Dual PanelPertoton guna keselamaten bangsa
1Masmur kesaksin Asap.
2O permakan Israel, dengkehken min kami, dengkehkenlah si permakan rarasen Jusup. Kam si kundul i das kerubim, cidahkenlah SinalsalNdu.
3Ilebe-lebe Eperaim, Benyamin ras Manase, pekekelah KuasaNdu, jenari reh Kam nampati kami.
4O Dibata, baba min kami mulih, cidahken man kami perkuah AteNdu maka kami terkelin.
5O TUHAN si Mada Kuasa, asa kai nari dekahna AteNdu nembeh ndengkehken pertoton BangsaNdu?
6Kiniseran IberekenNdu jadi pangan kami, dingen sampur iluh man inemen kami.
7IpelepasNdu bangsa-bangsa sekelewet kami rubat kerna taneh kami, jenari kami iguro-guroken musuh kami.
8O Dibata si Mada Kuasa, baba kami mulih! Cidahken min perkuah AteNdu man kami maka kami terkelin.
9BangsaNdu desken batang anggur, si IpiserNdu i Mesir nari. Bangsa-bangsa si deban IpelawesNdu, jenari IsuankenNdu batang anggur i negerina.
10I pesai Kam taneh man ingan nuankenca jenari rurat enteguh ia, dingen idemina negeri e.
11Ilinggemina deleng-deleng, itutupina dahan-dahanna batang ingul si mbelin.
12Dahanna njurjur seh ku Lawit Tengah, pucuk-pucukna seh ku Lau Eprat.
13O Dibata ngkai maka IsontarkenNdu bidena, seh maka kerina kalak si mentas banci muat buahna?
14Wili nungke-nungke i je ngayak ceda, jenari rubia-rubia si meliar pe manganisa.
15O Dibata si Mada Kuasa, mulihlah, tatap min i Surga nari, reh Kam engkelini BangsaNdu.
16Mari kelini kebun anggur si nggo IsuanNdu ndube. Batang anggur si nguda, si megegeh IbahanNdu perturahna.
17Nggo itabah dingen iciluk musuh, kernepkenlah musuh kami alu RawaNdu.
18Kawali min bangsa si nggo IpilihNdu, bangsa si nggo IjadikenNdu bage gegehna.
19Gelah lanai kami nilah i bas Kam nari, kawali min kesah kami, maka ipuji kami Kam. <80:20> - O TUHAN Dibata si Mada Kuasa, baba min kami mulih, cidahken man kami perkuah AteNdu maka kami terkelin.