Dual PanelPertoton ngataken bujur
1Ende-enden mengket Rumah Pertoton. Masmur Daud.
2Kupuji Kam o TUHAN, sabap nggo IkeliniNdu aku. La IpediatNdu imbang-imbangku, megombang man bangku.
3O TUHAN Dibatangku, erlebuh aku man bandu mindo penampat, emaka IbahanNdu aku juah-juahen.
4IpulahiNdu aku i bas kuburen nari, aku nggo i bas dalan kempak doni kematen, tapi IpegeluhNdu aku mulihi.
5Endekenlah puji-pujin man TUHAN, o kam kerina si patuh. Ingetlah perbahanen TUHAN si Badia, katakenlah bujur man BaNa.
6Pernembeh AteNa kentisik ngenca, KiniulinNa tetap asa umur geluhta. Iluh mambur i bas berngi si gelap, tapi kenca matawari mbincar erpagi-pagi reh keriahen.
7I bas kesenangenku ningku i bas ukurku, "La ndigan pe aku talu!"
8Sabap mehuli Kam kempak aku, o TUHAN, IbahanNdu aku desken benteng i deleng-deleng. Tapi kepeken cebuni Kam man bangku, emaka mbiar aku.
9O TUHAN erlebuh aku BaNdu, mindo perkuah AteNdu.
10"Kai kin gunana BaNdu adi mate aku? Kai kin UntungNdu adi ikuburken aku? Banci kin abu muji Kam? Banci kin iberitakenna kerna KiniulinNdu si la erkeri-kerin?
11Begiken min pertotonku dingen mekuah min AteNdu, sampati aku, o TUHAN!"
12Kendelenku nggo IsalihkenNdu jadi keriahen, emaka landek-landek aku alu meriah. <30:13> - Emaka la aku nggit sinik, kuendeken puji-pujin man BaNdu. TUHAN Kam kap Dibatangku, lalap kukataken bujur man BaNdu!