Dual Panel1Cilakalah kota pemunuh si perbual e, dem alu erta rampasen ras rampoken!
2Begikenlah! cambuk si erdepar roda si erderak-derik, sora kuda ranjak-anjak sora gereta perang lompat-lompat.
3Kalak si erkuda reh nerang, pedang erbinar, lembing erndilap-ndilap. Bangke ergun-gun, kalak mate la terbeligai nterem kalak tertuktuk kuje tertuktuk kempak kalak mate, la ieteh beliganna!
4Niniwe si perlua-lua e nggo iukum, Niniwe erbahan leket ukur, dem i bassa permanis si erbahanca keke kerincuhen, bangsa-bangsa ipukona jadi budakna.
5Nina TUHAN si Erdolat, "O Niniwe, la banci lang Kuukum kam! Kubahan maka kam manjang-anjang, maka bangsa-bangsa ngidahsa kerina kemelanndu.
6Kubahan maka kam iisak-isakken kalak, Kutamburi kam alu si melket, ciga ate kalak ngenehen kam.
7Kerina kalak si ngidah kam megamang akapna. Nina, 'Nggo rontas Niniwe! Ise rate mekuah tare ia? Ise si ngapuli ia?'"
8O Niniwe, ulin kin kam asangken Tebes ibu kota Mesir? Ia lit lau mbelin si ngkawali ia desken tembok. Lau Nil pertahanenna.
9Sudan ras Mesir iperentahna, gegehna la kap lit sibarna. Libia kap temanna.
10Tapi kalak Tebes pe iangkut ku pembuangen. I bas tep-tep suki pasar anakna idampesken seh mate. Peminpin-peminpin iangkut tergari janah itikam-tandukken.
11Kam pe la banci lang mabuk dingen mbulen o Niniwe. Icubakenndu mulahi dirindu i bas imbang-imbangndu nari.
12Kerina benteng-bentengndu bali ras batang ara, sibuahna lampas tasak: iugur batangna, nartaren kerina buahna ndabuh ku bas babahndu.
13Tenterandu bali ras diberu-diberu. Negerindu lanai terpertahanken i bas imbang-imbangndu nari. Api ncedaken eruk-eruk pintun gerbangndu.
14Ingan njaruki lau guna persikapen ikepung, janah peteguhilah benteng-bentengndu. Dedehi taneh dah guna erbahan batu bata, pesikap ginuhurndu pe.
15Aminna kai pe ibahanndu, la banci la kam iciluk gelah mate ntah ibunuh i bas perang. La banci la radas kam bali ras peranin si ipangani labang. Kam nterem desken labang!
16Ipebuendu saudagarndu buen asangken bintang-bintang i langit! Tapi genduari nggo bene kerina desken labang kabang.
17Pegawaindu bali ras labang si ergun-gun i bas tembok tupung wari perudan. Tapi tupung pultak matawari kabang ia kerina janah ise pe la metehsa ku ja ia lawes!
18O Raja Assur, kerina gubernurndu nggo mate. Kerina bangsandu nggo tunduh rasa lalap! Rayatndu nggo ikerapken ku deleng-deleng. Ise pe la lit maba ia mulihken.
19La lit tambar man lukandu, ugahndu lanai banci malem. Kerina kalak ertepuk megi berita maka kam nggo kernep. Lit kin kalak pulah i bas kekejamenndu si la peltep e?