Ukumen man kalak jahat
1Ende-enden Daud,
2tupung Doeg, kalak Edom e, lawes ngataken man Saul maka Daud nggo seh i rumah Abimelek.
3O kalak si mbisa, ngkai maka ihagakenndu kejahatenndu, kekelengen Dibata tetap kap.
4Gedang-gedang wari kam nipu dingen ngerencanaken si jahat, dilahndu desken piso cukur si entelap.
5Ngena AteNdu kempak kejahaten lebih asang man si mehuli, kata la tuhu asangken situhu-tuhu.
6O penipu, alu rananndu, meriah ukurndu nakiti kalak.
7Emaka, ikernepken Dibata me kam rasa lalap, ItangkapNa me kam, jenari IsarenNa i bas rumahndu nari, janah IpiserNa kam ku doni kalak mate.
8Ngidah si e, mbiar kalak bujur, jenari itawaina kam janah nina,
9"Ah me kalak si la ernalem man Dibata, tapi ernalem man kejahaten dingen kebayaken." <52:10> - Tapi aku, desken batang saitun si meratah bulungna, si turah i bas Rumah Dibata. Aku ernalem man keleng AteNa si tetap rasa lalap seh rasa lalap. <52:11> - Rasa lalap ateku ngataken bujur man BaNdu, erkiteken kai si IbahanNdu, o Dibata. I tengah-tengah perpulungen kalak si ertutus ate man BaNdu kumomoken KiniulinNdu.