Alkitab Mobile SABDA
[VER] : [KARO]     [PL]  [PB] 
 <<  Roma 1 >> 

1Surat enda rehna i bas aku nari, Paulus. Aku me suruh-suruhen Kristus Jesus, rasul si nggo ipilih dingen iserapken Dibata guna meritaken Berita Si Mehuli si reh i bas Dibata nari.

2Berita Si Mehuli e ipadanken Dibata nai-nai arah nabi-NabiNa janah nggo isuratken i bas Pustaka Si Badia.

3Berita e kerna AnakNa, Tuhanta Jesus Kristus: Ia manusia, Ia tubuh arah kesusuren Daud.

4Janah erdandanken Kesah Si Badia tangkas maka Ia Anak Dibata si erkuasa. Enda teridah arah KekekenNa i bas si mate nari.

5Arah Ia, dingen i bas GelarNa me Dibata mereken hak istimewa man kami, gelah ibabai kami kerina bangsa maka tek dingen patuh man Kristus.

6Ikatpendu kerina si ringan i Roma, si nggo ipilih Dibata jadi sikerajangen Jesus Kristus.

7Emaka o kam kerina si ringan i Roma si ikelengi Dibata dingen si nggo IpilihNa jadi anak-AnakNa: Dibata Bapanta ras Tuhan Jesus Kristuslah mereken lias AteNa man bandu janah malem atendu IbahanNa.

Paulus ertoto ngataken bujur man Dibata

8Perlebe kukataken bujur man Dibatangku arah Jesus Kristus, erdandanken kam kerina; sabap nggo mbar beritana i belang-belang doni enda kerna kinitekenndu.

9Rusur kal kam kuinget i bas pertotonku. Dibata saksina maka kai si kukataken enda tuhu. Ia me Dibata si kusembah alu bulat ukur i bas meritaken Berita Si Mehuli kerna AnakNa.

10Kupindoken man Dibata gelah adi sentudu ras PeratenNa IberekenNa min kesempaten man bangku guna ndahi kam.

11Sabap merincuh kal aku jumpa ras kam, gelah kubagi-bagiken man bandu pemere pertendin guna mpegegehi kinitekenndu.

12Maksudku gelah ipegegehi kita pekepar; kam kupegegehi alu kinitekenku janah aku ipegegehindu alu kinitekenndu.

13O senina-seninangku, perlu ietehndu maka nggo megati ateku reh ndahi kam tapi lit rusur abatna. Ateku min erbuah pendahinku e pagi i tengah-tengahndu bagi i tengah-tengah kalak si deban.

14Sabap aku rutang guna meritaken Berita Si Mehuli man kerina manusia, subuk man kalak si nggo maju bage pe man kalak si kolot denga, subuk man kalak si erpemeteh, bage pe man kalak si la erpemeteh.

15Erdandanken si emaka man bandu si ringan i Roma pe mesikel aku meritaken Berita Si Mehuli.

Kuasa Berita Si Mehuli

16La aku mela kerna Berita Si Mehuli e; sabap Berita Si Mehuli e kap Kuasa Dibata guna nelamatken kerina kalak si tek man Jesus Kristus, perlebe man kalak Jahudi, jenari man kalak si deban si labo kalak Jahudi.

17Sabap arah Berita Si Mehuli tangkas uga Dibata ngerambakken manusia kempak DiriNa. Si enda ibenaken i bas kiniteken janah erkedungen i bas kiniteken. Bagi lit tersurat i bas Pustaka Si Badia, "Kalak si nggo iperembakken Dibata kempak DiriNa erdandanken kinitekenna nggeluh me ia."

Ise pe la benar i lebe-lebe Dibata

18Pernembeh ate Dibata ipetangkas i Surga nari ndabuh ku kerina kejahaten manusia si la nggit nembah man Dibata. Erkiteken kejahatenna, manusia encekak ketuhu-tuhun e.

19Ersalah manusia e, sabap kai si banci ietehna kerna Dibata, tangkas me man bana. Dibata nge si petangkassa man bana.

20Mulai kin doni enda ijadiken Dibata, tangkas kap BiakNa si la teridah, eme KuasaNa ras KinidibatanNa si la ermasap-masap. Si enda banci igejapken manusia arah kai si nggo ijadiken Dibata e. Emaka lanai lit perdalihenna kerna kai si nggo ibahanna e.

21Itandai manusia e nge Dibata, tapi la ipehagana Dibata e bagi Dibata; bage pe la ia ngataken bujur man Dibata. Tapi perukurenna kerna si sia-sia saja, janah pusuh peratenna si batu-batun e ikuasai si gelap.

22Ngaku ia pentar, tapi motu nge ia.

23Itadingkenna kiniulin Dibata si la ermasap-masap jenari isembahna patung-patung manusia, perik-perik, rubia-rubia si empat nahena, bage pe rubia-rubia si njoler si biakna kerina ermasa-masap.

24Erdandanken si e ipelepas Dibata ia nehken sura-surana si melket, dingen ngelakoken perbahanen-perbahanen si cemar nandangi kulana sapih-sapih ia.

25Itukarkenna kebenaren Dibata alu guak. Labo Dibata si isembahna, tapi si ijadiken Dibata e nge ipuji dingen isembahna. Arusna kin si Njadikenca e nge ipuji seh rasa lalap! Amin.

26Erdandanken si e ipelepas Dibata ia nehken sura-surana si njuruken. Diberu-diberu erlagu la mehuli ia sapih-sapih ia diberu. Lagu langkah diberu-diberu e lanai bagi arusna.

27Bage pe si dilaki nadingken hubungenna si payo ras diberu, janah leket ukurna man sapih-sapih dilaki. Dilaki erlagu-langkah si njuruken sapih-sapih dilaki; erkiteken si e ia ndat balasen i bas dirina sue ras perbahanenna si jahat dingen la arus e.

28Perbahan lanai iakap manusia e perlu ngakui Dibata, emaka ipelepas Dibata ia i bas perukurenna si macik e, seh maka ibahanna perbahanen si la metunggung.

29I bas ia dem erbage-bage si la mehuli: kejahaten, rangap, lat-lat, cian ate, munuh, rubat, nipu, bage pe elem-elem, sicekurak-cekuraken,

30pebau-bau kalak si deban. Nembeh atena nandangi Dibata, megombang, meganjang ukur, meganjang cakapna. Rusur idaramina taki guna erbahan kejahaten si mbaru; la mehamat man orang tuana.

31Pusuh peratenna batu-batun; la itepatina padanna, janah la lit kekelengen ntah pe perkuah atena man kalak si deban.

32Ietehna maka rikutken keputusen Dibata si adil, kalak si bagenda perbahanenna arus iukum mate. Tapi amin bage gia tetap nge idalankenna bage. Janah labo saja ibahanna si jahat e, tapi lebih asa si e ipujina pe kalak si bali ras ia perbahanenna.


  Share Facebook  |  Share Twitter

 <<  Roma 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel