Pemindon maka kalak jahat iukum
1Masmur Daud.
2O kam si erkuasa, adil kang keputusenndu? Bujur kang putusenndu tupung kam ngadili kalak?
3Lang! Kam ngukurken si jahat i bas pusuhndu, dingen kejahaten si kejam ilakokenndu i bas negeri enda.
4Kalak jahat nggo papak i bas bertin nari kin, mulai tubuhna ndube pe nggo ia melasken kata la tuhu.
5Kalak jahat erbisa bagi nipe, pasek bagi upar isompelna pinggelna
6si la megi sora pawang si beluh, ntah sora tukang sihir si melasken mangmangna.
7O Dibata penggelken min ipenna, dekdek min sawit singa si merawa e, o TUHAN.
8Masaplah ia bagi lau lesap ku taneh, bagi dukut-dukut melus idedehi i bas dalan.
9Meleburlah ia desken kacunggi si terdedeh, desken anak si merurus la sempat ngidah wari terang.
10Alu la isangka-sangka irenteslah ia bagi dukut, metua ntah nguda iraprap pernembeh TUHAN ia kerina.
11Ngidah kalak jahat nggo iukum, meriah iakap kalak bujur jenari iburihina nahena alu dareh kalak jahat. <58:12> - Bagenda me nina kalak pagi, "Tuhu lit nge upah kalak si bujur, lit kap Dibata si ngadili doni enda."