Dual PanelPertoton muji TUHAN
1I bas Daud nari. TUHAN kap terang kegeluhenku Ia kap si ngkelini aku la lit si kubiarken TUHAN kap bentengku, emaka la aku gentar.
2Tupung kalak jahat nerang aku dingen ibunuhna atena aku, tertuktuk ia jenari guling.
3Aminna pe aku ikepung tentera si nterem, la mbiar aku. Aminna pe musuh reh ngelawan aku, aku tetap erpengarapen man Dibata.
4Sada ngenca pemindonku man TUHAN, sada ngenca sura-surangku eme ringan i bas Rumah TUHAN kidekah geluhku guna nggejapken kiniulin TUHAN dingen mindo gelah itegu-TeguNa.
5Tupung paksa kesusahen TUHAN si ngkawali aku, IbunikenNa aku i bas RumahNa, IangkatNa aku ku das deleng batu.
6Genduari menang aku naluken imbang-imbang i sekelewetku; emaka alu surak-surak si meriah kupersembahken persembahen pengataken bujur i bas RumahNa. Jenari rende aku muji TUHAN.
7O TUHAN, begiken min tupung aku erlebuh man BaNdu, mekuah min AteNdu dingen aloi min aku!
8NiNdu, "Mari sembah Aku." Ningku, "Minter aku reh, TUHAN."
9Ula Kam cebuni man bangku, ula Kam nembeh man bangku aku suruh-SuruhenNdu, ula min aku IpelawesNdu. Sabap Kam kap penampatku, ula tadingken aku. O Dibata, Kam kap si ngkeliniku.
10Aminna pe itadingken nande ras bapangku aku tapi TUHAN tetap si pekena-kena aku.
11O TUHAN, ajari aku nggeluh rikutken PeratenNdu arah dalan si salang babai min aku sabap nterem kap imbangku.
12Ula endesken aku kempak musuh-musuhku, si nerang aku alu ngancam dingen alu saksi-saksi perguah.
13Tek aku maka kunanami me kiniulin TUHAN i bas kegeluhen enda.
14Ernalemlah man TUHAN. Teklah, tetapkenlah ukurndu. Ernalemlah man TUHAN.