Dual PanelGelar-gelar imam ras kalak Lewi
1Si tersurat arah teruh enda, eme gelar-gelar imam ras kalak Lewi si mulih i bas pembuangen nari ras Serubabel anak Sealtiel, bage pe ras Josua, sekalak Imam si Mbelin.
2Imam-imam: Seraya, Jeremia, Esra, Amaria, Malluk, Hattus, Sekanya, Rehum, Meremot, Iddo, Ginnetoi, Abia, Miyamin, Maadia, Bilga, Semaya, Joyarip, Jedaya, Sallu, Amok, Hilkia, ras Jedaya. Imam-imam enda me si jadi peminpin i bas teman-temanna sada dahin i bas paksa Josua nggeluh denga.
3(Neh 12:2)
4(Neh 12:2)
5(Neh 12:2)
6(Neh 12:2)
7(Neh 12:2)
8Kalak Lewi: Kalak si tersurat gelarna arah teruh enda tugasna eme ngendeken ende-enden pengataken bujur, eme: Jesua, Binnui, Kadmiel, Serebia, Juda, ras Mattania.
9Si tersurat gelarna arah teruh enda eme kalak si tedis petala-tala ras kalak ndai i bas kebaktin e: Bakbukia, Unni, ras senina-seninana kalak Lewi si deban.
Kesusuren Imam si Mbelin Josua
10Josua eme bapa Joyakim, Joyakim eme bapa Eliasip, Eliasip eme bapa Joyada,
11Joyada eme bapa Jonatan, Jonatan eme bapa Jaddua.
Kepala-kepala terpuk imam-imam
12Asum Joyakim jadi Imam si Mbelin, imam si tersurat arah teruh enda eme kepala-kepala terpuk imam-imam: Imam - Terpuk; Meraya - Seraya; Hanania - Jeremia; Mesullam - Esra; Johanan - Amaria; Jonatan - Malluki; Jusup - Sebanya; Adna - Harim; Helkai - Merayot; Sakaria - Iddo; Mesullam - Ginneton; Sikri - Abiya; ... - Miniamin; Piltai - Moadia; Sammua - Bilga; Jonatan - Semaya; Mattenai - Joyarip; Ussi - Jedaya; Kallai - Sallai; Eber - Amok; Hasabia - Hilkia; Natanel - Jedaya;
13(Neh 12:12)
14(Neh 12:12)
15(Neh 12:12)
16(Neh 12:12)
17(Neh 12:12)
18(Neh 12:12)
19(Neh 12:12)
20(Neh 12:12)
21(Neh 12:12)
Surat kerna keluarga imam-imam ras kalak Lewi
22Lit sada surat ibahan kerna kepala-kepala keluarga kalak Lewi ras imam-imam kidekah nggeluh denga Imam-imam si Mbelin si tersena arah teruh enda, eme: Eliasip, Joyada, Jonatan, ras Jaddua. Surat e nggo dung ibahan asum Darius jadi raja Persia.
23Amin bage gia seh paksa Jonatan, kempu Eliasip ngenca kepala keluarga kalak Lewi si isuratken i bas surat Rumah Pertoton.
Pembagin tugas i bas Rumah Pertoton
24Arah pengaturken Hasabia, Serebia, Jesua, Binnui, ras Kadmiel, kalak Lewi e ibagi jadi piga-piga terpuk. Dua terpuk ngendeken puji-pujin man Dibata alu sialo-alon dingen ngataken bujur man BaNa, sue ras perentah si ibereken Raja Daud, suruh-suruhen Dibata e.
25Pengawal Rumah Pertoton si tersurat arah teruh enda ertugas njaga kamar perbendaharan deherken pintu gerbang Rumah Pertoton, eme: Mattania, Bakbukia, Obaja, Mesulam, Talmon ras Akkub.
26Tupung e si jadi imam si mbelin eme Joyakim anak Josua, kempu Josadak. Si jadi gubernur eme Nehemia. Janah sanga si e nggeluh denga pe Esra. Ia sekalak imam janah kalak si pentar kerna Undang-undang Musa.
Nehemia nangkuhken tembok kota Jerusalem
27Asum tembok kota Jerusalem itangkuhken, ipepulung kerina kalak Lewi ku Jerusalem i ja pe ia ringan, gelah banci ikut i bas perayan penangkuhen e alu ngendeken ende-enden pengataken ras alu gendang, kulcapi ras murdap.
28Kerina keluarga kalak Lewi si perende-enden reh i bas daerah inganna tading i sekelewet ras i kuta-kuta sekelewet Netopa nari,
29bage pe i Betgilgal, Geba, ras Asmawet nari.
