Dual PanelPaskah (Kel 12:1-20)
1"Rayakenlah wari Paskah i bas bulan Abib guna pehaga TUHAN, Dibatandu. Sabap i bas sada berngi i bas bulan e kap, ipulahi TUHAN kam i Mesir nari.
2Laweslah ku ingan ersembah si sada e; gelehlah i je sada lembu ntah biri-biri man pangan Paskah guna pehaga TUHAN Dibatandu.
3Sanga ipanndu pangan e, ula ipanndu roti si itama ragi. Pitu wari dekahna kam man roti si la itama ragi, bagi perbanndu sanga kam nadingken Mesir alu merudu-rudu. Panlah roti e, roti si igelari roti kiniseran, gelah kidekah geluhndu lalap ingetndu wari sanga kam ndarat i Mesir nari, ingan kiniseran e.
4Kidekah si pitu wari e ise pe la banci i negerindu muniken ragi i bas rumahna; daging asuh-asuhen si igeleh karaben i bas wari si pemena e arus maka ipan i bas berngi e kang.
5Geleh lah rubia-rubia Paskah e i bas ingan ersembah si sada e; la banci i bas ingan si deban i negeri si ibereken TUHAN Dibatandu man bandu. Lakokenlah e sanga sundut matawari; i bas paksa e kap kam nai nadingken Mesir.
6(Ul 16:5)
7Tanggerken lah daging e, jenari pan i bas ingan ersembah si sada e; jenari mulihlah pepagina ku rumahndu.
8Kenca si e, enem wari dekahna arus ipanndu roti si la tama ragi. Janah i bas wari si pepituken, pulunglah ersembah man TUHAN Dibatandu janah ula kam erdahin i bas wari e."
Kerja Rani (Kel 34:22; Im 23:15-21)
9"Beligai pitu minggu i bas kam menaken rani gandumndu.
10Kenca bage maka bahanlah Kerja Rani, guna pehaga TUHAN Dibatandu, alu maba persembahen ukur meriah man BaNa. Buena rikutken pasu-pasu si IberekenNa man bandu.
11Ermeriah ukurlah i adep-adepen TUHAN radu ras anak-anakndu, suruh-suruhenndu, ras kalak Lewi, kalak pertandang, anak melumang, ras diberu balu-balu, si tading i kotandu. Lakoken e i bas ingan ersembah si sada e.
12Jaga maka tetap iikutkenndu perentah-perentah enda; ula lupa maka nai kam jadi budak i Mesir."
Wari Raya Sapo-sapo (Im 23:33-43)
13"Kenca nggo dung ierikndu gandumndu, ras kenca nggo dung iperehndu anggurndu, rayaken lah Wari Raya Sapo-sapo pitu wari dekahna.
14Ermeriah ukurlah ras anak-anakndu, suruh-suruhenndu, ras kalak Lewi, kalak pertandang, anak melumang, ras diberu balu-balu, si tading i bas kotandu.
15Pehagalah TUHAN Dibatandu alu ngerayaken wari raya enda pitu wari dekahna i bas ingan ersembah si sada e. Ermeriah ukurlah erkiteken TUHAN nggo masu-masu peranin ras pendahinndu.
16Kerina dilaki i bas bangsandu arus reh nembah TUHAN ku ingan ersembah si sada e telu kali i bas sada tahun, eme: paksa Paskah, paksa Kerja Rani, ras i bas paksa Wari Raya Sapo-sapo. Sekalak-sekalak arus maba persembahen,
17rikutken kengasupenna, sue ras pasu-pasu si nggo ibereken TUHAN Dibatandu."
Cara ndalanken pengukumen
18"Angkatlah hakim-hakim ras pegawai-pegawai si deban i bas tep-tep kota si ibereken TUHAN Dibatandu man bandu, gelah kalak enda ngerunggui rayat alu la rayo-ayo.
19Arus maka kalak enda bujur dingen rembang tengah carana ngadili. La banci ia ngaloken sogok, sabap pemere erbahanca pentang mata, aminna pe ia kalak pentar dingen kalak bujur, janah e erbahanca ia erbahan keputusen si salah.
20Arus maka tetap bujur dingen adil kam, gelah banci inganindu negeri si ibereken TUHAN Dibatandu man bandu janah banci kam tetap nggeluh i je.
21Adi ipajekkenndu batar-batar persembahen man TUHAN Dibatandu, ula pajekken i duruna gana-gana Dewi Asera si ibahan i bas kayu nari.
22Ula sada pe pajekken tugu i bas batu nari man ingan ersembah man berhala, erkiteken nembeh kal ate TUHAN si bage.