Dual PanelPertoton kalak si la ersalah
1I bas Daud nari. Bereken min man bangku keadilen, o TUHAN, sabap si mehuli nge kulakoken. Aku erpengarapen man BaNdu saja TUHAN, la sitik pe ukurku monce-once.
2Ujilah aku, pepayolah, o TUHAN, pereksalah sura-sura ras perukurenku.
3Keleng AteNdu, tetap ngarak-ngarak aku, janah aku tetap patuh man BaNdu.
4Aku la nggit erteman ras kalak penipu, ras kalak si pekulah-kulah la aku nggit rembak.
5Nembeh ateku man kalak jahat, kalak penipu kusilahken.
6O TUHAN, kuburihi tanku tanda aku la ersalah, dingen ikut ngkeleweti batar-BatarNdu lako nembah man BaNdu,
7janah ngendeken ende-enden pengataken bujur dingen meritaken kerna PersembahenNdu si mejin.
8Ngena ateku rumah InganNdu tading o TUHAN, InganNdu tading i bas kemulian.
9Ula bunuh aku radu ras kalak perdosa, ula buat kesahku radu ras kalak pemunuh,
10si katawari pe erbahan jahat, dingen katawari pe nggit mereken sogok.
11Tapi kulakoken nge kai si benar, o TUHAN, mekuah min AteNdu, pulahi aku.
12Emaka terkawal aku, la kena cilaka, kupuji TUHAN i bas perpulungen BangsaNa.