Alkitab Mobile SABDA
[VER] : [KARO]     [PL]  [PB] 
 <<  Nehemia 13 >> 

Serap i bas bangsa si deban nari

1Asum Undang-undang Musa iogeken man bangsa e ijumpai kalak ndai i je lit tersurat la banci ndigan pe ipelepas sekalak kalak Amon ntah kalak Moap bengket ku bas perpulungen bangsa Dibata.

2Si enda erkiteken bangsa Amon ras bangsa Moap la mereken pangan ras inemen man kalak Israel asum i bas perdalanen i Mesir nari, tapi iupahina Bilham numpahi bangsa Israel, tapi isalihken Dibata sumpah e jadi pasu-pasu.

3Asum bangsa Israel megi undang-undang e iogeken, kerina bangsa si deban ipedaratna i bas perpulungenna nari.

Pembaharun si ibahan Nehemia

4Imam Eliasip, si ertugas ngurus kamar perbendaharan Rumah Pertoton, nggo ndekah si kade-kaden ras Tobia.

5Iberena Tobia make sada kamar galang si arusna kin ipergunaken man ingan nimpan persembahen gandum ras kumenen, perkekas-perkekas si ipake i bas Rumah Pertoton, persembahen guna imam-imam, bage pe persepuluhen i bas gandum, anggur, ras minak saitun si man berenken man kalak Lewi, pemain musik ras pengawal Rumah Pertoton.

6Tupung si enda jadi, aku sangana la i Jerusalem, sabap i bas tahun si petelu pulu duaken Artaserses jadi raja Babil, aku sanga ngadap man bana. La ndekah kenca si e iberena aku mulih,

7emaka mulih aku ku Jerusalem. Kenca seh i Jerusalem sengget kal aku sabap kueteh nggo ibere Eliasip ipake Tobia sada kamar i bas Rumah Pertoton e.

8Merawa kal aku, jenari kusampetken ndarat kerina barang-barang Tobia.

9Kenca bage kuperentahken maka kamar e ibersihken rikutken aturen agama janah alat-alat Rumah Pertoton, persembahen buah gandum, ras kumenen iulihken ku bas kamar e.

10Dungna kueteh pe maka pemain-pemain musik Rumah Pertoton ras kalak Lewi si debanna nggo nadingken Jerusalem janah mulih ku jumana, sabap lanai ibereken bangsa e keperlun kegeluhenna.

11Emaka kusuriangi pegawai-pegawai e erkiteken Rumah Pertoton e terulang. Kenca bage kupepulung mulihken kalak Lewi ras pemain musik e ku Rumah Pertoton, jenari kusuruh erdahin mulihken.

12Dungna kerina kalak Juda mulai ka maba persepuluhen buah gandum, anggur, ras minak saitun, ku bas kamar perbendaharan Rumah Pertoton e.

13Kalak si kutugasken ngurus kamar perbendaharan e, eme: Selemia, ia sekalak imam: Sadok, ia kalak si pentar kerna Undang-undang Musa; ras Pedaya, ia sekalak kalak Lewi. Hanan anak Sakkur, kempu Mattania, eme si nampati kalak enda. Kueteh dingen tek aku maka kalak e kerina bujur perbahanenna i bas magiken perbekalen e man teman-temanna sada dahin.

14O Dibatangku, ingetlah min kerina si kubahan enda guna Rumah PertotonNdu ras kebaktin i je.

15I bas paksa e kuidah kalak Juda ngerik buah anggur tupung wari Sabat. Si debanna namaken gandum, anggur, buah anggur, buah ara, ras barang-barang si deban ku das kaldena jenari ibabana ku Jerusalem. Kupersingeti man bana maka ula kai pe idayakenna tupung wari Sabat.

16Lit ka piga-piga kalak si asalna i kota Tirus nari ringan i Jerusalem. Kalak e maba ikan ras melala erbage barang-barang ku kota Jerusalem lako ndayakenca man bangsa kami i bas wari Sabat.

17Kusuriangi peminpin-peminpin kalak Jahudi ningku, "Uga maka bage jahatna perbahanendu? Iliamindu wari Sabat!

18Bagenda kal me nai pe maka iukum Dibata nini-ninindu asum IcedakenNa kota enda. Amin nggo pe bage lalap ka nge iusur-usurndu maba rawa Dibata si terbuen nandangi Israel alu ngeliami wari Sabat."

19Emaka kuperentahken gelah gerbang-gerbang kota ipintu tep-tep permulan wari Sabat, kenca ben wari, janah la banci italangi ope denga wari Sabat lepas. Guna si e kutugasken piga-piga kalak si erdahin ras aku erjaga i bas pintu-pintu gerbang gelah la lit kai pe ibaba bengket ku bas kota e i bas wari Sabat.

20Sekali tah dua kali perbinaga ndayaken erbage barang-barang erberngi i darat tembok kota.

21Erkiteken si e kupersingeti man perbinaga-perbinaga e, ningku, "Labo gunana kam erberngi i darat tembok kota. Adi iulihindu denga ka, kutangkap kam." Mulai i bas paksa e nari lanai ia reh tupung wari Sabat.

22Kuperentahken kalak Lewi gelah ibersihkenna dirina janah gelah ia lawes njaga pintu-pintu gerbang maka wari Sabat ipebadiaken. O Dibatangku, ingetlah aku erkiteken si enda pe, janah selamatkenlah aku erkiteken KekelengenNdu si mbelin.

23Paksa e kudat pe maka nterem kalak Jahudi nggo ngempoi diberu i Asdot, Amon, ras i Moap nari.

24Setengah i bas anak-anakna nari cakapna nggo cakap Asdot ntah cakap si deban janah la ietehna cakap kami.

25Kusuriangi dilaki-dilaki e, kusumpahi kupekpeki, janah kuruah bukna. Kenca bage kusuruh ia ersumpah i bas gelar Dibata maka ndigan pe ia ntah anak-anakna la siempon ras bangsa si deban.

26Ningku, "Diberu bangsa si deban nge nai erbahanca maka Raja Salomo erdosa. Ia belinen asa kerina raja-raja negeri si deban. Keleng ate Dibata man Salomo janah ibahanna ia jadi raja kerina Israel. Amin bage gia ndabuh ka ia ku bas dosa bekas pemabai diberu-diberu bangsa si deban.

27Patut kin dage iusih kami kam janah la ngikutken Dibatanta alu ngempoi diberu bangsa si deban?"

28Joyada anak Imam si Mbelin Eliasip. Sekalak i bas anak Joyada ngempoi anak Sanballat i kuta Bet Horon nari. Erkiteken si e kupelawes Joyada i Jerusalem nari.

29O Dibatangku, ingetlah uga kalak e ngeliami jabaten keimamen ras perpadanen si IbahanNdu ras imam-imam bage pe kalak Lewi.

30Kubersihken bangsa e i bas kasa pengaruh bangsa si deban nari, kusikapken peraturen imam-imam ras kalak Lewi gelah sekalak-sekalak meteh tugasna.

31Kuaturken gelah ranting si ipake guna nutung persembahen ula terlambat ibaba, bage pe gelah ibaba bangsa e buah gandum ras buah pangan si pemena tasak jadi persembahenna. O Dibatangku, ingetlah min kerina si enda gelah tama kiniulinku.


  Share Facebook  |  Share Twitter

 <<  Nehemia 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel