Dual PanelSora TUHAN i bas angin kalisungsung
1Masmur Daud. Pujilah TUHAN o si nasa nggeluh i Surga, pujilah kemulian ras KuasaNa.
2Pujilah gelar TUHAN si Mulia, erjimpuh i adep-adepen si Badia, tupung IcidahkenNa BaNa.
3Sora TUHAN erlenggur i babo lawit, SoraNa ergeruhguh i datas lau.
4Sora TUHAN dem gegeh, sora TUHAN dem kuasa.
5Sora TUHAN menggelken batang-batang kayu, aminna pe batang cemara Libanon.
6Deleng Libanon lompat-lompat IbahanNa, desken anak lembu. Deleng Hermon mengkat-engkat, desken anak banteng.
7Sora TUHAN erlenggur, erbahanca kilap erdepar.
8Sora TUHAN erbahanca taneh mesawang mugur-ugur, gurun Kades IbahanNa mundu-undu.
9Sora TUHAN ngugur batang kayu i kerangen, erbahanca bulung-bulung nartaren, i bas Rumah Dibata BangsaNa ersurak, "Pemuliakenlah Dibata!"
10TUHAN erkuasa i babo banjir si mbelin, Ia merentah rasa lalap seh rasa lalap.
11TUHANlah si mere gegeh man BangsaNa, mereken dame arah pasu-PasuNa.