Dual PanelTedeh ate man Rumah Dibata
1Masmur anak-anak Korah.
2Andiko, keleng kal ateku RumahNdu, o TUHAN si Mada Kuasa.
3Andiko, merincuh kal aku ku je! Metedeh kal ateku Rumah TUHAN! Tendingku ras dagingku ersurak nandangi Dibata si nggeluh.
4Sedangken perik tuan pe lit rumahna, kalimpines nggo dat asar. Itamakenna anakna i deher batar-BatarNdu, TUHAN si Mada Kuasa, Rajangku dingen Dibatangku.
5Seh kal sangapna kalak si tading i RumahNdu, banci ia lalap rende muji Kam.
6Sangap kal kalak si daten gegeh i bas Kam nari, si ertedeh ate ndahi Deleng Sion.
7Sanga erdalan ia, mentasi berneh Baka si kerah, reh me udan selaku pasu-pasu i bas Dibata nari, seh maka taneh dem ulu lau dingen tambak-tambak.
8Gegehna ertambah-tambah tupung ia erdalan ku Sion, lako ngadap man Dibata nu dibata-dibata.
9O Dibata Jakup, dengkehken min pertotonku, O TUHAN Dibata si Mada Kuasa.
10O Dibata, pasu-pasulah raja kami, raja si IpilihNdu jine.
11Madin sada wari i bas RumahNdu, asangken seribu wari i bas ingan si deban. Madin tedis i bas gerbang Rumah Dibatangku, asangken ringan i bas rumah kalak jahat.
12Sabap TUHAN Dibata kap matawari ras ampang-ampang si enteguh, IberekenNa man banta kehamaten ras lias AteNa. La ia rahan-ahan mereken si mehuli, man kalak si ngelakoken si ngena AteNa. <84:13> - O TUHAN si Mada Kuasa, malem kal ate kalak si tek man BaNdu.