Dual Panel1Mungkin lit dua kalak Israel lawes ku pengadilen ngaduken perkarana. Kenca iadili ieteh maka sekalak ersalah sekalak nari lang.
2Adi ukumen si ersalah ndai ukumen balbal, ipelangkem hakim ia lebe, emaka ibalbali. Piga kali ia arus ibalbali e, ngenen kesalahenna.
3Banci ia ibalbali empat puluh kali, tapi la banci lebih. Adi lebih asang si e, ia nggo ipekitik i lebe-lebe jelma si nterem.
4Ula sompel babah lembu si sangana ngerik."
Utang nandangi senina si nggo mate
5"Adi dua kalak si ersenina tading ras-ras, sekalak i bas si dua e mate alu la lit nadingken sada pe anak dilaki; adi bage ndehara si nggo mbalu e la banci sereh man kalak si deban, i darat keluarga e. Rutang seninana ndai ngelakomanganisa.
6Anakna sintua si dilaki si ipupus kalak enda, ikira jadi anak seninana si nggo mate ndai; alu bage tetap lit sinursurna i Israel.
7Tapi adi seninana ndai la nggit ngelakomanganisa, iadap diberu e lah peminpin-peminpin kota alu ngataken, 'Senina perbulangenku la nggit ertanggung jawab. La ia nggit mereken sinursur man seninana i tengah-tengah bangsa Israel.'
8Kenca bage peminpin-peminpin kota ndilo ia jenari ngerana man bana. Adi tetap denga ia la nggit ngelakomangani diberu seninana e,
9ijumpai diberu si nggo mbalu e lah i adep-adepen peminpin-peminpin kota, ibuatna sembelah selopna, icidurina ayo senina perbulangenna e nina, 'Enda me jadina man kalak si la nggit mereken sinursur man seninana.'
10Keluargana e itandai i Israel 'keluarga kalak si nggo itangtangi selopna.'"
Undang-undang si deban
11"Adi dua dilaki sangana rubati, jenari sekalak i bas si dua e reh ndeharana nampatisa alu mecek kelamin imbang dilakina e,
12ula cidahken perkuah ate man ndeharana e; keret saja tanna.
13Ula kam nipu adi kam mpergunaken timbangen ntah sukat-sukat.
14(Ul 25:13)
15Pakelah timbangen tah sukat-sukat si bujur, gelah gedang umurndu i negeri si ibereken TUHAN Dibatandu man bandu.
16Nembeh ate TUHAN man kalak penipu."
Perentah munuh bangsa Amalek
17"Inget uga perbahanen bangsa Amalek sanga kam reh i Mesir nari.
18La ia mbiar ngenen Dibata, emaka sanga kote dingen latih iakapndu iserangna kam i pudi nari, janah ibunuhina kerina kalak si merap arah pudi.
19Emaka, adi nggo ibereken TUHAN Dibatandu man bandu negeri e, janah nggo aman kam ibahanna i bas kerina musuh-musuhndu si lit i kelewetndu, arus maka ibunuhndu kerina bangsa Amalek, gelah ise pe ula nari ngingetsa. Ula lupa si e!"