Tedeh ate man Dibata
1Masmur Daud tupung ia i padang gurun Judea.
2O Dibata, Kam kap Dibatangku, kudarami dingen tedeh ateku Kam. Mesikel kal aku nandangi Kam. Desken taneh tenggiring si kerah, bage me muasna tendingku man BaNdu.
3Pelepas maka kuidah Kam i bas RumahNdu, maka kuidah kuasa ras KemulianNdu.
4KekelengenNdu si tetap ergan asangken kesah, emaka kupuji ateku Kam.
5Kidekah umur geluhku aku ngataken bujur man BaNdu, kuangkat tanku tupung aku ertoto BaNdu.
6Alu ende-enden si meriah kupuji Kam, desken man tabeh-tabeh ras utuk tulan, bage me IbesuriNdu tendingku.
7Tupung aku tayang i das ingan medemku, kuinget Kam; gedang-gedang berngi rukur aku kerna Kam.
8Sabap Kam kap si nggo nampati aku, i teruh KabengNdu rende aku perban riahna.
9Enteguh Kam kucikepi, terkelin aku perban TanNdu si megegeh.
10Tapi kalak si ersura-sura munuh aku, gedap me ku doni kalak mate.
11Mate me ia i bas perang, jenari ipangani rubia-rubia si meliar. <63:12> - Meriah me ukur raja, sabap ibereken Dibata kemenangen man bana. Kalak si erpadan i bas gelar Dibata, ipujina me Ia. Tapi babah si melasken kata la tuhu isompel me kap.