Alkitab Mobile SABDA
[VER] : [KARO]     [PL]  [PB] 
 <<  Matius 6 >> 

Kerna mere

1"Ingetlah! Ola ilakokenndu aturen agamandu i lebe-lebe kalak si nterem alu tujun gelah idah kalak. Sabap adi bage ibahanndu la kam dat upah i bas Bapandu si i Surga.

2Dage, adi mere kam man kalak musil, ola gejek-gejekken bagi kalak si pekulah-kulah i rumah-rumah persembahen ntah pe i tengah dalan. Kalak si pekulah-kulah e tujunna gelah ndatken pujin. Inget! Ia lanai ngaloken upah i bas Dibata nari.

3Tapi adi mere kam man kalak musil, bahanlah maka temanndu meriah pe la meteh.

4Labo perlu igejek-gejekken i bas kam mere e. Alu bage, Bapandu si ngidah perbahanenndu e mereken upah man bandu."

Kerna ertoto (Luk 11:2-4)

5"Adi ertoto kam, ola bagi kalak si pekulah-kulah. Kalak si pekulah-kulah e megati tedis ertoto i rumah-rumah persembahen bage pe i simpang-simpang gelah iidah kalak. Inget! Ia lanai ngaloken upah i bas Dibata nari.

6Tapi adi ertoto atendu, bengketlah ku bas kamarndu, eruk pintun jenari ertotolah man Dibata si la iidah e. Dibata si ngidah perbahanenndu e mereken upah man bandu.

7Bage pe adi ertoto kam ola mulih-ulih bagi kalak si la nandai Tuhan. Ia erpengakap maka adi gedang pertotonna ibegiken Dibata kap.

8Tapi kam, ola bage. Sabap ope denga ipindondu, nggo leben ieteh Bapandu kai si iperlukenndu.

9Dage, bagendalah nindu ertoto, O Bapa kami si i Surga. Kam kap Dibata Si Tonggal.

10Kam kap Raja kami. Kam kap si erkuasa i doni janah sura-SuraNdu seh kerina bali ras i surga.

11Bereken min man kami nakan cukup i bas wari si sendah enda.

12Alemi min salah kami bagi ialemi kami salah kalak kempak kami.

13Ola bere bene kiniteken kami tupung ikenai percuban, tapi pulahi min kami i bas si jahat nari. (Sabap Kam kap Raja si Simada Kuasa ras Kemulian seh si rasa lalap. Amin.)

14Adi ialemindu salah kalak, salahndu pe ialemi Bapandu si i Surga ka nge.

15Tapi adi la ialemindu salah kalak, salahndu pe la ialemi Bapandu."

Kerna erpuasa

16"Adi erpuasa kam, ola peberjut-berjut ayondu bagi kalak pekulah-kulah. Kalak pekulah-kulah iperberjut-berjutna ayona bagi kalak melihe, gelah ieteh kalak ia erpuasa. Inget! Ia lanai ngaloken upah i bas Dibata nari.

17Tapi adi erpuasa kam, erduhaplah jenari suri bukndu,

18gelah la ieteh kalak kam erpuasa. Tapi Bapandu si ngidah perbahanenndu e, Ia nge si mereken upahndu."

Bayak i lebe-lebe Dibata (Luk 12:33-34)

19"Ola pepulung erta-erta i doni enda man bandu. Sabap erta-erta doni banci ipan nget-nget, tembesin dingen itangko pinangko.

20Tapi pepulunglah erta-erta i Surga. Sabap i Surga la banci ipan nget-nget, tembesin dingen itangko pinangko.

21Sabap i ja ertandu, i je pe ukurndu."

Terang kula (Luk 11:34-36)

22"Mata kap tendang kula. Adi terang pengidahndu, kulandu pe terang.

23Tapi adi gelap pengidahndu kulandu pe gelap. Dage, adi tendang si lit i bas kam gelap, seh nari kal nge gelapna!"

Dibata ras kebayaken (Luk 16:13, 12:22-31)

24"Ise pe labo ngasup ngikutken dua tuan. Sabap adi dua tuanna, la banci lang sekalak keleng atena janah sekalak nari nembeh atena; ntah pe mejingkat ia nandangi sekalak tuan, tapi tuan si sada nari la diatena pe. Labo kam ngasup erdahin guna Dibata adi erdahin ka kin kam guna duit.

25Perbahan si e, ola aru atendu kerna nakan ras inemen si iperlukenndu i bas geluhndu ntah kerna uis si man pakenndu. Ergan nge kesah asa nakan janah ergan nge kula asa uis.

26Perdiatekenlah perik-perik kabang. Labo ia merdang, labo ia rani, labo mpepulung persedian, tapi man nge ia ibahan BapaNdu si i Surga. Ergan nge kam asa perik-perik e!

27Sekalak pe kam labo ngasup nambahi umurndu alu aru ate e!

28Ngkai maka aru atendu kerna uis si man pakenndu? Perdiatekenlah bunga ncole si turah i mbal-mbal. Bunga e la erdahin dingen la ertenun.

29Tapi Raja Salomo si bayak nai pe la lit pakenna bagi bunga ncole e jilena.

30Dage ingetlah! O kalak si kurang kiniteken! Adi dukut-dukut si sendah nggeluh pagi iambekken ku bas api pe bage jilena ibahan Dibata, apai ka kam!

31Emaka ola aru atendu ntah kai pagi ipanndu, ntah kai pagi inemndu bage pe ntah kai pagi uisndu.

32(Kalak si la nandai Tuhan nge maka bage perukurenna). Kam ula bage, sabap ieteh Dibata nge maka kerina enda perlu man bandu.

33Tapi si pentingna kal, daramilah lebe KinirajanNa, janah dalankenlah si ngena AteNa, maka IcukupiNa kai si perlu man bandu.

34Emaka ola aru atendu kerna wari si pepagi, sabap pepagi lit denga ka nge si man ndelenken. Labo pada itambahi kiniseran si sendah alu kiniseran pepagi."


  Share Facebook  |  Share Twitter

 <<  Matius 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel