis i babo anjung-anjung Rumah Pertoton.

6Jenari nina man Jesus, "Adi Anak Dibata kin kam, dabuhken man BaNdu ku teruh, sabap lit tersurat i bas Pustaka Si Badia bagenda: 'Isuruh Dibata kap malekat-MalekatNa reh njagai Kam, itatangna nge Kam alu tanna gelah NaheNdu pe la terantuk ku batu.'"

7Ngaloi Jesus, "Tapi lit tersurat i bas Pustaka Si Badia 'Ola cubai Tuhan Dibatandu.'"

8Ibabai Iblis e ka Jesus ku deleng si seh kal ganjangna. Jenari ituduhkenna man Jesus kerina kerajan doni enda ras kinibayakenna.

9Nina Iblis e man Jesus, "Kerina kerajan doni enda ras kiniulinna kubereken man BaNdu, adi nggit Kam erjimpuh nembah man bangku."

10Emaka ngaloi Jesus nina, "Laweslah Iblis! Lit kap tersurat i bas Pustaka Si Badia: 'Sembahlah Tuhan Dibatandu, janah Ia saja ngenca patut man sembahen!'"

11Kedungenna itadingken Iblis e Jesus; emaka reh malekat-malekat nampati Ia.

Jesus menaken DahinNa i Galilea

12Kenca ibegi Jesus berita maka Johanes Peridiken nggo ipenjaraken, lawes Ia ku Galilea.

13ItadingkenNa Nasaret emaka lawes Ia ringan i Kapernaum. Kapernaum eme sada kuta i tepi Dano Galilea, daerah Sebulon ras Naptali.

14Alu bage seh me kai si ikataken Nabi Jesaya nina,

15"Taneh Sebulon ras taneh Naptali, dalan kempak lawit, i lepar Lau Jordan, daerah Galilea si iingani kalak si labo bangsa Jahudi!

16Kalak si ringan i bas gelap, nggo ngidah terang si mbelin e! Man kalak si ringan i bas taneh si ikuasai kematen nggo mbincar terang e!"

17I bas paksa si e nari me ibenaken Jesus ngajar nina, "Jeralah kam i bas dosandu nari, sabap Kinirajan Surga nggo reh deherna."

Jesus ndilo empat kalak penjala nurung (Mrk 1:16-20; Luk 5:1-11)

18Asum Jesus erdalan-dalan i tepi Dano Galilea, IdahNa dua kalak si sembuyak sangana njala nurung. Si dua kalak e, eme Simon (igelari Petrus) ras Andereas.

19Nina Jesus man bana, "Mari, ikutken Aku, maka Kuajari kam ndilo kalak si deban jadi ajar-ajarKu."

20Minter itadingken kalak e jalana jenari IkutkenNa Jesus.

21Asum iterusken Jesus erdalan, IdahNa ka dua kalak si sembuyak. Si dua kalak e, eme anak Sebedeus, gelarna Jakup ras Johanes. Kalak enda i datas perahu ras bapana sangana mpesikap jala. Asum idilo Jesus ia duana,

22minter itadingkenna perahu e bage pe itadingkenna bapana. Jenari ikutkenna Jesus.

Jesus ngajar, erkhotbah dingen pepalem kalak si penakiten (Luk 6:17-19)

23Isiari Jesus kerina daerah Galilea. Ngajar Ia i bas rumah-rumah persembahen dingen IberitakenNa Berita Si Mehuli kerna Kinirajan Surga. IpepalemNa kalak cacat ras kalak penakiten bage pe IpedaratNa si la mehuli i bas daging kalak e nari.

24Perbahanen Jesus e mbar beritana ku belang-belang negeri Siria seh maka nterem kalak ndahi Jesus. Itaruhken kalak man BaNa kerina si penakiten. Erbage-bage penakit kalak si reh e; lit si setanen, lit si tabun, janah lit si pang-pangen. Kerina ipepalem Jesus.

25Emaka nterem kal kalak si ngikut-ngikut Jesus; lit i Galilea nari, i Dekapolis nari, i Jerusalem nari; i Judea nari bage pe i daerah lepar Lau Jordan nari.


  Share Facebook  |  Share Twitter

 <<  Matius 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel