Dual PanelNehemia lawes ku Jerusalem
1I bas sada wari, empat bulan kenca si ndai, asum Raja Artaserses sangana man, kubaba anggur man bana. Ope denga si e, langa pernah idah raja ayongku serbut,
2emaka nungkun ia nina, "Ngkai maka serbut ayondu? Kam labo sakit, emaka ugapa pe gulut nge ukurndu." Sengget kal aku
3emaka ningku ngaloi, "Mejuah-juahlah kam rasa lalap, Raja! Banci kin la serbut ayongku adi kota ingan nini-niningku ikuburken nggo sontar janah pintu-pintu gerbangna nggo keri ipan api?"
4Nungkun raja man bangku, "Kai dage atendu?" Ertoto aku man Dibata Surga,
5janah kenca bage ningku man raja, "Adi metunggung akapndu aku, janah adi mehuli iakapndu nehken pemindonku, berelah aku lawes ku negeri Juda ku kota ingan nini-niningku ikuburken, gelah banci kupajekken mulihi kota e."
6Pemindonku e ialoken raja ras kemberahenna si sangana kundul deherken ia. Isungkun raja aku uga dekahna aku lawes janah ndigan ka aku mulih. Emaka kuturiken man bana.
7Kenca bage kupindo perkuah ate raja gelah iberekenna man bangku surat perentah guna isehken man gubernur-gubernur i propinsi Eprat Barat, gelah isampatina aku i bas perdalanenku ku Juda.
8Tambah si e kupindo pe surat perentah si man sehenken man si Asap pengawas kerangen kerajan, gelah isikapkenna man bangku kayu guna pintu-pintu gerbang benteng Rumah Pertoton, guna tembok kota e, ras rumah man inganku. Kerina pemindonku e ibereken raja, sabap Dibata nemani aku.
9Kenca bage berkat aku ku propinsi Eprat Barat. Raja nuruh piga-piga kalak perwira ras sada pasuken tentera si erkuda nemani aku. Emaka kubereken me surat raja man gubernur-gubernur e.
10Tapi Sanballat, anak kuta Bet Horon, ras Tobia, pegawai i propinsi Amon, megi maka nggo lit sekalak si reh erdahin guna kiniulin bangsa Israel, emaka nembeh kal atena.
11Kuterusken perdalanenku ku Jerusalem, janah telu wari dekahna
12la kuturiken man ise pe sura-sura si nggo ipeturah Dibata i bas pusuhku guna Jerusalem. Tengah berngi keke aku jenari lawes ndarat ras piga-piga kalak teman. La lit asuh-asuhen ibaba kami seakatan kalde si kuersak.
13Berngi gelap denga asum aku nadingken kota arah Gerbang Baluren si arah Barat. Jenari lawes aku ku Selatan mentasi Ulu Lau Naga, terus ku Gerbang Sampah. Sanga erdalan, kupepayo tembok-tembok kota si nggo runtuh ras pintu-pintu gerbangna si nggo ceda ipan api.
14Kenca bage lawes aku ku Gerbang Ulu Lau ras Kolam Raja. Tapi kalde si kuersak e la lit dalanna mentas arah tembok si nggo runtuh e.
15Emaka ngincuah aku ku Baluren Kidron, janah i jenari me kupepayo tembok e. Kenca bage mulihken aku arah dalanku ndai ka, jenari bengket ku bas kota arah Gerbang Baluren.
16La lit sekalak pe pegawai-pegawai si meteh kai si kulakoken. Kidekah si e la lit kai pe kukataken man senina-seninangku kalak Jahudi, subuk man imam-imam, peminpin-peminpin, pegawai-pegawai, ntah kalak si deban si nandangi muat bagin i bas dahin e.
17Tapi dungna kukataken man bana kerina, ningku, "Nehenlah uga susahna siakap genduari erkiteken Jerusalem lalap langa ipekena kenca kin nai tembokna runtuh dingen gerbangna ipan api. Sipajekkenlah mulihi tembok kota emaka ulanai kalak megombang man banta."
18Janah kuturiken man bana uga Dibata nemani aku ras nampati aku, dingen kai si nggo ikataken raja man bangku. Ngaloi kalak ndai, "Ota, sipajekken mulihi!" Emaka ersikap ia minter kerina menaken dahin si mehuli e.
19Tapi asum Sanballat, Tobia, ras sekalak kalak Arab, si Gesem gelarna, megi kai ate kami ibahan kami, itawa-tawaina kami, janah nina, "Kai kin akapndu si ibahanndu e? Ngelawan raja kin atendu?"
20Ngaloi aku, "Dibata Surga kap pagi si erbahanca maka seh sura-sura kami. Kami enda suruh-suruhenNa, emaka ibenai kami ate kami membangun; tapi kam labo lit sitik pe kuasandu kerna taneh i Jerusalem, janah rikutken peradaten pe labo lit hakndu."