Alkitab Mobile SABDA
[VER] : [KARO]     [PL]  [PB] 
 <<  Markus 15 >> 

Jesus i lebe-lebe Pilatus (Mat 27:1-2, 11-14; Luk 23:1-5; Yoh 18:28-38)

1Erpagi-pagi si lampas nggo ersada arih i bas imam-imam si mbelin, peminpin-peminpin Jahudi, guru-guru agama ras kerina anggota sidang, janah ibahanna rencana. Igarikenna Jesus jenari ibabana ngadap man Pilatus ras ngendeskenca man Pilatus.

2Nungkun Pilatus man Jesus nina, "Kam kin raja kalak Jahudi?" Erjabap Jesus, "Bage me nindu!"

3Jenari erbage-bage tuduhen ibahan imam-imam si mbelin nandangi Jesus.

4Emaka nungkun ka Pilatus man Jesus nina, "La kam ngasup njabapsa? Kuga buena tuduhen-tuduhen kalak enda man BaNdu!"

5Tapi sitik pe la ngaloi Jesus, emaka mamang kal ate Pilatus.

Jesus iukum mate (Mat 27:15-26; Luk 23:13-25; Yoh 18:39-19:16)

6Nggo jadi kebiasan maka i bas tep-tep Wari Raya Paskah ibebasken Pilatus sekalak tahanen, e me si ipindo jelma si nterem.

7Paksa si e lit me sekalak gelarna Barabas ipenjaraken ras pemberontak-pemberontak si deban. Kalak enda kerina munuh sanga ia berontak ngelawan pemerentah.

8Asum kalak si nterem reh mindo man Pilatus gelah kebiasan si gelgel ilakoken.

9Emaka ngaloi Pilatus alu penungkunen nina, "Atendu kin maka raja kalak Jahudi enda kubebasken man bandu?"

10Si tuhuna ieteh Pilatus nge maka iendesken imam-imam si mbelin Jesus e man bana perbahan cian ate imam-imam si mbelin nandangi Jesus.

11Tapi iajar-ajari imam si mbelin kalak si nterem mindo man Pilatus gelah Barabaslah ibebasken.

12Ngaloi ka Pilatus man kalak si nterem nina, "Adi bage, kai dage kubahan nandangi kalak enda, si ikatakenndu raja kalak Jahudi e?"

13Alu sora si megang ngaloi kalak ndai nina, "Pakukenlah Ia ku kayu persilang!"

14Jenari nina Pilatus man kalak e, "Kejahaten kai kin nggo IbahanNa?" La ibegiken kalak ndai penungkunen enda, tapi reh gangna sorana nina, "Pakukenlah Ia ku kayu persilang!"

15Perbahan ate Pilatus muat ukur kalak si nterem, emaka ipulahina Barabas man kalak si nterem. Tapi Jesus isuruhna iligas perajurit-perajurit jenari iendeskenna gelah ipakuken ku kayu persilang.

Jesus igombang-gombangi perajurit-perajurit (Mat 27:27-31; Yoh 19:2-3)

16Emaka ibaba perajurit-perajurit me Jesus ku bas istana gubernur, jenari idilona pulung kerina perajurit-perajurit si deban.

17Ipakekenna uis megara man Jesus. Ibayuna tengkuluk duri, jenari itamakenna ku takal Jesus.

18Kenca bage "ihormati" na Jesus nina, "Tabi, o raja kalak Jahudi!"

19Jenari ipaluna takal Jesus alu ciken, icidurina, janah erjimpuh ia nembah man Jesus.

20Kenca puas akapna kerina nggombang-nggombangi Jesus, itangtangina ka uis si megara e. Ipakekenna mulihi uis Jesus si gelgel. Jenari ibabana Jesus ndarat gelah ipakuken.

Jesus ipakuken ku kayu persilang (Mat 27:32-44; Luk 23:26-43; Yoh 19:17-27)

21I tengah dalan jumpa kalak ndai ras sekalak dilaki gelarna Simon. Simon e rehna i kuta nari. Ia me ipaksa perajurit-perajurit mersan kayu persilang Jesus. (Simon enda kalak Kireni bapa Alexander ras Rupus.)

22Ibaba perajurit-perajurit ndai Jesus ku sada ingan si igelari Golgota, ertina, "Ingan takal-takal".

