Dual PanelPertoton guna kemenangen
1Masmur Daud.
2Dibatalah si mperdiateken kam tupung i bas kiniseran! Dibata nu Jakuplah si ngkawali kam!
3IsampatiNalah kam i bas RumahNa si badia nari, IberekenNalah penampat i Deleng Sion nari.
4IalokenNalah kerina persembahenndu, dingen merim IakapNa persembahen tutungenndu.
5IsehkenNalah kerina sura-surandu, dingen sangap kam i bas si irencanakenndu.
6Gelah ersurak kami perbahan riahna, dingen erbahan kerja meriah kerna kemenangenndu, alu rende muji Dibata. Iperdiateken Dibatalah kerina pemindonndu.
7Genduari kueteh maka TUHAN si mereken kemenangen man raja PilihenNa, i Surga nari TUHAN ngaloi ia; alu kuasa TUHAN IberekenNa man raja kemenangen si mbelin.
8Lit kalak si ernalemken gereta perangna, lit ka si ernalem man kudana. Tapi kita la bage; kita ernalem man gegeh TUHAN Dibata.
9Kalak si ernalem man gereta perang ras kudana, la banci la terantuk dingen guling. Tapi kita si ernalem man TUHAN, kekelah dingen tedis paguh. <20:10> - O TUHAN, bereken kemenangen man raja, tupung kami erlebuh, begikenlah.