Dual PanelDibata kap si jadi hakim man kerina kalak
1O TUHAN, Kam kap Dibata si erbalas, cidahken min RawaNdu, o TUHAN.
2Kekeken, o Hakim kerina manusia, ukum min kalak si megombang sue ras perbahanenna.
3O TUHAN, ngayak ndigan kalak si ilat peganjang bana? Asa kai nari dekahna meriah iakapna?
4I bas babahna nari luar kata-kata si megombang, iagahkenna kerina perbahanenna si jahat.
5O TUHAN, itindasna BangsaNdu, IripukkenNa kalak si IpilihNdu.
6Diberu balu-balu ras anak melumang ibunuhna, rikut pe ras kalak pertandang si ringan i negeri enda.
7Nina, "Labo kita idah TUHAN, labo kita iperdiateken Dibata nu Israel."
8O bangsangKu, uga maka bage kal motundu? Ndigan denga kam erlajar pentar?
9Dibata kap si njadiken cupingta, banci kin Ia la erpemegi? Ia si njadiken matanta, banci kin Ia la erpengidah?
10Ia si ngajari bangsa-bangsa, banci kin ia la ngukum? Ia nge jadi guru man kalak kerina, banci kin la lit PemetehNa?
11Ieteh TUHAN nge kerina perukuren manusia, IetehNa maka sia-sia kap isuraken manusia.
12Sangap kal kalak si IdidikNdu, o TUHAN, kalak si man bana IajarkenNdu undang-UndangNdu.
13IpetenengNdu ia tupung wari-wari kesuhsahen, seh ngayak kalak jahat ndabuh ku bas lubang.
14Sabap labo IetehNdu nulak BangsaNdu, o TUHAN, labo AteNdu ItadingkenNdu SikerajangenNdu.
15Emaka kinibujuren pe ipake ka mulihi, janah kerina kalak bujur ngikutkenca.
16Ise nampati aku ngelawan kalak jahat? Ise ngkapiti aku ngelawan kalak si erbahan ilat?
17Adi la min ndai aku IsampatiNdu o TUHAN, narus aku ringan ku bas doni kematen.
18Tupung aku Rukur "Ndabuh me aku," i je keleng AteNdu si tetap erbahanca aku lalap paguh.
19Kune la tetap ukurku dingen aru ateku, Kam si ngapuli dingen si periahken ateku.
20Kam la nggit erteman ras hakim-hakim penipu, si pepinter-pinter si la bujur.
21Ersada takina ngelawan kalak bujur, dingen mereken ukumen mate man kalak si la ersalah.
22Tapi Kam IbelaNdu aku, o TUHAN, Dibatangku, Kam si ngkawali aku.
23IukumNdu kalak jahat sue ras kejahatenna, IkernepkenNdu ia erkiteken dosana, TUHAN Dibatanta kap si ngkernepkenca.