23I je ibereken man Jesus anggur si icampur ras mur. Tapi Jesus la nggit nginemsa.

24Kenca bage ipakukenna Jesus ku kayu persilang jenari itikam tandukkenna uis Jesus i bas ia erbagi.

25Jesus ipakuken ku kayu persilang jam siwah erpagi-pagi.

26I datas kayu silang itulis i je, "Raja Kalak Jahudi".

27Raduken ras Jesus lit ka pe dua kalak pengerampok ipakuken kalak ndai. Sekalak arah KemuhenNa, sekalak arah KawesNa.

28(Alu bage nggo seh isi Pustaka Si Badia e me, "Ia ipeseri ras kalak jahat".)

29Kalak si mentas arah e ncekuraki Ia janahna ngupir nina, "Oh! AteNdu ngeruntuhken Rumah Pertoton janah majekkenca ka i bas telu wari.

30Genduari nusurkenlah janah pulahilah BaNdu!"

31Bage ka pe imam-imam si mbelin ras guru-guru agama isindir-sindirna Jesus nina sapih-sapih ia, "Kalak si deban IsampatiNa, tapi DiriNa jine la TersampatiNa.

32Adi Ia kin raja Israel, Raja Penampat si ipadanken e, nusur dage Ia i bas kayu persilang e nari, gelah kami tek man BaNa." Perampok si dua kalak si ipakuken ras Jesus e pe isindirna ka nge Jesus.

Kematen Jesus (Mat 27:45-56; Luk 23:44-49; Yoh 19:28-30)

33Jam sepulu dua ciger seh jam telu, gelap kerina daerah e.

34Jam telu serko Jesus alu megang, "Eloi, Eloi, lama sabakhtani!" Ertina, "O DibatangKu, o DibatangKu, ngkai maka Aku itadingken Kam?"

35Piga-piga kalak si tedis i je megi Jesus serko emaka nina, "Begikenlah, idilona Elia."

36Emaka minter kiam sekalak encelupken bunga karang ku bas anggur si macem, jenari icucukkenna ku ujung galah. Kenca bage idudurkenna gelah icecap Jesus. Nina, "Sitimai cuba, ntah reh kin Elia pesusur Ia i datas kayu persilang e nari!"

37Emaka nderkuh Jesus alu megang SoraNa jenari keri KesahNa.

38Paksa e pe merigat kire-kire Rumah Pertoton; erbelah dua das nari ku teruh.

39Kepala perajurit si tedis i je ngidah Jesus nderkuh seh mate, emaka nina, "Tuhu-tuhu Ia Anak Dibata."

40Lit piga-piga diberu natap i dauh-dauh nari. I je pe Maria Magdalena, Salome, ras Maria nande Jakup si kitik ras Joses.

41Kalak enda nggo ngikutken Jesus janah nampati Ia sanga i Galilea. Nterem denga i je diberu-diberu si deban si ras Jesus reh ku Jerusalem.

Jesus ikuburken (Mat 27:57-61; Luk 23:50-56; Yoh 19:38-42)

42Ope seh jam wari Sabat, reh me Jusup kalak Arimatea. Ia sekalak anggota Pengadilen Agama si ihamati. Ia pe sekalak si tertima-tima nandangi kerehen Kinirajan Dibata. Sendah enda wari Persikapen (eme wari ope wari Sabat). Emaka alu la biar-biaren Jusup pang ngadap man Pilatus mindo mait Jesus.

43(Mrk 15:42)

44Mamang ate Pilatus, asum ibegina berita kerna Jesus nggo mate. Emaka idilona kepala perajurit jenari isungkunna ntah tuhu kin Jesus nggo mate.

45Kenca ibegina keterangen kepala perajurit e, emaka ipelepasna Jusup muat mait Jesus e.

46Itukur Jusup dagangen si meherga, ipesusurna mait Jesus jenari ibalutina alu e. Kenca bage itamakenna mait e ku bas sada kuburen si itukak i bas lingling batu. Emaka igulingkenna sada batu si mbelin nutupi kubur e.

47Idah Maria Magdalena ras Maria nande Joses i ja Jesus ikuburken.


  Share Facebook  |  Share Twitter

 <<  Markus 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran