Dual PanelPertoton kalak si nggo metua
1Man BaNdu aku cicio, o TUHAN, ula aku pelepas italuken.
2Bebasken min aku sabap bujur kap Kam, dengkehken min aku janah pulahi min.
3Kam min jadi inganku cicio si aman, dingen jadi bentengku si enteguh. Kam kap kecionku ras pertahanenku.
4O Dibatangku, pulahi min aku i bas kalak jahat, i bas kuasa kalak jahat dingen si kejam nari.
5Kam kap pengarapenku, man BaNdu kap aku ernalem kitik-kitikku nari.
6Mulai tubuhku ndube ku Kam aku ertunande, i KawaliNdu aku mulai kin i bas bertin nandengku nari emaka lalap Kam kupuji.
7Geluhku jadi usihen man nterem kalak, sabap Kam kap pengawalku si megegeh.
8Lalap Kam kupuji, KemulianNdu kuberitaken gedang-gedang wari.
9Tupung aku nggo metua ula min BuangNdu aku, ula aku ItadingkenNdu adi nggo keri gegehku.
10Sabap ibunuh imbangku atena aku, icakapkenna aku dingen erpekat ia.
11Nina, "Nggo itadingken Dibata ia; ota elis jenari sitangkap ia, sabap lanai bo lit si nampatisa."
12O Dibata, ula Kam ndauh i bas aku nari, o Dibatangku, pedas min aku sampati.
13Italuken dingen ikernepkenlah, kalak si nerang aku. Igombangi dingen ijurukenlah, kalak si encilakaken aku.
14Tep-tep Kam lalap pengarapenku, jenari reh usurna kupuji Kam.
15KiniulinNdu kuturiken gedang-gedang wari, dingen ngerana kerna keselamaten si IberekenNdu aminna pe la kal tertaktaki.
16TUHAN kupuji PerbahanenNdu si mbisa, KebenarenNdu ngenca ateku kupebelin.
17Kitik-kitikku nari IajariNdu aku, o Dibata, janah seh ngayak genduari kuturiken PerbahanenNdu si mejin.
18Genduari, o Dibata aku nggo metua dingen ubanen, ula kal aku tadingken. Temanilah aku, maka ngasup aku ermomo kerna kuasa ras KinimbisanNdu, man kerina kesusuren si nandangi reh.
19KinibujurenNdu, o Dibata, seri ganjangna ras langit, mulia kap PerbahanenNdu ise kin bagi Kam?
20Nggo IdabuhkenNdu man bangku kiniseran si mberat, tapi gegehku IulihkenNdu me, dingen IpekekeNdu aku i bas kuburen nari.
21ItambahiNdu man bangku kemulian, jenari IapuliNdu ka aku.
22Tuhu kupuji ateKu Kam alu kulcapi, kupuji ateku KesetianNdu o DibatangKu. Alu sora kulcapingku kupersembahken man bandu ende-enden, o si badia nu Israel.
23Ersurak aku dem keriahen janahku ngendeken ende-enden pujin man BaNdu. Geluhku rende ersurak, sabap nggo aku IpulahiNdu.
24Gedang-gedang wari ateku ngerana kerna KebenarenNdu. Sabap kalak si atena meneken aku nggo italuken dingen IjurukenNdu.