30Imam-imam ras kalak Lewi erbahan lakon gunaa pebadiaken dirina, jelma si nterem, pintu-pintu gerbang ras tembok kota e.
31Kupepulung peminpin-peminpin Juda i datas tembok e, jenari kusuruh ngaturken dua terpuk jelma si nterem erbaris ngkeleweti kota e janahna rende ngataken bujur man Dibata. Terpuk si pemena erdalan ku kemuhen i datas tembok e kempak Gerbang Sampah.
32Hosaya erdalan arah pudi perende-ende e, ngikut pe setengah i bas peminpin Juda nari.
33Imam-imam si tersena arah teruh enda, janahna ngembus terompet erbaris arah pudi peminpin-peminpin ndai, eme: Asaria, Esra, Mesullam, Juda, Benyamin, Semaya, ras Jeremia. Seterusna eme Sakaria anak Jonatan, kempu Semaya. (Nini denge eme Mattania, Mikaya, ras Sakkur i bas terpuk Asap nari.)
34(Neh 12:33)
35(Neh 12:33)
36Anggota-anggota terpuk ngikuti arah pudina eme Semaya, Asarel, Milalai, Gilalai, Maai, Netanel, Juda, ras Hanani. Kalak enda kerina maba alat musik seri ras si ipake Raja Daud nai, suruh-suruhen Dibata. Si minpin barisen e Esra, kalak si pentar i bas Undang-undang Musa e.
37Deherken Gerbang Ulu Lau nangkeng kalak enda arah tangga si kempak Kota Daud, mentasi istana Daud, jenari mulih ku tembok e deherken Gerbang Lau, arah timur kota e.
38Terpuk sada nari si rende ngataken bujur e erdalan kempak kawes arah datas tembok e, janah ngikut pe setengah i bas bangsa e. Kami erbaris mentasi Menara Ginuhur kempak Tembok si Mbelang,
39janah i jenari erdalan mentasi Gerbang Eperaim, Gerbang Jesana, Gerbang Ikan, Menara Hananel, ras Menara Seratus terus kempak Gerbang Biri-biri. Kami ngadi erbaris deherken gerbang si kempak Rumah Pertoton.
40Dage duana terpuk si rende ngataken bujur man Dibata e seh i kesain Rumah Pertoton. Seakatan peminpin si ras aku,
41imam-imam si tersena arah teruh enda pe ikut i bas terpukku eme: Eliakim, Maaseya, Miniamin, Mikaya, Eliunai, Sakaria, ras Hanania; kalak enda ngembus terompet.
42Arah pudi barisen kalak enda me Maaseya, Semaya, Eleasar, Ussi, Johanan, Malkia, Elam, ras Eser. Perende-ende alu ipinpin Jesrahia, rende asa gang sorana.
43I bas wari e melala kal asuh-asuhen igeleh jadi persembahen, janah bangsa e dem keriahen erkiteken meriah kal ukurna kerina ibahan Dibata. Diberu ras danak-danak pe ikut i bas perayan e, emaka sorana kerina terbegi i dauh-dauh nari.
Nikapken keperlun guna kebaktin i Rumah Pertoton
44Tupung e, dilaki itugasken njaga kamar perbendaharan ingan nimpan pemere guna Rumah Pertoton, subuk persembahen persepuluhen ras buah gandum si pemena ras buah pangan si pemena tasak tep-tep tahun. Kalak enda ertanggung jawab pepulung ulih juma deherken erbage-bage kota, si jadi bagin imam-imam ras kalak Lewi sue ras si iperentahken Undang-undang. Kerina kalak Juda erngena ate nandangi imam-imam ras kalak Lewi,
45erkiteken kalak e ngelakoken acara pembersihen ras lakon-lakon si deban si iperentahken Dibata. Pemain musik ras pengawal Rumah Pertoton pe ndalanken tugasna sue ras peraturen-peraturen si ibahan Raja Daud ras anakna Salomo.
46Mulai i bas paksa Raja Daud ras pemain musik Asap nai, pemain-pemain musik nggo minpin ende-enden pujin ras pengataken bujur man Dibata.
47I bas paksa Serubabel bage pe i bas paksa Nehemia, kerina kalak Israel tep-tep wari mereken pemerena guna keperlun pemain musik ras pengawal Rumah Pertoton. Bangsa e mereken persembahen si badia guna kalak Lewi, janah kalak Lewi e mereken bagin imam-imam.